ലണ്ടന്‍: ഇംഗ്ലണ്ടില്‍ പ്ലാനിങ് അനുമതിയില്ലാതെ സ്ഥാപിക്കുന്ന ജിപ്‌സി-ട്രാവലര്‍ കാരവാനുകളുടെ എണ്ണം അതിവേഗം വര്‍ധിക്കുന്നു. 2020 ജനുവരിയില്‍ 2,860 ആയിരുന്ന അനുമതിയില്ലാത്ത കാരവാനുകളുടെ എണ്ണം 2026 ജനുവരിയില്‍ 4,950 ആയി ഉയര്‍ന്നു. ആറുവര്‍ഷത്തിനിടെ 73 ശതമാനം വര്‍ധനയാണ് രേഖപ്പെടുത്തിയത്. അനുമതിയുള്ള ട്രാവലര്‍ സൈറ്റുകളുടെ കുറവും പ്ലാനിങ് നിയമലംഘനങ്ങളും ഒരുപോലെ ചര്‍ച്ചയാകുന്നതിനിടെ പ്രാദേശിക കൗണ്‍സിലുകള്‍ കടുത്ത നടപടികളിലേക്കും നീങ്ങുകയാണ്. ബാങ്ക് ഹോളിഡേ വാരാന്ത്യങ്ങള്‍ പോലുള്ള സമയങ്ങളില്‍ കൗണ്‍സില്‍ ഓഫിസുകള്‍ അടഞ്ഞിരിക്കുമ്പോള്‍ ഭൂമിയില്‍ അതിവേഗം കാരവാനുകളും അനുബന്ധ സൗകര്യങ്ങളും സ്ഥാപിക്കുന്ന സംഭവങ്ങള്‍ ഹര്‍ട്ട്‌ഫോര്‍ഡ്ഷയര്‍, എസ്സെക്‌സ്, കാംബ്രിഡ്ജ്ഷയര്‍, ബെഡ്‌ഫോര്‍ഡ്ഷയര്‍ തുടങ്ങിയ മേഖലകളില്‍ റിപ്പോര്‍ട്ട് ചെയ്തിട്ടുണ്ട്. ഇത്തരം സംഭവങ്ങള്‍ വര്‍ധിച്ചതോടെ പ്രദേശവാസികളുടെ പരാതികളും നിയമനടപടികളും ശക്തമായിരിക്കുകയാണ്.

2019 ജൂലൈയില്‍ ഇംഗ്ലണ്ടില്‍ 3,113 അനുമതിയില്ലാത്ത ട്രാവലര്‍ കാരവാനുകളാണ് ഉണ്ടായിരുന്നത്. 2025 ജൂലൈയില്‍ ഇത് 4,471 ആയി ഉയര്‍ന്നു; 44 ശതമാനം വര്‍ധന. ഇതേ കാലയളവില്‍ ആകെ ട്രാവലര്‍ കാരവാനുകളുടെ എണ്ണം 23,636ല്‍ നിന്ന് 28,659 ആയി ഉയര്‍ന്നത് 21 ശതമാനം മാത്രമാണ്. ആകെ കാരവാനുകളുടെ വര്‍ധനയെക്കാള്‍ ഇരട്ടിയിലധികം വേഗത്തിലാണ് അനുമതിയില്ലാത്ത കാരവാനുകളുടെ എണ്ണം കൂടുന്നതെന്നാണ് കണക്കുകള്‍ വ്യക്തമാക്കുന്നത്.

'നിയമം ലംഘിക്കാതെ വഴിയില്ലെന്ന സാഹചര്യം'

കാംബ്രിഡ്ജ്ഷയറിലെ വിസ്‌ബെക്കിന് സമീപം കുടുംബത്തോടൊപ്പം താമസിക്കുന്ന നാഷനല്‍ ട്രാവലേഴ്‌സ് ആക്ഷന്‍ ഗ്രൂപ്പ് സ്ഥാപകനും ചെയര്‍മാനുമായ ക്ലിഫ് കോഡോണ, നിലവിലെ പ്ലാനിങ് സംവിധാനമാണ് പല ട്രാവലര്‍ കുടുംബങ്ങളെയും നിയമലംഘനത്തിലേക്ക് തള്ളിവിടുന്നതെന്ന് ആരോപിക്കുന്നു. 2020ല്‍ ഇപ്പോഴത്തെ സ്ഥലത്തേക്ക് താമസം മാറുമ്പോള്‍ പ്ലാനിങ് അനുമതി ഉണ്ടായിരുന്നില്ലെന്ന് അദ്ദേഹം പറയുന്നു. കൗണ്‍സില്‍ ഓഫിസുകള്‍ അടഞ്ഞിരുന്ന വെള്ളിയാഴ്ച വൈകുന്നേരമാണ് കുടുംബം സ്ഥലത്തെത്തി താമസം ആരംഭിച്ചത്. പിന്നീട് താമസം ആരംഭിച്ചതിനു ശേഷമുള്ള അനുമതിക്കായി അപേക്ഷ നല്‍കി. ജിപ്‌സിയാണെന്ന് തിരിച്ചറിഞ്ഞാല്‍ തന്നെ പ്ലാനിങ് അപേക്ഷകള്‍ക്ക് എതിര്‍പ്പ് ഉയരുന്ന സാഹചര്യമുണ്ടെന്ന് കോഡോണ ആരോപിച്ചു. പ്രദേശം അനുയോജ്യമല്ലെന്ന് പാരിഷ് കൗണ്‍സില്‍ എതിര്‍ത്തെങ്കിലും പിന്നീട് പ്ലാനിങ് കമ്മിറ്റി അദ്ദേഹത്തിന്റെ കുടുംബത്തിന്റെ അപേക്ഷ അംഗീകരിച്ചു.

