ലണ്ടന്‍: മിഡില്‍ ഈസ്റ്റിലെ യുദ്ധസാഹചര്യങ്ങള്‍ ബ്രിട്ടനിലെ ജീവിതച്ചെലവ് വീണ്ടും കുത്തനെ ഉയര്‍ത്തുമെന്ന ആശങ്കയില്‍ ജനങ്ങള്‍. ഇന്ധനം, ഭക്ഷണം, ഊര്‍ജം എന്നിവയുടെ വില ഉയരാനിടയുണ്ടെന്ന മുന്നറിയിപ്പുകള്‍ ശക്തമായതോടെ ഉപഭോക്തൃ ആത്മവിശ്വാസത്തിലും വലിയ ഇടിവാണ് രേഖപ്പെടുത്തിയിരിക്കുന്നത്. അക്കൗണ്ടിങ് സ്ഥാപനമായ പിഡബ്ല്യുസി യുകെ നടത്തിയ സര്‍വേ പ്രകാരം ഉപഭോക്തൃ ആത്മവിശ്വാസ സൂചിക ഏപ്രിലില്‍ -13 ആയി താഴ്ന്നു. ജനുവരിയില്‍ ഇത് -1 ആയിരുന്നു. 2023 ശരത്കാലത്തിനുശേഷമുള്ള ഏറ്റവും താഴ്ന്ന നിരക്കാണിത്. റഷ്യ-യുക്രെയ്ന്‍ യുദ്ധത്തെ തുടര്‍ന്നുണ്ടായ സാമ്പത്തിക പ്രതിസന്ധിക്കുശേഷമുള്ള ഏറ്റവും വേഗത്തിലുള്ള ഇടിവായും ഇത് വിലയിരുത്തപ്പെടുന്നു. സര്‍വേയില്‍ പങ്കെടുത്തവരില്‍ ഏകദേശം 90 ശതമാനം പേരും ജീവിതച്ചെലവിനെക്കുറിച്ച് ആശങ്ക പ്രകടിപ്പിച്ചു. അടുത്ത മൂന്ന് മാസത്തിനിടെ ചെലവുകള്‍ കുറയ്ക്കുമെന്ന് 80 ശതമാനം പേരും വ്യക്തമാക്കി. ഇന്ധനവില ഉയരുന്നതിനെ തുടര്‍ന്ന് വാഹന ഉപയോഗം കുറയ്ക്കുമെന്നു പറയുന്നവരുടെ എണ്ണം ജനുവരിയിലെ 12 ശതമാനത്തില്‍ നിന്ന് 24 ശതമാനമായി ഉയര്‍ന്നു.

ബില്ലുകളും വായ്പകളും ഉള്‍പ്പെടെയുള്ള സാമ്പത്തിക ബാധ്യതകള്‍ കൈകാര്യം ചെയ്യുന്നതില്‍ യുവാക്കള്‍ കൂടുതല്‍ ബുദ്ധിമുട്ട് നേരിടുന്നതായും റിപ്പോര്‍ട്ടില്‍ പറയുന്നു. സാമ്പത്തിക സമ്മര്‍ദം അനുഭവിക്കുന്ന യുവാക്കളുടെ എണ്ണം 9 ശതമാനം വര്‍ധിച്ചു. ജിഎഫ്കെ യുകെ പുറത്തിറക്കിയ മറ്റൊരു സര്‍വേയിലും ഉപഭോക്തൃ ആത്മവിശ്വാസം 2023 ഒക്ടോബറിനുശേഷമുള്ള ഏറ്റവും താഴ്ന്ന നിലയിലാണെന്ന് വ്യക്തമാക്കിയിരുന്നു. ഇറാന്‍-അമേരിക്ക സംഘര്‍ഷ സാധ്യതകളും ആഗോള എണ്ണവില ഉയര്‍ച്ചയും ജനങ്ങളില്‍ കൂടുതല്‍ അനിശ്ചിതത്വം സൃഷ്ടിക്കുന്നതായി റിപ്പോര്‍ട്ടുകള്‍ ചൂണ്ടിക്കാട്ടുന്നു. അതേസമയം, മിഡില്‍ ഈസ്റ്റ് സംഘര്‍ഷത്തിന്റെ പശ്ചാത്തലത്തില്‍ ഇന്ധനം, ഭക്ഷണം, ഊര്‍ജം എന്നിവയുടെ വില വര്‍ധിക്കുന്നത് ''ഒഴിവാക്കാനാവാത്ത സാഹചര്യം'' ആകാമെന്ന് ബാങ്ക് ഓഫ് ഇംഗ്ലണ്ടും സാമ്പത്തിക വിദഗ്ധരും മുന്നറിയിപ്പ് നല്‍കുന്നു.