|
പ്രധാനമന്ത്രി നരേന്ദ്ര മോദി ഗുജറാത്തിലെ ജാംനഗറിലെ റിലയന്സ് ഫൗണ്ടേഷന്റെ വന്താര സന്ദര്ശിക്കുകയും വന്യജീവി രക്ഷാ പുനരധിവാസ കേന്ദ്രം ഉദ്ഘാടനം ചെയ്യുകയും ചെയ്തു. റിലയന്സ് ഫൗണ്ടേഷന്റെ ഡയറക്ടര് അനന്ത് അംബാനിക്കൊപ്പമാണ് പ്രധാനമന്ത്രി വന്താര സന്ദര്ശിച്ചത്. അവിടെ മൃഗങ്ങള്ക്ക് നല്കുന്ന പരിചരണത്തിലും ചികിത്സയിലും അദ്ദേഹം ആകൃഷ്ടനായി.
'ഒരു സിംഹക്കുട്ടി വാഹനമിടിച്ച് ഗുരുതരമായ നട്ടെല്ലിന് പരിക്കേറ്റു. അവള്ക്ക് ശരിയായ പരിചരണം ലഭിച്ചു. കുടുംബം ഉപേക്ഷിച്ച ഒരു പുള്ളിപ്പുലിക്ക് ശരിയായ പോഷകാഹാര പരിചരണത്തിലൂടെ പുതുജീവന് ലഭിച്ചു. അത്തരത്തില് മൃഗങ്ങള്ക്ക് നല്കിയ പരിചരണത്തിന് വന്താരയിലെ ടീമിനെ ഞാന് അഭിനന്ദിക്കുന്നു'; മോദി എക്സില് കുറിച്ചു.
ഗുജറാത്തിലെ ജാംനഗര് റിഫൈനറി കോംപ്ലക്സില് 3,500 ഏക്കര് വിസ്തൃതിയില് സ്ഥിതി ചെയ്യുന്ന ലോകത്തിലെ ഏറ്റവും വലിയ മൃഗ പുനരധിവാസ കേന്ദ്രമാണ് വന്താര. രണ്ടായിരത്തിലധികം ജീവജാലങ്ങളും വംശനാശഭീഷണി നേരിടുന്നതുമായ 1.5 ലക്ഷത്തിലധികം ജീവജാലങ്ങളാണ് വന്താരയില് വസിക്കുന്നതത്. സന്ദര്ശന വേളയില്, പ്രധാനമന്ത്രി വന്താരയുടെ സൗകര്യങ്ങള് പര്യവേക്ഷണം ചെയ്യുകയും പുനരധിവസിപ്പിക്കപ്പെട്ട മൃഗങ്ങളെ സന്ദര്ശിക്കുകയും ചെയ്തു. കൂടാതെ ജീവജാലങ്ങള്ക്ക് അത്യാധുനിക ചികിത്സ ഉറപ്പാക്കുന്നതിനായി എംആര്ഐ, സിടി സ്കാനുകള്, ഐസിയുകള്, വൈല്ഡ്ലൈഫ് അനസ്തേഷ്യ, കാര്ഡിയോളജി, നെഫ്രോളജി, എന്ഡോസ്കോപ്പി, ദന്തചികിത്സ, ഇന്റേണല് മെഡിസിന് എന്നിവയുള്പ്പെടെയുള്ള നൂതന വെറ്ററിനറി സേവനങ്ങളും ഇതില് ഉള്ക്കൊള്ളുന്നു. |