ജീവിതത്തില്‍ ഏകദേശം 50 തവണ താന്‍ ഒഴിപ്പിക്കപ്പെട്ടിട്ടുണ്ടെന്നും ഓരോ സംഭവവും വലിയ ദുരനുഭവമായിരുന്നെന്നും കോഡോണ പറയുന്നു. സ്വന്തം ഭൂമിയില്‍ താമസിക്കാനും പിന്നീട് അവിടെ തുടരാനുള്ള അനുമതി നേടാനുമായി നിയമം ലംഘിക്കേണ്ടിവന്നിട്ടുണ്ടെന്നും അദ്ദേഹം തുറന്നുപറഞ്ഞു. ട്രാവലര്‍ സമൂഹത്തിന്റെ ജനസംഖ്യ കൂടുന്നതിനനുസരിച്ച് പുതിയ കാരവാനുകള്‍ക്കും സൈറ്റുകള്‍ക്കും ആവശ്യകത വര്‍ധിക്കുന്നുണ്ടെന്നും അദ്ദേഹം ചൂണ്ടിക്കാട്ടുന്നു. മുമ്പ് ട്രാവലര്‍ കുടുംബങ്ങള്‍ക്ക് ഭൂമി വാങ്ങാന്‍ പോലും രഹസ്യ മാര്‍ഗങ്ങള്‍ ആശ്രയിക്കേണ്ടിവന്നിരുന്നെങ്കില്‍ ഓണ്‍ലൈന്‍ ലേലങ്ങളുടെ വ്യാപനം ഇപ്പോള്‍ ഭൂമി സ്വന്തമാക്കുന്നത് എളുപ്പമാക്കിയതായും കോഡോണ പറഞ്ഞു.

ബാസില്‍ഡണില്‍ അനുമതിയില്ലാത്ത കാരവാനുകള്‍ 164% കൂടി

എസ്സെക്‌സിലെ ബാസില്‍ഡണിലാണ് കഴിഞ്ഞ വേനല്‍ക്കാലത്ത് ഇംഗ്ലണ്ടിലെ മറ്റേതൊരു പ്രദേശത്തേക്കാളും കൂടുതല്‍ അനുമതിയില്ലാത്ത കാരവാനുകള്‍ രേഖപ്പെടുത്തിയത്. 2019 ജൂലൈ മുതല്‍ 2025 ജൂലൈ വരെയുള്ള കാലയളവില്‍ ഇവിടെ ഇത്തരം കാരവാനുകളുടെ എണ്ണം 164 ശതമാനം വര്‍ധിച്ചു. നിയമലംഘനങ്ങള്‍ക്കെതിരെ ശക്തമായ നടപടി സ്വീകരിക്കാത്തതിനാല്‍ ബാസില്‍ഡണ്‍ 'സോഫ്റ്റ് ടച്ച്' മേഖലയായി കണക്കാക്കപ്പെടുന്നുവെന്ന് കൗണ്‍സിലിലെ കണ്‍സര്‍വേറ്റീവ് അംഗം ജോര്‍ജ് ജെഫറി ആരോപിച്ചു. പ്ലാനിങ് നിയമങ്ങള്‍ എല്ലാവര്‍ക്കും ഒരുപോലെ ബാധകമാകുന്നില്ലെന്ന തോന്നല്‍ പ്രദേശവാസികള്‍ക്കിടയിലുണ്ടെന്നും അദ്ദേഹം പറഞ്ഞു. എന്നാല്‍ ജിപ്‌സി-ട്രാവലര്‍ സമൂഹത്തെ ലക്ഷ്യമിടുന്നതല്ല തന്റെ നിലപാടെന്നും അനുമതിയില്ലാത്ത എല്ലാ വികസനങ്ങള്‍ക്കും ഒരേ നിയമം ബാധകമാകണമെന്നാണ് ആവശ്യപ്പെടുന്നതെന്നും ജെഫറി വ്യക്തമാക്കി. വിക്ക്‌ഫോര്‍ഡിലെ ന്യൂലാന്‍ഡ്‌സ് റോഡിന്റെ അറ്റത്തുള്ള കാരവാന്‍ സൈറ്റിനെച്ചൊല്ലിയാണ് നിലവില്‍ പ്രധാന തര്‍ക്കം. ആദ്യം ഒരു സ്റ്റാറ്റിക് കാരവാനും ഒരു ടൂറിങ് കാരവാനും മാത്രമാണ് ഇവിടെ അനുവദിച്ചിരുന്നത്. എന്നാല്‍ 2018നും 2022നും ഇടയില്‍ കൂടുതല്‍ കാരവാനുകളും അനുബന്ധ നിര്‍മാണങ്ങളും സ്ഥാപിച്ചു.

