ലണ്ടന്‍: മാരക രോഗങ്ങള്‍ ജീവിതത്തെ തളര്‍ത്തുമ്പോള്‍ പലരും പ്രതീക്ഷ കൈവിടാറുണ്ട്. എന്നാല്‍ രോഗത്തോട് പൊരുതി ചരിത്രം സൃഷ്ടിച്ചിരിക്കുകയാണ് ബ്രിട്ടനില്‍ നിന്നുള്ള 33കാരിയായ മെഗന്‍ ബോക്‌സല്‍. മള്‍ട്ടിപ്പിള്‍ സ്‌ക്ലിറോസിസ് എന്ന ഗുരുതര രോഗം ബാധിച്ച ശേഷവും ബ്രിട്ടന്റെ സമുദ്രതീരങ്ങളിലൂടെ 5,420 മൈല്‍ ഓടിത്തീര്‍ത്ത് ലോകറെക്കോര്‍ഡ് കുറിച്ചിരിക്കുകയാണ് ജേര്‍ണലിസ്റ്റ് കൂടിയായ മെഗന്‍.

കേന്ദ്ര നാഡീവ്യവസ്ഥയെ ബാധിക്കുന്ന ദീര്‍ഘകാല രോഗമാണ് മള്‍ട്ടിപ്പിള്‍ സ്‌ക്ലിറോസിസ്. തലച്ചോറിനെയും സുഷുമ്‌നാ നാഡിയെയും ബാധിക്കുന്ന ഈ രോഗം കാഴ്ച നഷ്ടപ്പെടല്‍, കൈകാലുകള്‍ തളരല്‍ തുടങ്ങിയ ഗുരുതര പ്രശ്‌നങ്ങള്‍ ഉണ്ടാക്കാറുണ്ട്. 2024ലാണ് മെഗന് രോഗം സ്ഥിരീകരിച്ചത്. എന്നാല്‍ രോഗത്തിന് മുന്നില്‍ തളരാന്‍ തയ്യാറാകാതെ അതിനെ വെല്ലുവിളിക്കാനായിരുന്നു മെഗന്റെ തീരുമാനം.

204 ദിവസത്തില്‍ 200 മാരത്തണുകള്‍ക്ക് തുല്യ ദൂരം

ഇംഗ്ലണ്ട്, വെയ്ല്‍സ്, സ്‌കോട്ട്‌ലന്‍ഡ് എന്നിവിടങ്ങളിലെ തീരപ്രദേശങ്ങളിലൂടെ ഏറ്റവും വേഗത്തില്‍ ഓടിത്തീര്‍ക്കുന്ന വനിത എന്ന ലോകറെക്കോര്‍ഡാണ് മെഗന്‍ സ്വന്തമാക്കിയത്. 204 ദിവസങ്ങള്‍ കൊണ്ട് 200 മാരത്തണുകള്‍ക്ക് തുല്യമായ ദൂരമാണ് അവര്‍ പിന്നിട്ടത്. 2016ല്‍ എലീസ് ഡൗണിങ് സ്ഥാപിച്ച റെക്കോര്‍ഡിനേക്കാള്‍ 97 ദിവസം മുമ്പാണ് മെഗന്‍ ഈ നേട്ടം കൈവരിച്ചത്. ഇതോടെ ലോകശ്രദ്ധ നേടിയിരിക്കുകയാണ് ഈ സാഹസികയാത്ര.

രോഗത്തോട് പോരാടിയ മനക്കരുത്ത്

രോഗം സ്ഥിരീകരിച്ചതിന് പിന്നാലെ കാഴ്ച നഷ്ടപ്പെടുകയും കൈകാലുകള്‍ തളരുകയും ചെയ്ത സാഹചര്യത്തില്‍ മനസ്സിനെ കൂടുതല്‍ ശക്തമാക്കാനാണ് മെഗന്‍ ശ്രമിച്ചത്. തന്റെ പ്രിയപ്പെട്ട നായ 'ഷാഡോ'യും യാത്രയില്‍ പലപ്പോഴും കൂട്ടായിരുന്നുവെന്ന് അവര്‍ പറയുന്നു. പാര്‍ക്കിന്‍സണ്‍സ് രോഗം ബാധിച്ചതിനെ തുടര്‍ന്ന് ബ്രിട്ടീഷ് തീരങ്ങളിലൂടെ നടന്ന അമ്മാവന്‍ ടോം ഐസക്കിന്റെ ജീവിതമാണ് തനിക്ക് പ്രചോദനമായതെന്നും മെഗന്‍ വ്യക്തമാക്കി.

കാരുണ്യ പ്രവര്‍ത്തനത്തിലും മാതൃക

സ്വന്തം നേട്ടത്തില്‍ മാത്രം ഒതുങ്ങാതെ മറ്റുള്ളവര്‍ക്ക് സഹായഹസ്തം നീട്ടാനും മെഗന്‍ മറന്നില്ല. മാനസികാരോഗ്യ രംഗത്ത് പ്രവര്‍ത്തിക്കുന്ന 'സമരിറ്റന്‍സ്' എന്ന സന്നദ്ധ സംഘടനയ്ക്കായി 50,000 പൗണ്ടിലധികം, ഇന്ത്യന്‍ രൂപയില്‍ ഏകദേശം 52 ലക്ഷം രൂപ, അവര്‍ സമാഹരിച്ചു. രോഗാവസ്ഥ അറിഞ്ഞപ്പോള്‍ താന്‍ മാനസികമായി തകര്‍ന്നുപോയിരുന്നുവെന്നും, അന്ന് സമരിറ്റന്‍സ് സംഘടനയിലെ വോളന്റിയര്‍മാരാണ് ജീവിതത്തിലേക്ക് തിരികെ കൊണ്ടുവന്നതെന്നും മെഗന്‍ നന്ദിയോടെ ഓര്‍ക്കുന്നു.

ചിട്ടയായ പരിശീലനവും ആത്മവിശ്വാസവും

ഒക്ടോബര്‍ 18ന് സഫ്‌ലോക്കിലെ സൈസ്വെല്‍ ബീച്ചില്‍ നിന്നാണ് മെഗന്‍ യാത്ര ആരംഭിച്ചത്. ദിവസവും രാവിലെ 6 മണിക്ക് എഴുന്നേറ്റ് കൃത്യമായ ഭക്ഷണക്രമം പാലിച്ച് രാവിലെ 8 മണിക്ക് ഓട്ടം തുടങ്ങുമായിരുന്നു. ഉച്ചയോടെ പകുതി മാരത്തണും വൈകിട്ട് 3 മണിയോടെ ബാക്കി ദൂരവും പൂര്‍ത്തിയാക്കുന്നതായിരുന്നു അവരുടെ ദിനചര്യ. യാത്രയ്ക്കിടെ അപരിചിതരില്‍ നിന്നും സുഹൃത്തുക്കളില്‍ നിന്നും ലഭിച്ച സ്‌നേഹവും പിന്തുണയുമാണ് മുന്നോട്ട് പോകാന്‍ കരുത്തായതെന്ന് മെഗന്‍ പറയുന്നു. ഇപ്പോള്‍ വരാനിരിക്കുന്ന ലണ്ടന്‍ മാരത്തണിലും പുതിയ റെക്കോര്‍ഡ് നേട്ടം ലക്ഷ്യമിട്ടാണ് ഈ കരുത്തുറ്റ വനിതയുടെ മുന്നേറ്റം.