ലണ്ടന്: യുകെയിലെബെഡ്ഫോര്ഡിലെ ഒരു റെസിഡന്ഷ്യല് തെരുവിന്റെ മധ്യത്തില് ഒരു ഹോട്ട് എയര് ബലൂണ് ഇറങ്ങുന്ന വീഡിയോ സമൂഹ മാധ്യമ ഉപയോക്താക്കളെ അമ്പരപ്പിച്ചു. നിരവധി വീടുകളും കാറുകളും വൈദ്യുതി തൂണുകള്ക്കും ഇടയില് ആര്ക്കും ഒരു അപകടവും ഉണ്ടാക്കാതെ വളരെ സുരക്ഷിതമായി ഇറങ്ങുന്ന ഹോട്ട് എയര് ബലൂണിന്റെ കാഴ്ച കാണാനും സമൂഹ മാധ്യമങ്ങളില് നിരവധി പേരുണ്ടായിരുന്നു. ദിശ തെറ്റിയ ബലൂണ് തരിക്കേറിയ നഗരത്തില് പറന്നിറങ്ങാന് ശ്രമിക്കുന്നത് കണ്ട ചിലര് നടത്തിയ ശ്രമമാണ് സുരക്ഷിത ലാന്റിംഗിന് വഴിയൊരുക്കിയത്.
അപകടമൊന്നും സംഭവിക്കാതെ സുരക്ഷിതമായി ബലൂണിനെ പറന്നിറങ്ങാന് സഹായിച്ചത് താഴെ നിന്നിരുന്നവരായിരുന്നു. ബലൂണില് നിന്നും പൈലറ്റ് താഴേക്ക് എറിഞ്ഞ് കൊടുത്ത കയറില് പിടിച്ച് നിയന്ത്രിച്ചാണ് നാട്ടുകാര് ബലൂണിനെ സുരക്ഷിതമായി ഇറങ്ങാന് സഹായിച്ചത്. 'അത് അസാധാരണമായിരുന്നു. അത് വേഗത്തിലും അനിയന്ത്രിതമായും സഞ്ചരിച്ചു, ടെറസുള്ള വീടുകളും പൈലോണുകളും മിക്കവാറും നഷ്ടപ്പെട്ടു. ഇരുവശത്തും പാര്ക്ക് ചെയ്തിരിക്കുന്ന കാറുകള്ക്കിടയില് അത് ഏതാണ്ട് തികഞ്ഞ ഒരു ലാന്ഡിംഗ് നടത്തി' എന്നാണ് സംഭവ സ്ഥലത്ത് ഉണ്ടായിരുന്ന ജോര്ജിയ ബാലക്, ബെഡ്ഫോര്ഡ് ഇന്ഡിപെന്ഡന്റിനോട് പറഞ്ഞത്. ബലൂണിന്റെ നിലവിട്ട സഞ്ചാരം കണ്ട് സമീപ പ്രദേശത്തുള്ളവരെല്ലാം സഹായത്തിനായി തെരുവിലെത്തിയിരുന്നെന്നും റിപ്പോര്ട്ടുകള് പറയുന്നു.
ഒരു അപകടവും കൂടാതെ ബലൂണ് ലാന്ഡ് ചെയ്തു. ആര്ക്കും പരിക്കുകളില്ലെന്നും ബ്രിട്ടീഷ് ബലൂണ് ആന്ഡ് എയര്ഷിപ്പ് ക്ലബ് ബിബിസിയോട് സ്ഥിരീകരിച്ചു. നഗര പ്രദേശങ്ങളില് ഹോട്ട് എയര് ബലൂണ് ലാന്ഡിംഗ് അപൂര്വമാണെന്ന് റിപ്പോര്ട്ടുകള് പറയുന്നു. സയന്സ്ഡയറക്റ്റിന്റെ കണക്കനുസരിച്ച്, 1976 നും 2004 നും ഇടയില് യുകെയില് ബലൂണുകള് ഉള്പ്പെട്ട 98 സംഭവങ്ങള് മാത്രമേ രേഖപ്പെടുത്തിയിട്ടുള്ളൂ. യുകെയില് ബലൂണിംഗ് പ്രവര്ത്തനങ്ങള് സിവില് ഏവിയേഷന് അതോറിറ്റിയുടെ (CAA) നിയന്ത്രണത്തിലാണ്. ഇതിനാല് പ്രൊഫഷണല് പൈലറ്റുമാര്ക്ക് വാണിജ്യ ലൈസന്സുകള് ഉള്പ്പെടെ കര്ശനമായ സുരക്ഷാ നടപടികള് പൂര്ത്തിയാക്കേണ്ടതുണ്ടെന്നും റിപ്പോര്ട്ടില് ചൂണ്ടിക്കാണിക്കുന്നു.
