ജമ്മു-കശ്മീരില്‍ അന്താരാഷ്ട്ര ചലച്ചിത്രമേളയുടെ (JKIFF) ആദ്യ പതിപ്പ് ആരംഭിക്കുന്നു. ഇതുവരെ ഏകദേശം 50 രാജ്യങ്ങളില്‍ നിന്നായി 875 ചിത്രങ്ങളാണ് മേളയ്ക്കായി സമര്‍പ്പിക്കപ്പെട്ടത്.
ജമ്മു-കശ്മീര്‍ സര്‍ക്കാരിന്റെ ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍സ് വകുപ്പ് ദേശീയ ചലച്ചിത്ര വികസന കോര്‍പ്പറേഷനുമായി സഹകരിച്ചാണ് ചലച്ചിത്രമേള സംഘടിപ്പിക്കുന്നത്. അന്താരാഷ്ട്ര സിനിമയുടെയും ചലച്ചിത്ര നിര്‍മാണത്തിന്റെയും വളര്‍ന്നുവരുന്ന കേന്ദ്രമായി ജമ്മു-കശ്മീരിന്റെ സ്ഥാനം കൂടുതല്‍ ശക്തിപ്പെടുത്തുക എന്നതാണ് മേളയുടെ ലക്ഷ്യം.

മേളയോടുള്ള ആഗോളതലത്തിലുള്ള വര്‍ധിച്ചുവരുന്ന താല്‍പ്പര്യത്തിന്റെ പ്രതിഫലനമാണ് വിവിധ രാജ്യങ്ങളില്‍ നിന്ന് ലഭിച്ച ചിത്രങ്ങളെന്ന് അധികൃതര്‍ അറിയിച്ചു. ഏകദേശം 50 രാജ്യങ്ങളില്‍ നിന്നുള്ള എന്‍ട്രികള്‍ ലഭിച്ചതിലൂടെ വ്യത്യസ്ത കഥപറച്ചില്‍ രീതികളും കലാപരമായ കാഴ്ചപ്പാടുകളും ചലച്ചിത്ര നിര്‍മാണ ശൈലികളും ഒരേ വേദിയില്‍ അവതരിപ്പിക്കപ്പെടുമെന്നും അവര്‍ വ്യക്തമാക്കി.