കൊല്ക്കത്ത: രാഷ്ട്രപതിയെ സംസ്ഥാന സര്ക്കാര് അനാദരവോടെ സ്വീകരിച്ചെന്നാരോപിച്ച് ബിജെപി നടത്തിയ പ്രചാരണത്തിന് മറുപടിയായി മുഖ്യമന്ത്രി മമത ബാനര്ജി ശക്തമായ തിരിച്ചടി നല്കി. 2024-ലെ ഒരു ചിത്രമാണ് മമത ബിജെപിക്കെതിരെ ആയുധമാക്കിയിരിക്കുന്നത്.
എല്.കെ. അഡ്വാനിക്ക് ഭാരതരത്ന പുരസ്കാരം സമ്മാനിച്ച ചടങ്ങിലെ ചിത്രത്തില്, രാഷ്ട്രപതി ദ്രൗപദി മുര്മു നില്ക്കുമ്പോള്, പ്രധാനമന്ത്രി നരേന്ദ്രമോദി അഡ്വാനിക്കൊപ്പം ഇരിക്കുന്നതാണ്. ''ഈ ചിത്രം പ്രധാനമന്ത്രിക്കുള്ളതാണ്. നിങ്ങള് ഒരു ആദിവാസി നേതാവിനെയും, അത് ഇന്ത്യന് രാഷ്ട്രപതിയായാലും ബഹുമാനിക്കുന്നില്ല. രാഷ്ട്രപതി നില്ക്കുന്നു, പ്രധാനമന്ത്രി ഇരിക്കുന്നു,'' എന്ന് മമത ആരോപിച്ചു.
''ഞങ്ങള് രാഷ്ട്രപതിയെ ബഹുമാനിക്കുന്നു. രാഷ്ട്രപതിയുടെ കസേരയോടും ഭരണഘടനയോടും ഞങ്ങള്ക്ക് പൂര്ണ്ണ ബഹുമാനമുണ്ട്. അതിനെ അമ്മയെപ്പോലെ കണക്കാക്കുന്നു,'' എന്നും മമത കൂട്ടിച്ചേര്ത്തു.
വിവാദത്തിന്റെ പശ്ചാത്തലം
സംസ്ഥാന സന്ദര്ശനത്തിനെത്തിയ രാഷ്ട്രപതിയെ മുഖ്യമന്ത്രി വിമാനത്താവളത്തില് സ്വീകരിക്കാനെത്താതിരുന്നതാണ് വിവാദത്തിന് കാരണമായത്. പ്രോട്ടോക്കോള് പ്രകാരം രാഷ്ട്രപതി സംസ്ഥാനത്തെത്തുമ്പോള് മുഖ്യമന്ത്രി സ്വീകരിക്കാനെത്തേണ്ടതാണ്. എന്നാല് സിലിഗുഡി മേയര് മാത്രമാണ് സ്വീകരിച്ചത്. കൂടാതെ, രാഷ്ട്രപതി പങ്കെടുത്തിരിക്കേണ്ട അന്താരാഷ്ട്ര സാന്താള് സമ്മേളന വേദി മാറ്റിയതും അതൃപ്തിക്ക് ഇടയാക്കി.
ഇതിന് പിന്നാലെ, രാഷ്ട്രപതിയെ മമത ബാനര്ജി സര്ക്കാര് അനാദരിച്ചുവെന്ന് ആരോപിച്ച് ബിജെപി രംഗത്തെത്തിയിരുന്നു
