ഓക്സ്ഫോര്ഡ് സര്വകലാശാലയിലെ ആഷ്മോളിയന് മ്യൂസിയം പതിനാറാം നൂറ്റാണ്ടിലെ വിശുദ്ധ തിരുമങ്കൈ ആള്വാറിന്റെ വെങ്കല പ്രതിമ ഇന്ത്യയ്ക്ക് തിരികെ നല്കി. തമിഴ്നാട്ടിലെ തടിക്കൊമ്പുവിലെ ശ്രീ സൗന്ദരരാജ പെരുമാള് ക്ഷേത്രത്തില് നിന്നാണ് പ്രതിമയുടെ ഉത്ഭവമെന്ന് സ്ഥിരീകരിക്കപ്പെട്ടത്.
1967-ല് സോത്ത്ബീസ് ലേലത്തിലൂടെ മ്യൂസിയം സ്വന്തമാക്കിയ പ്രതിമയുടെ യഥാര്ത്ഥ ഉറവിടം 2019-ല് ഒരു ഗവേഷകന് കണ്ടെത്തിയതോടെയാണ് അന്വേഷണം ആരംഭിച്ചത്. തുടര്ന്ന് ഇന്ത്യന് ഹൈക്കമ്മീഷന്റെ സ്ഥിരീകരണത്തോടെ ഇന്ത്യാ ഹൗസില് നടന്ന ഔപചാരിക ചടങ്ങില് പ്രതിമ കൈമാറി.
'ഇത് മ്യൂസിയത്തിന് വളരെ പ്രധാനപ്പെട്ട നിമിഷമാണ്. നല്ല ഉദ്ദേശ്യത്തോടെയായിരുന്നു സ്വന്തമാക്കല്, എന്നാല് പ്രതിമയുടെ യഥാര്ത്ഥ സ്ഥലം തിരിച്ചറിയപ്പെട്ടതോടെ ഇന്ത്യയിലേക്ക് തിരികെ നല്കാനുള്ള നടപടികള് ആരംഭിച്ചു,' മ്യൂസിയം ഡയറക്ടര് ഡോ. സാ സ്റ്റര്ഗിസ് പറഞ്ഞു.
ഇന്ത്യന് ഹൈക്കമ്മീഷണര് വിക്രം ദൊരൈസ്വാമി പറഞ്ഞു: 'ഇത് മ്യൂസിയം ആദ്യമായി തിരികെ നല്കുന്ന പുരാവസ്തുവാണ്. കലാപൈതൃകത്തിന്റെ സമഗ്രത തിരിച്ചറിയുന്ന ഒരു പ്രധാന ചുവടുവയ്പ്പാണ് ഇത്.'
ഇന്ത്യന് സാംസ്കാരിക മന്ത്രാലയവും എ.എസ്.ഐയും തമിഴ്നാട് സര്ക്കാരും ചേര്ന്ന് പ്രതിമയുടെ പഴയ പ്രതാപം പുനഃസ്ഥാപിക്കുന്നതിനുള്ള നടപടികള് സ്വീകരിക്കും.
കൈമാറ്റ ചടങ്ങില് ഇന്ത്യയില് നിന്ന് മോഷ്ടിക്കപ്പെട്ട് കടത്തിക്കൊണ്ടുപോയ മറ്റ് നാല് പുരാവസ്തുക്കളും ഉള്പ്പെട്ടു. 'ഇരിക്കുന്ന ഗണേശന് പാരസോള്', 'നൃത്തം ചെയ്യുന്ന ഗണേശന്', 'നൃത്തം ചെയ്യുന്ന ബാലകൃഷ്ണന്', ഒരു 'പീഠം' എന്നിവയും ഗാന്ധി ഹാളില് പ്രദര്ശിപ്പിച്ച ശേഷം ഇന്ത്യയിലേക്ക് മടക്കയാത്രയ്ക്കായി ഒരുങ്ങുകയാണ്.
യുകെ, യു.എസ്., ഇന്ത്യയിലെ വിവിധ ഏജന്സികളുടെ സഹകരണത്തിലൂടെയാണ് പുരാവസ്തുക്കളുടെ തിരിച്ചുവരവ് സാധ്യമായത്. 'സാംസ്കാരിക സ്വത്തിലെ നിയമവിരുദ്ധ വ്യാപാരം രാജ്യാന്തര തലത്തില് നടക്കുന്ന ഒന്നാണ്. അതിനെ നേരിടാന് ശക്തമായ നിയമ നിര്വ്വഹണ സഹകരണം അനിവാര്യമാണ്,' മെറ്റ് പോലീസിന്റെ സാമ്പത്തിക, സൈബര് കുറ്റകൃത്യ വിഭാഗം മേധാവി വില്യം ലെയ്ന് പറഞ്ഞു
