ഐശ്വര്യത്തിന്റേയും കാര്ഷിക സമൃദ്ധിയുടേയും ഓര്മകള് പുതുക്കി ഇന്ന് വിഷു. കാഴ്ചയെ സമൃദ്ധമാക്കാന് വേണ്ടതൊക്കെ കണിയായി ഒരുക്കിയും കൈനീട്ടം നല്കിയും വിഷു ആഘോഷത്തിലാണ് ലോകമെമ്പാടുമുള്ള മലയാളികള്. കാര്ഷിക സമൃദ്ധിയുടെ പോയകാലത്തെ സ്മരണകള്ക്കൊപ്പം വരാനിരിക്കുന്ന നല്ല നാളുകളുടെ പ്രതീക്ഷകൂടിയാണ് ഒരോ വിഷുവും. നിറഞ്ഞുകത്തുന്ന നിലവിളക്കിന് മുന്നില് സ്വര്ണ്ണനിറമുള്ള കൊന്നപ്പൂക്കള്. ഓട്ടുരുളിയില് കാര്ഷിക സമൃദ്ധിയുടെ ഓര്മ്മപ്പെടുത്തലായി കണിവെള്ളരിയും ഫലങ്ങളും. സമൃദ്ധിയുടെ ഈ കാഴ്ച ഒരാണ്ടിലേക്ക് മുഴുവനുള്ളതാണ്. എല്ലാവരും കണി കണ്ട് കഴിഞ്ഞാല് കൈനീട്ടമാണ്.
കുടുബത്തിലെ മുതിര്ന്നവര് കയ്യില് വച്ച് തരുന്ന അനുഗ്രഹം കൂടിയാണിത്. പിന്നെ നാട്ടുരുചിയുമായി സദ്യവട്ടം. പടക്കം പൊട്ടിച്ചും പൂത്തിരി കത്തിച്ചും ആഘോഷങ്ങള് വേറെയും. സൂര്യന് മീനം രാശിവിട്ട് മേടം രാശിയിലേക്ക് പ്രവേശിക്കുന്ന സമയമാണിത്. കേരളത്തിലെ കര്ഷകര്ക്ക് അടുത്ത വാര്ഷിക വിളകള്ക്കുള്ള തയാറെടുപ്പിന്റെ കാലം കൂടിയാണ് വിഷു. വിഷുപ്പുലരിയില് കണ്ണനെ കണികണ്ടുണരാന് ഗുരുവായൂരില് വന് ഭക്ത ജനത്തിരക്കാണ്. പുലര്ച്ചെ 2.42 മുതല് 3.42 വരെയായിരുന്നു വിഷുക്കണി ദര്ശനം. മേല് ശാന്തി പള്ളിശ്ശേരി മധുസൂദനന് നമ്പൂതിരി ശ്രീലകത്ത് കയറി ആദ്യം ഗുരുവായൂരപ്പനെ കണി കാണിച്ചു. പിന്നാലെ ശ്രീലക വാതില് ഭക്തര്ക്കായി തുറന്നിട്ടു. നമസ്കാര മണ്ഡപത്തിലും കണിയൊരുക്കിയിരുന്നു.. വിഷുദിനത്തില് പ്രസാദ ഊട്ടിന് പതിവ് വിഭവങ്ങള് മാത്രമാകും. ഉച്ചപൂജ കഴിഞ്ഞ് നട അടച്ചാല് വരി നില്ക്കുന്ന മുഴുവന് പേര്ക്കും പ്രസാദ ഊട്ട് നല്കും.
