കൊച്ചി: എസ്എന്ഡിപി യോഗം ജനറല് സെക്രട്ടറി സ്ഥാനത്തു നിന്നും വെള്ളാപ്പള്ളി നടേശനെ അയോഗ്യനാക്കിയ ഹൈക്കോടതി ഉത്തരവ് തുടരും. വിധി സ്റ്റേ ചെയ്യണമെന്ന നടേശന്റെ ആവശ്യം ഹൈക്കോടതി ഡിവിഷന് ബെഞ്ച് നിരാകരിച്ചു.
സിംഗിള് ബെഞ്ച് വിധിക്കെതിരെയാണ് വെള്ളാപ്പള്ളി നടേശന് അപ്പീല് നല്കിയത്. എന്നാല് ഡിവിഷന് ബെഞ്ച്, സിംഗിള് ബെഞ്ച് വിധി അനുസരിച്ചുള്ള സ്ഥിതി തുടരാനാണ് നിര്ദേശം നല്കിയത്. നടേശനോടൊപ്പം മകന് തുഷാര് വെള്ളാപ്പള്ളി അടക്കമുള്ള ഡയറക്ടര് ബോര്ഡ് അംഗങ്ങളെയും സിംഗിള് ബെഞ്ച് അയോഗ്യരാക്കിയിരുന്നു.
താല്ക്കാലിക ഭരണത്തിനായി ഡയറക്ടര് ബോര്ഡ് രൂപീകരിക്കാന് സര്ക്കാരിന് നിര്ദേശം നല്കിയിരുന്നെങ്കിലും, സര്ക്കാര് നോമിനികള് ഇതുവരെ നിയമിച്ചിട്ടില്ലെന്ന് അഭിഭാഷകന് കോടതിയെ അറിയിച്ചു. തിങ്കളാഴ്ച നോമിനികളുടെ പട്ടിക സമര്പ്പിക്കണമെന്ന് ഡിവിഷന് ബെഞ്ച് നിര്ദേശിച്ചു.
പ്രൊഫ. എം കെ സാനു അടക്കമുള്ളവര് സമര്പ്പിച്ച ഹര്ജിയിലാണ് നടേശനെ ജനറല് സെക്രട്ടറി സ്ഥാനത്തു നിന്നും നീക്കിയത്. കമ്പനി നിയമപ്രകാരമുള്ള നടപടികള് പാലിച്ചിട്ടില്ലെന്ന കണ്ടെത്തലിന്റെ അടിസ്ഥാനത്തിലാണ് കോടതി വിധി. വൈസ് പ്രസിഡന്റ് തുഷാര് വെള്ളാപ്പള്ളി, പ്രസിഡന്റ് എംഎന് സോമന്, ദേവസ്വം സെക്രട്ടറി അരയക്കണ്ടി സന്തോഷ് എന്നിവര്ക്കും സ്ഥാനത്ത് തുടരാന് അര്ഹതയില്ലെന്ന് കോടതി വ്യക്തമാക്കിയിട്ടുണ്ട്
