വിഴിഞ്ഞം മുല്ലൂരില് ആഭരണത്തിനായി 71കാരിയായ ശാന്തകുമാരിയെ കൊന്ന് മച്ചില് ഒളിപ്പിച്ച കേസില് അമ്മയും മകനും ഉള്പ്പെടെ മൂന്ന് പ്രതികള്ക്കും വധശിക്ഷ. നെയ്യാറ്റിന്കര അഡീഷണല് സെഷന്സ് കോടതിയുടേതാണ് വിധി. കോവളം സ്വദേശി റഫീഖ ബീവി, റഫീഖയുടെ മകന് ഷഫീക്ക്, റഫീഖയുടെ സുഹൃത്ത് അല് അമീന് എന്നിവര്ക്കാണ് ശിക്ഷ. സ്വര്ണാഭരണത്തിനായി ശാന്തകുമാരിയെ തലയ്ക്കടിച്ചു കൊലപ്പെടുത്തി മൃതദേഹം തട്ടിന്പുറത്ത് ഒളിപ്പിച്ചെന്നാണ് പ്രോസിക്യൂഷന് കേസ്.
2022 ജനുവരി 14 നായിരുന്നു കേസിനാസ്പദമായ സംഭവം. ശാന്തകുമാരിയുടെ അയല്വാസിയായിരുന്നു റഫീഖ ബീവി. കേസിലെ മൂന്നു പ്രതികളും കുറ്റക്കാരാണെന്ന് കഴിഞ്ഞ ദിവസം കോടതി കണ്ടെത്തിയിരുന്നു.
ശാന്തകുമാരിയുടെ വീടിനടുത്ത് വാടകയ്ക്ക് താമസിച്ചിരുന്നവരാണ് കൊല നടത്തിയത്. ഇവര് വാടകവീടൊഴിഞ്ഞ് പോയതിനു പിന്നാലെ വീട്ടുടമയും മകനും വീട്ടിലെത്തി നോക്കിയപ്പോള് മച്ചില് നിന്നു രക്തം പുറത്തേക്കൊഴുകുന്നതു കാണുകയായിരുന്നു. വീട്ടില് താമസിച്ചിരുന്ന റഫീഖ ബീവിയാണ് കൊല്ലപ്പെട്ടതെന്നാണ് ആദ്യം കരുതിയത്. പിന്നീടാണ് ശാന്തകുമാരിയെ കാണാതായെന്നും അവരാണ് കൊല്ലപ്പെട്ടതെന്നും സ്ഥിരീകരിക്കുന്നത്. മച്ചില് ഒളിപ്പിച്ചിരുന്ന മൃതദേഹം മണിക്കൂറുകള് പണിപ്പെട്ടാണ് പൊലീസ് പുറത്തെത്തിച്ചത്. |