ന്യൂയോര്‍ക്ക്: ക്വീന്‍സില്‍ അഞ്ചുവയസ്സുകാരി ഫാബിയാന കബെല്ലോയുടെ മരണവുമായി ബന്ധപ്പെട്ട് അമ്മ ഫ്രാന്‍സിസ് കബെല്ലോ അറസ്റ്റില്‍. മകളെ നഷ്ടപ്പെട്ട ദുഃഖത്തിനിടെ സംസ്‌കാരച്ചടങ്ങുകളുടെ ചെലവ് കണ്ടെത്താന്‍ ഇന്ത്യന്‍ വംശജനായ പിതാവ് കുല്‍ദീപ് സിംഗ് പൊതുജനങ്ങളുടെ സഹായം തേടിയിരിക്കുകയാണ്. ഒക്ടോബര്‍ 14ന് വൈകിട്ട് സൗത്ത് റിച്ച്മണ്ട് ഹില്ലിലെ വീട്ടില്‍നിന്ന് അടിയന്തരസന്ദേശം ലഭിച്ചതിനെത്തുടര്‍ന്നാണ് പൊലീസ് എത്തിയത്. ബോധരഹിതയായി കണ്ടെത്തിയ കുട്ടിയെ ജമൈക ഹോസ്പിറ്റല്‍ മെഡിക്കല്‍ സെന്ററിലേക്ക് കൊണ്ടുപോയെങ്കിലും രക്ഷിക്കാനായില്ല. മകളെ കൊലപ്പെടുത്തിയെന്ന് അറിയിച്ച് അമ്മതന്നെയാണ് അടിയന്തരസഹായ നമ്പറിലേക്ക് വിളിച്ചതെന്ന് പൊലീസിനെ ഉദ്ധരിച്ചുള്ള റിപ്പോര്‍ട്ടുകള്‍ പറയുന്നു. ഒക്ടോബര്‍ 15ന് അറസ്റ്റിലായ ഫ്രാന്‍സിസിനെതിരെ രണ്ടാം ഡിഗ്രി കൊലക്കുറ്റം ചുമത്തിയിട്ടുണ്ട്.

വാടകക്കാറില്‍ ഊബര്‍ ഡ്രൈവറായി ജോലി ചെയ്യുന്ന കുല്‍ദീപ് സിംഗ്, സംസ്‌കാരച്ചെലവ് തനിച്ച് വഹിക്കാന്‍ കഴിയാത്തതിനാലാണ് 'ഗോഫണ്ട്മീ' വഴി ധനസമാഹരണം ആരംഭിച്ചത്. മകളുടെ വിയോഗത്തോടെ തന്റെ ലോകംതന്നെ നഷ്ടപ്പെട്ടതുപോലെയാണ് അനുഭവപ്പെടുന്നതെന്ന് അദ്ദേഹം സഹായാഭ്യര്‍ഥനയില്‍ പറഞ്ഞു. 22,000 ഡോളര്‍ ലക്ഷ്യമിട്ടുള്ള ക്യാമ്പെയ്‌നില്‍ 18,540 ഡോളറിലധികം ലഭിച്ചതായി റിപ്പോര്‍ട്ടില്‍ പറയുന്നു. മരണകാരണത്തെക്കുറിച്ചുള്ള മെഡിക്കല്‍ എക്‌സാമിനറുടെ അന്തിമ റിപ്പോര്‍ട്ട് കാത്തിരിക്കുകയാണെന്നും സംഭവത്തിലേക്ക് നയിച്ച കാരണം അധികൃതര്‍ പുറത്തുവിട്ടിട്ടില്ലെന്നും വാര്‍ത്ത വ്യക്തമാക്കുന്നു.