ലണ്ടന്‍: ഇറാനെതിരായ യു.എസ് ആക്രമണത്തെയും ഇതിനായി ബ്രിട്ടീഷ് സൈനിക താവളങ്ങള്‍ നല്‍കാനുള്ള സര്‍ക്കാരിന്റെ തീരുമാനത്തെയും ഭൂരിപക്ഷം ബ്രിട്ടീഷുകാരും എതിര്‍ക്കുന്നുവെന്ന് പുതിയ സര്‍വേ വ്യക്തമാക്കുന്നു. യൂഗവ് നടത്തിയ അഭിപ്രായ സര്‍വേയിലാണ് പൗരന്മാര്‍ തങ്ങളുടെ നിലപാട് വ്യക്തമാക്കിയത്.

ഇറാനെതിരായ യു.എസ് സൈനിക നടപടിയെ 28 ശതമാനം ബ്രിട്ടീഷുകാര്‍ പിന്തുണയ്ക്കുമ്പോള്‍, 49 ശതമാനം പേര്‍ തുറന്ന എതിര്‍പ്പുമായി രംഗത്തെത്തി. ബ്രിട്ടീഷ് വ്യോമതാവളങ്ങള്‍ യു.എസിന് ഉപയോഗിക്കാന്‍ അനുവദിക്കുന്നതിനെ 50 ശതമാനം പേര്‍ എതിര്‍ക്കുന്നു. 30 ശതമാനം പേര്‍ മാത്രമാണ് ഈ നീക്കത്തെ പിന്തുണച്ചത്. പ്രതികരിച്ചവരില്‍ 11 ശതമാനം പേര്‍ മാത്രമാണ് യു.എസ്-ഇസ്രായേല്‍ ആക്രമണത്തെ ശക്തമായി പിന്തുണച്ചത്.

ബ്രിട്ടീഷ് പ്രധാനമന്ത്രി കെയ്ര്‍ സ്റ്റാര്‍മര്‍ ഞായറാഴ്ച രാത്രി യു.എസ്-ന് ബ്രിട്ടീഷ് താവളങ്ങള്‍ ഉപയോഗിക്കാന്‍ അനുമതി നല്‍കുമെന്ന് പ്രഖ്യാപിച്ചിരുന്നു. എന്നാല്‍ ബ്രിട്ടന്‍ നേരിട്ട് ആക്രമണ പ്രവര്‍ത്തനങ്ങളില്‍ ചേരുന്നില്ലെന്നും, താവളങ്ങളുടെ ഉപയോഗം പ്രതിരോധ ആവശ്യങ്ങള്‍ക്കായി മാത്രമാണെന്നും അദ്ദേഹം വ്യക്തമാക്കി.

ചാഗോസ് ദ്വീപുകളിലെ ഡീഗോ ഗാര്‍സിയയിലെ സംയുക്ത താവളത്തിന്റെ ഉപയോഗം ആദ്യം തടഞ്ഞിരുന്ന ബ്രിട്ടന്‍, പിന്നീട് യു.എസ്-ന് അനുമതി നല്‍കിയിരുന്നു. സര്‍വേ ഫലങ്ങള്‍ പുറത്തുവന്നതോടെ, സര്‍ക്കാരിന്റെ തീരുമാനത്തിനെതിരെ ജനകീയ എതിര്‍പ്പ് കൂടുതല്‍ ശക്തമായതായി വിലയിരുത്തപ്പെടുന്നു