കൗണ്‍സില്‍ എന്‍ഫോഴ്‌സ്‌മെന്റ് നോട്ടിസുകള്‍ നല്‍കിയതിനെത്തുടര്‍ന്ന് വിഷയം പബ്ലിക് ഇന്‍ക്വയറിയിലെത്തി. അഞ്ച് കാരവാനുകള്‍ രണ്ട് പ്ലോട്ടുകളിലായി തുടരാന്‍ പ്ലാനിങ് ഇന്‍സ്‌പെക്ടര്‍ അനുമതി നല്‍കിയെങ്കിലും മറ്റ് കാരവാനുകളും ഹാര്‍ഡ്സ്റ്റാന്‍ഡിങ്ങും റോഡിന്റെ ഒരു ഭാഗവും നീക്കാന്‍ 16 മാസം സമയം അനുവദിച്ചു. എന്നാല്‍ 2025 ജൂലൈയില്‍ സമയപരിധി അവസാനിച്ചിട്ടും ഒരു ഡസനിലധികം കാരവാനുകളും മറ്റ് സൗകര്യങ്ങളും അവിടെ തുടരുന്നതായാണ് റിപ്പോര്‍ട്ട്. കാരവാന്‍ സൈറ്റുമായി ബന്ധപ്പെട്ട പ്രശ്‌നങ്ങള്‍ കാരണം വീടുകള്‍ വില്‍ക്കാന്‍ പോലും കഴിയുന്നില്ലെന്ന് പ്രദേശവാസികള്‍ പരാതിപ്പെടുന്നു. സൈറ്റില്‍ തീപിടിത്തങ്ങള്‍ ഉണ്ടായതായും മാസങ്ങളോളം വൈദ്യുത ജനറേറ്ററുകളുടെ നിരന്തര ശബ്ദം ബുദ്ധിമുട്ടുണ്ടാക്കിയതായും പരാതികളുണ്ട്.

'ഒഴിപ്പിച്ചാല്‍ അവര്‍ എങ്ങോട്ടുപോകും?'

അതേസമയം, പ്രശ്‌നത്തിന് മറ്റൊരു വശമുണ്ടെന്ന് സൈറ്റിലെ താമസക്കാരില്‍ ഒരാളെ പ്രതിനിധീകരിച്ച പ്ലാനിങ് കണ്‍സള്‍ട്ടന്റ് മാത്യു ഗ്രീന്‍ ചൂണ്ടിക്കാട്ടുന്നു. നിയമലംഘനം തുടര്‍ന്നാല്‍ കോടതി ഉത്തരവിലൂടെ ആളുകളെ ഒഴിപ്പിക്കാന്‍ കൗണ്‍സിലിന് സാധിക്കും. എന്നാല്‍ ഒഴിപ്പിക്കപ്പെട്ട കുടുംബങ്ങള്‍ പിന്നീട് എവിടെ താമസിക്കുമെന്നതാണ് പ്രധാന പ്രശ്‌നമെന്ന് അദ്ദേഹം പറയുന്നു. ജിപ്‌സി-ട്രാവലര്‍ കുടുംബങ്ങളുടെ ആവശ്യത്തിന് അനുസരിച്ച് മതിയായ നിയമാനുസൃത സൈറ്റുകള്‍ കണ്ടെത്തേണ്ടത് പ്രാദേശിക കൗണ്‍സിലുകളുടെ ഉത്തരവാദിത്തമാണെന്നും അദ്ദേഹം വാദിക്കുന്നു. ബാസില്‍ഡണ്‍ കൗണ്‍സിലിന്റെ റിപ്പോര്‍ട്ടിലും അനുയോജ്യവും പ്രായോഗികവുമായ ജിപ്‌സി-ട്രാവലര്‍ സൈറ്റുകളുടെ ലഭ്യതയില്‍ കുറവുണ്ടെന്ന് ചൂണ്ടിക്കാട്ടിയിട്ടുണ്ട്. 2042ഓടെ ബാസില്‍ഡണില്‍ 302 ജിപ്‌സി-ട്രാവലര്‍ കുടുംബങ്ങള്‍ക്ക് താമസിക്കാവുന്ന സൈറ്റുകള്‍ ആവശ്യമായി വരുമെന്നാണ് 2024ലെ പഠനം വ്യക്തമാക്കുന്നത്. എന്നാല്‍ 2023 ഏപ്രില്‍ മുതല്‍ 2026 ഫെബ്രുവരി വരെ 31 പുതിയ പിച്ചുകള്‍ക്ക് മാത്രമാണ് അനുമതി ലഭിച്ചത്.

