ലണ്ടന്‍: അടച്ചുപൂട്ടുന്ന പബ്ബുകള്‍ വീടുകളോ ഓഫിസുകളോ മറ്റ് ആവശ്യങ്ങള്‍ക്കുള്ള കെട്ടിടങ്ങളോ ആക്കി മാറ്റുന്നത് ഇനി ഇംഗ്ലണ്ടില്‍ അത്ര എളുപ്പമാകില്ല. രാജ്യത്തെ പബ്ബുകള്‍ സംരക്ഷിക്കുന്നതിനായി പ്ലാനിങ് നിയമങ്ങളില്‍ കൂടുതല്‍ നിയന്ത്രണങ്ങള്‍ കൊണ്ടുവരാന്‍ സര്‍ക്കാര്‍ തീരുമാനിച്ചു. തിങ്കളാഴ്ച മുതല്‍ പ്രാബല്യത്തില്‍ വരുന്ന പുതുക്കിയ ദേശീയ പ്ലാനിങ് പോളിസി ഫ്രെയിംവര്‍ക്കിന്റെ (എന്‍പിപിഎഫ്) ഭാഗമായാണ് പുതിയ വ്യവസ്ഥകള്‍. പ്രാദേശിക സമൂഹങ്ങളുടെ പ്രധാന കൂടിച്ചേരല്‍ കേന്ദ്രങ്ങളായ പബ്ബുകള്‍ അടച്ചുപൂട്ടപ്പെടുന്നത് തടയുന്നതിനൊപ്പം രാജ്യത്തെ ഭവനനിര്‍മാണം വേഗത്തിലാക്കാനുള്ള നടപടികളും പുതിയ പ്ലാനിങ് നയത്തില്‍ ഉള്‍പ്പെടുത്തിയിട്ടുണ്ട്.

പബ് നിലനിര്‍ത്താനാകില്ലെന്ന് തെളിയിക്കണം

ഒരു പബ് മറ്റൊരു ആവശ്യത്തിനായി മാറ്റാന്‍ അനുമതി തേടുന്ന ഡെവലപ്പര്‍മാര്‍, നിലവിലെ സാഹചര്യത്തില്‍ പബ് ബിസിനസ് തുടരാന്‍ ന്യായമായ സാധ്യതയില്ലെന്ന് തെളിയിക്കേണ്ടിവരും. ഇതിനൊപ്പം പബ് കുറഞ്ഞത് 12 മാസമെങ്കിലും തുറന്ന വിപണിയില്‍ വില്‍പനയ്ക്ക് വച്ചിരുന്നുവെന്നതിന്റെ തെളിവും സമര്‍പ്പിക്കണം. പബ് അടച്ചുപൂട്ടുന്നതിന് മുമ്പ് ഉടമകള്‍ മനഃപൂര്‍വം വ്യാപാരം തകര്‍ക്കുകയോ ഉപഭോക്താക്കളെ അകറ്റുന്ന നടപടികള്‍ സ്വീകരിക്കുകയോ ചെയ്ത് പിന്നീട് കെട്ടിടത്തിന്റെ ഉപയോഗം മാറ്റാന്‍ ശ്രമിക്കുന്ന സാഹചര്യം തടയുകയാണ് പുതിയ ചട്ടങ്ങളുടെ ലക്ഷ്യം. വര്‍ഷങ്ങളായി വിജയകരമായി പ്രവര്‍ത്തിച്ചിരുന്ന പബ്ബുകള്‍ ഇത്തരം നടപടികളിലൂടെ നഷ്ടപ്പെടാതിരിക്കാനും സര്‍ക്കാര്‍ ശ്രമിക്കുന്നു. ഒരു പബ് മറ്റൊരു ആവശ്യത്തിലേക്ക് മാറ്റുന്നത് പ്രദേശത്തെ സമൂഹത്തെ എങ്ങനെ ബാധിക്കുമെന്നും ലോക്കല്‍ കൗണ്‍സിലുകള്‍ പരിശോധിക്കണം. നേരത്തെയുള്ള നിര്‍ദേശങ്ങളില്‍ ഒരു പ്രദേശത്തെ അവസാനത്തെ പബ്ബിന് മാത്രമായിരുന്നു പ്രത്യേക സംരക്ഷണം പരിഗണിച്ചിരുന്നത്. എന്നാല്‍ പുതുക്കിയ നയത്തില്‍ ഈ സംരക്ഷണം കൂടുതല്‍ പബ്ബുകളിലേക്ക് വ്യാപിപ്പിക്കുകയാണ്.

