ലണ്ടന്‍: ബ്രിട്ടീഷ് രാഷ്ട്രീയത്തില്‍ പുതിയ നീക്കങ്ങള്‍ക്ക് തുടക്കമിട്ട് Andy Burnham. ദേശീയ രാഷ്ട്രീയത്തിലേക്കും ഭാവിയിലെ പ്രധാനമന്ത്രി സ്ഥാനത്തേക്കുമുള്ള അദ്ദേഹത്തിന്റെ യാത്ര ആരംഭിച്ചതായാണ് രാഷ്ട്രീയ നിരീക്ഷകരുടെ വിലയിരുത്തല്‍. ഗ്രേറ്റര്‍ മാഞ്ചസ്റ്റര്‍ മേയറായ ബേണ്‍ഹാമിന് മാക്കര്‍ഫീല്‍ഡ് ഉപതിരഞ്ഞെടുപ്പില്‍ മത്സരിക്കാനുള്ള അനുമതി Labour Party ദേശീയ നിര്‍വാഹ സമിതി നല്‍കിയിട്ടുണ്ട്. ഇതോടെ മത്സരരംഗത്തേക്കുള്ള ആദ്യത്തെ വലിയ തടസ്സം നീങ്ങിയിരിക്കുകയാണ്. ജൂണ്‍ മധ്യത്തിലോ അവസാനത്തോടെയോ നടക്കുന്ന ഉപതിരഞ്ഞെടുപ്പില്‍ ബേണ്‍ഹാം ജനവിധി തേടും. എന്നാല്‍ അടുത്തിടെ നടന്ന പ്രാദേശിക തിരഞ്ഞെടുപ്പുകളില്‍ Reform UK ശക്തമായ മുന്നേറ്റം നടത്തിയ സാഹചര്യത്തില്‍ മത്സരം കടുത്തതായിരിക്കുമെന്നാണ് വിലയിരുത്തല്‍.

ഉപതിരഞ്ഞെടുപ്പില്‍ വിജയിക്കാനായാല്‍ വേനല്‍ക്കാല പാര്‍ലമെന്റ് അവധിക്ക് മുമ്പ് തന്നെ ലേബര്‍ നേതൃത്വ മത്സരത്തിലൂടെ പ്രധാനമന്ത്രി സ്ഥാനത്തേക്കുള്ള സാധ്യത ലക്ഷ്യമിടുന്നതായും റിപ്പോര്‍ട്ടുകളുണ്ട്. ലിവര്‍പൂളില്‍ നടക്കുന്ന ലേബര്‍ പാര്‍ട്ടി സമ്മേളനത്തില്‍ പ്രധാനമന്ത്രിയായി പങ്കെടുക്കുക എന്നതും അദ്ദേഹത്തിന്റെ രാഷ്ട്രീയ ക്യാമ്പ് കണക്കുകൂട്ടുന്നുവെന്നാണ് സൂചന. എന്നാല്‍ ഇപ്പോഴത്തെ പ്രധാന ശ്രദ്ധ ഉപതിരഞ്ഞെടുപ്പിലാണെന്ന് ബേണ്‍ഹാം അനുയായികള്‍ വ്യക്തമാക്കുന്നു. അതേസമയം, പ്രധാനമന്ത്രി Keir Starmer ന് മേല്‍ പാര്‍ട്ടിക്കുള്ളില്‍ സമ്മര്‍ദം ശക്തമായ സാഹചര്യത്തില്‍, ലേബര്‍ നേതൃത്വ പ്രതിസന്ധിക്ക് പരിഹാരമായി ആന്‍ഡി ബേണ്‍ഹാമിനെ വലിയൊരു വിഭാഗം കാണുന്നതായും റിപ്പോര്‍ട്ടുകള്‍ സൂചിപ്പിക്കുന്നു