പാലക്കാട്: പാലക്കാട് മണ്ഡലത്തില് സ്വതന്ത്രനായി മത്സരിക്കില്ലെന്ന് എംഎല്എ രാഹുല് മാങ്കൂട്ടത്തില് വ്യക്തമാക്കി. ''പാര്ട്ടി പറഞ്ഞാല് മത്സരിക്കും, വേണ്ടെന്ന് പറഞ്ഞാല് ഇല്ല'' എന്നായിരുന്നു അദ്ദേഹത്തിന്റെ പ്രതികരണം. പാര്ട്ടി അംഗത്വത്തില് നിന്ന് പുറത്താക്കപ്പെട്ടതിനാല് പാര്ട്ടിക്ക് വേണ്ടി പ്രചാരണം നടത്താനാകില്ലെന്നും അദ്ദേഹം കൂട്ടിച്ചേര്ത്തു.
രാഹുലിന്റെ നേതൃത്വത്തില് നിര്മ്മിച്ച വീടുകളുടെ താക്കോല്ദാനം നിര്വഹിക്കുന്നതിനാണ് അദ്ദേഹം മണ്ഡലത്തിലെത്തിയത്. മൂന്നാം ബലാത്സംഗ കേസില് അറസ്റ്റിലായതിന് ശേഷം മണ്ഡലത്തിലെത്തുന്നത് ഇതാദ്യമായാണ്. നിയമസഭാ തിരഞ്ഞെടുപ്പ് അടുത്തിരിക്കെയാണ് രാഹുലിന്റെ സാന്നിധ്യം ശ്രദ്ധേയമായത്.
പാലക്കാട് ബ്ലോക്ക് കോണ്ഗ്രസ് അധ്യക്ഷന് സി.വി. സതീഷ്, ബ്ലോക്ക് ട്രഷറര് മച്ചിങ്ങല് ഹരിദാസ് എന്നിവര് അദ്ദേഹത്തോടൊപ്പം ഉണ്ടായിരുന്നു. കോണ്ഗ്രസില് നിന്ന് പുറത്തായ രാഹുലിന് പകരം രമേഷ് പിഷാരടി യുഡിഎഫ് സ്ഥാനാര്ത്ഥിയാകാന് സാധ്യതയുണ്ടെന്ന വിവരം പുറത്തുവന്നിട്ടുണ്ട്.
ജനുവരി 11-നാണ് പ്രത്യേക അന്വേഷണ സംഘം മൂന്നാം ബലാത്സംഗ കേസില് രാഹുലിനെ അറസ്റ്റ് ചെയ്തത്. ആദ്യ കേസില് ഹൈക്കോടതി അനുവദിച്ച മുന്കൂര് ജാമ്യം റദ്ദാക്കണമെന്ന് ആവശ്യപ്പെട്ട് പരാതിക്കാരി സുപ്രീം കോടതിയെ സമീപിച്ചിരിക്കുകയാണ്