പബ്ബുകളുടെ പ്രതിസന്ധിക്ക് കാരണം നികുതിയും ചെലവും

അതേസമയം, പബ്ബുകള്‍ അടച്ചുപൂട്ടുന്നതിന്റെ പ്രധാന കാരണം പ്ലാനിങ് നിയമങ്ങളല്ലെന്നും ഉയര്‍ന്ന നികുതിയും തൊഴില്‍ ചെലവുകളും ഉള്‍പ്പെടെയുള്ള സാമ്പത്തിക സമ്മര്‍ദങ്ങളാണെന്നും ഹോസ്പിറ്റാലിറ്റി മേഖല ചൂണ്ടിക്കാട്ടുന്നു. വാറ്റ്, ബിസിനസ് റേറ്റ്‌സ് തുടങ്ങിയ ചെലവുകള്‍ ഉയര്‍ന്നതോടെ പബ്ബുകളും റസ്റ്ററന്റുകളും ഹോട്ടലുകളും ലാഭകരമായി നടത്തുന്നത് കൂടുതല്‍ ബുദ്ധിമുട്ടായതായി വ്യവസായ സംഘടനകള്‍ പറയുന്നു. ഒരു പബ് ഫ്‌ലാറ്റുകളാക്കി മാറ്റുന്നത് നിയമത്തിലൂടെ തടയാന്‍ കഴിയുമെങ്കിലും ലാഭമില്ലാത്ത ഒരു ബിസിനസ് നിര്‍ബന്ധിച്ച് പ്രവര്‍ത്തിപ്പിക്കാന്‍ പ്ലാനിങ് നിയമങ്ങള്‍കൊണ്ട് മാത്രം സാധിക്കില്ലെന്നാണ് മേഖലയിലെ പ്രതിനിധികളുടെ നിലപാട്. ഇംഗ്ലണ്ടിലെ പബ്ബുകള്‍, സോഷ്യല്‍ ക്ലബുകള്‍, ലൈവ് മ്യൂസിക് വേദികള്‍ എന്നിവയ്ക്ക് ബിസിനസ് റേറ്റ്‌സില്‍ 20 ശതമാനം കുറവ് നല്‍കുമെന്ന് ലേബര്‍ സര്‍ക്കാര്‍ ജൂലൈയില്‍ പ്രഖ്യാപിച്ചിരുന്നു. നേരത്തെ പ്രഖ്യാപിച്ച മറ്റ് ബിസിനസ് റേറ്റ്‌സ് ഇളവുകള്‍ക്ക് പുറമേയാണിത്.

റെയില്‍വേ സ്റ്റേഷനുകള്‍ക്ക് സമീപം കൂടുതല്‍ വീടുകള്‍

പുതിയ എന്‍പിപിഎഫ് പബ്ബുകളുടെ സംരക്ഷണത്തില്‍ മാത്രം ഒതുങ്ങുന്നില്ല. ഇംഗ്ലണ്ടിലെ റെയില്‍വേ സ്റ്റേഷനുകള്‍ക്ക് സമീപം പുതിയ വീടുകള്‍ നിര്‍മിക്കുന്നതിന് അനുമതി നല്‍കുന്ന നടപടികള്‍ വേഗത്തിലാക്കാനും പുതിയ നയത്തില്‍ വ്യവസ്ഥകളുണ്ട്. മികച്ച പൊതുഗതാഗത സൗകര്യമുള്ള പ്രദേശങ്ങളില്‍ ആയിരക്കണക്കിന് പുതിയ വീടുകള്‍ നിര്‍മിച്ച് ജനങ്ങള്‍ക്ക് ജോലി സ്ഥലങ്ങള്‍, സ്‌കൂളുകള്‍, മറ്റ് അവശ്യ സേവനങ്ങള്‍ എന്നിവയ്ക്ക് സമീപം താമസിക്കാനുള്ള അവസരം നല്‍കുകയാണ് പദ്ധതിയുടെ ലക്ഷ്യം.

ലക്ഷ്യം 2029ഓടെ 15 ലക്ഷം വീടുകള്‍

2029ഓടെ ഇംഗ്ലണ്ടില്‍ 15 ലക്ഷം പുതിയ വീടുകള്‍ നിര്‍മിക്കുകയാണ് ലേബര്‍ സര്‍ക്കാരിന്റെ പ്രധാന ലക്ഷ്യങ്ങളിലൊന്ന്. ഔദ്യോഗിക കണക്കുകള്‍ പ്രകാരം 2024 ജൂലൈയില്‍ സര്‍ക്കാര്‍ അധികാരത്തിലെത്തിയതിന് ശേഷം ഇതുവരെ ഏകദേശം 3.92 ലക്ഷം വീടുകള്‍ നിര്‍മിച്ചിട്ടുണ്ട്. എന്നാല്‍ നിലവിലെ വേഗത്തില്‍ മുന്നോട്ടുപോയാല്‍ 15 ലക്ഷം വീടുകളുടെ ലക്ഷ്യം കൈവരിക്കാന്‍ സര്‍ക്കാരിന് കഴിയില്ലെന്നാണ് പ്രതിപക്ഷ കണ്‍സര്‍വേറ്റീവുകളുടെ വിമര്‍ശനം. ഉയര്‍ന്ന നികുതിയും അമിതമായ നിയന്ത്രണങ്ങളും വീടുനിര്‍മാണ മേഖലയെ പിന്നോട്ടടിക്കുകയാണെന്നും സര്‍ക്കാര്‍ ലക്ഷ്യത്തില്‍നിന്ന് ഏറെ പിന്നിലാണെന്നും ഷാഡോ ഹൗസിങ് സെക്രട്ടറി സര്‍ ജെയിംസ് ക്ലെവര്‍ലി ആരോപിച്ചു. പബ്ബുകള്‍ പോലുള്ള പ്രാദേശിക സമൂഹങ്ങളുടെ പരമ്പരാഗത കേന്ദ്രങ്ങളെ സംരക്ഷിക്കുന്നതിനൊപ്പം ഭവനക്ഷാമത്തിന് പരിഹാരം കണ്ടെത്താനുള്ള ശ്രമവും ഒരേസമയം മുന്നോട്ടുകൊണ്ടുപോകുന്നതാണ് ഇംഗ്ലണ്ടിലെ പുതുക്കിയ പ്ലാനിങ് നയത്തിന്റെ പ്രധാന ലക്ഷ്യം.