ലണ്ടന്‍: ജെറ്റ് ഇന്ധനവില കുത്തനെ ഉയര്‍ന്നതോടെ യുകെയില്‍ വിമാന സര്‍വീസുകള്‍ റദ്ദാക്കല്‍ വര്‍ധിച്ചതായി പുതിയ കണക്കുകള്‍. മിഡില്‍ ഈസ്റ്റ് സംഘര്‍ഷത്തെ തുടര്‍ന്നുള്ള ആഗോള ഇന്ധന പ്രതിസന്ധിയാണ് വിമാന മേഖലയില്‍ ആശങ്ക വര്‍ധിപ്പിക്കുന്നത്. ഏവിയേഷന്‍ അനലിറ്റിക്സ് സ്ഥാപനമായ സിറിയം പുറത്തുവിട്ട വിവരങ്ങള്‍ പ്രകാരം മേയ് മാസത്തില്‍ മാത്രം യുകെ വിമാനത്താവളങ്ങളില്‍ നിന്ന് പുറപ്പെടേണ്ടിരുന്ന 296 സര്‍വീസുകള്‍ ചൊവ്വാഴ്ചവരെ റദ്ദാക്കി. ഇത് ആകെ സര്‍വീസുകളുടെ 0.75 ശതമാനമാണ്. വെറും ആറു ദിവസം മുമ്പ് റദ്ദാക്കിയ സര്‍വീസുകളുടെ എണ്ണം 120 ആയിരുന്നു.

അതേസമയം, ജൂണ്‍, ജൂലൈ, ഓഗസ്റ്റ് മാസങ്ങളിലെ വേനല്‍ക്കാല സര്‍വീസുകളില്‍ ഇതുവരെ വലിയ കുറവ് രേഖപ്പെടുത്തിയിട്ടില്ല. ജൂണില്‍ 48 സര്‍വീസുകളും ജൂലൈയില്‍ 31 സര്‍വീസുകളും മാത്രമാണ് ആഴ്ച അടിസ്ഥാനത്തില്‍ കുറച്ചത്. ഓഗസ്റ്റില്‍ വെറും നാല് സര്‍വീസുകളുടെ കുറവാണ് റിപ്പോര്‍ട്ട് ചെയ്തത്. യാത്രക്കാര്‍ക്ക് നഷ്ടപരിഹാരം നല്‍കേണ്ട സാഹചര്യം ഒഴിവാക്കാന്‍ വിമാനക്കമ്പനികള്‍ രണ്ട് ആഴ്ച മുമ്പ് തന്നെ സര്‍വീസുകള്‍ റദ്ദാക്കുന്ന രീതിയിലേക്ക് മാറിയതായും റിപ്പോര്‍ട്ടില്‍ പറയുന്നു. ഇതിലൂടെ അവസാന നിമിഷ മാറ്റങ്ങള്‍ ഉണ്ടായാലും നഷ്ടപരിഹാര ബാധ്യത ഒഴിവാക്കാനാകുമെന്നാണ് വിലയിരുത്തല്‍.

മിഡില്‍ ഈസ്റ്റ് സംഘര്‍ഷം രൂക്ഷമായതോടെ ജെറ്റ് ഇന്ധനവില ഇരട്ടിയിലധികം ഉയര്‍ന്നിട്ടുണ്ട്. ഹോര്‍മൂസ് കടലിടുക്കിലൂടെ സഞ്ചരിക്കുന്ന എണ്ണ ടാങ്കറുകളിലെ നിയന്ത്രണങ്ങളും ആഗോള വിപണിയില്‍ കൂടുതല്‍ ആശങ്ക സൃഷ്ടിക്കുകയാണ്. യൂറോപ്പിലെ പ്രമുഖ വിമാനക്കമ്പനികളും കടുത്ത സമ്മര്‍ദത്തിലാണ്. Lufthansa അടുത്ത ആറുമാസത്തിനിടെ 20,000 വിമാന സര്‍വീസുകള്‍ റദ്ദാക്കുമെന്ന് നേരത്തെ പ്രഖ്യാപിച്ചിരുന്നു. KLM, Scandinavian Airlines എന്നിവയും ഉയര്‍ന്ന ഇന്ധനച്ചെലവിന്റെ ആഘാതം നേരിടുകയാണ്. അതേസമയം, International Airlines Group ഈ വര്‍ഷം പ്രതീക്ഷിച്ചതിനേക്കാള്‍ ഏകദേശം 2 ബില്യണ്‍ യൂറോ അധികമായി ഇന്ധനച്ചെലവിന് ചെലവാകുമെന്ന മുന്നറിയിപ്പും നല്‍കിയിട്ടുണ്ട്.