അനുമതിയില്ലാത്ത വികസനം അംഗീകരിക്കില്ലെന്ന് സര്‍ക്കാര്‍

പ്ലാനിങ് അനുമതിയില്ലാത്ത വികസനം അംഗീകരിക്കാനാകില്ലെന്നാണ് സര്‍ക്കാര്‍ നിലപാട്. അതേസമയം ജിപ്‌സി-ട്രാവലര്‍ സമൂഹങ്ങള്‍ക്ക് സുരക്ഷിതവും അനുയോജ്യവുമായ താമസസ്ഥലങ്ങള്‍ ലഭ്യമാക്കേണ്ടതുണ്ടെന്നും ഓരോ മേഖലയിലെയും ആവശ്യത്തിന് അനുസരിച്ച് സൈറ്റുകള്‍ ഉറപ്പാക്കേണ്ട ഉത്തരവാദിത്തം കൗണ്‍സിലുകള്‍ക്കുണ്ടെന്നും സര്‍ക്കാര്‍ വ്യക്തമാക്കി. അനുമതിയില്ലാത്ത വികസനത്തിനെതിരെ നടപടി സ്വീകരിക്കാന്‍ കൗണ്‍സിലുകള്‍ക്ക് ശക്തമായ അധികാരങ്ങളുണ്ടെന്നും ആവശ്യമെങ്കില്‍ പൊലീസിന്റെ സഹായം തേടാനും കോടതിയെ സമീപിക്കാനും കഴിയുമെന്നും സര്‍ക്കാര്‍ അറിയിച്ചു. മനഃപൂര്‍വം പ്ലാനിങ് അനുമതിയില്ലാതെ നടത്തുന്ന വികസനങ്ങളെ സംബന്ധിച്ച ദേശീയ പ്ലാനിങ് നയങ്ങള്‍ കൂടുതല്‍ കര്‍ശനമാക്കുന്നതും പരിഗണനയിലാണ്.

അതേസമയം, ആദ്യം അനുമതിയില്ലാതെ സൈറ്റ് വികസിപ്പിച്ച് പിന്നീട് പ്ലാനിങ് അനുമതി തേടുന്നത് അപേക്ഷ അംഗീകരിക്കപ്പെടാനുള്ള സാധ്യത തന്നെ കുറയ്ക്കുമെന്ന് മാത്യു ഗ്രീന്‍ മുന്നറിയിപ്പ് നല്‍കി. നിയമലംഘനത്തിലൂടെ സൈറ്റ് ഒരുക്കുന്നത് ട്രാവലര്‍ കുടുംബങ്ങളുടെ താമസപ്രശ്‌നത്തിന് ദീര്‍ഘകാല പരിഹാരമല്ലെന്നും അദ്ദേഹം പറഞ്ഞു. നിയമം ലംഘിക്കാനോ മറ്റുള്ളവരോട് കള്ളം പറയാനോ തങ്ങള്‍ ആഗ്രഹിക്കുന്നില്ലെന്നാണ് കോഡോണയുടെ പ്രതികരണം. സ്വന്തം ഭൂമിയില്‍ താമസിക്കാന്‍ കഴിയുന്നതിനായി വര്‍ഷങ്ങളോളം നിയമപോരാട്ടം നടത്തേണ്ടിവരാത്ത സാഹചര്യമാണു വേണ്ടതെന്നും അദ്ദേഹം പറയുന്നു. ഇതോടെ ഇംഗ്ലണ്ടിലെ ട്രാവലര്‍ സൈറ്റുകളെച്ചൊല്ലിയുള്ള വിവാദം അനുമതിയില്ലാത്ത വികസനങ്ങള്‍ തടയുന്നതില്‍ മാത്രം ഒതുങ്ങുന്നില്ല. ട്രാവലര്‍ കുടുംബങ്ങള്‍ക്ക് നിയമാനുസൃതമായി താമസിക്കാന്‍ ആവശ്യമായത്ര സൈറ്റുകള്‍ രാജ്യത്ത് ലഭ്യമാണോ എന്ന ചോദ്യവും കൂടുതല്‍ ശക്തമായി ഉയരുകയാണ്.