മാഞ്ചസ്റ്റര്/ലണ്ടന്: ബ്രിട്ടിഷ് പ്രധാനമന്ത്രി കിയര് സ്റ്റാര്മറുടെ രാജിക്കു പിന്നാലെ ലേബര് പാര്ട്ടിയുടെ നേതൃത്വത്തിലേക്കും പ്രധാനമന്ത്രി പദത്തിലേക്കും മുന്നിലുള്ള നേതാവായി വിലയിരുത്തപ്പെടുന്ന ആന്ഡി ബേണം, മാഞ്ചസ്റ്ററിലെ പീപ്പിള്സ് ഹിസ്റ്ററി മ്യൂസിയത്തില് നടത്തിയ ആദ്യ പ്രധാന നയപ്രസംഗത്തില് ബ്രിട്ടന്റെ ഭരണസംവിധാനത്തെയും സാമ്പത്തിക വികസന മാതൃകയെയും അടിമുടി പുനര്നിര്വചിക്കുന്ന പദ്ധതികള് അവതരിപ്പിച്ചു. അധികാരം ലണ്ടനില് മാത്രം കേന്ദ്രീകരിക്കുന്ന പതിറ്റാണ്ടുകളായുള്ള ഭരണരീതിക്ക് വിരാമമിടുമെന്ന പ്രഖ്യാപനമാണ് പ്രസംഗത്തിന്റെ മുഖ്യ ആകര്ഷണം. പ്രധാനമന്ത്രിയുടെ ഓഫിസായ 'നമ്പര് 10 ഡൗണിങ് സ്ട്രീറ്റിന്റെ' പ്രവര്ത്തനങ്ങളില് പ്രധാനപ്പെട്ട ഒരു വിഭാഗം മാഞ്ചസ്റ്ററിലേക്ക് മാറ്റി 'നമ്പര് 10 നോര്ത്ത്' സ്ഥാപിക്കുമെന്ന് ബേണം പ്രഖ്യാപിച്ചു.
ബ്രിട്ടനിലെ തൊഴിലാളി പ്രസ്ഥാനങ്ങളുടെയും ജനാധിപത്യ പോരാട്ടങ്ങളുടെയും ചരിത്രം ഓര്മിപ്പിക്കുന്ന പീപ്പിള്സ് ഹിസ്റ്ററി മ്യൂസിയം വേദിയായി തിരഞ്ഞെടുത്തത് തന്നെ ബേണത്തിന്റെ രാഷ്ട്രീയ സന്ദേശത്തിന്റെ ഭാഗമായാണ് വിലയിരുത്തപ്പെടുന്നത്. അധികാരം വെസ്റ്റ്മിന്സ്റ്ററില് നിന്ന് രാജ്യത്തിന്റെ വിവിധ ഭാഗങ്ങളിലേക്ക് എത്തിക്കണമെന്ന തന്റെ കാഴ്ചപ്പാടിന്റെ പ്രതീകമായിരുന്നു ഈ വേദി. ഗ്രേറ്റര് മാഞ്ചസ്റ്റര് മേയറായി വര്ഷങ്ങളോളം പ്രവര്ത്തിച്ച അനുഭവം ദേശീയ ഭരണതലത്തിലേക്ക് കൊണ്ടുവരുകയാണ് തന്റെ ലക്ഷ്യമെന്ന് ബേണം വ്യക്തമാക്കി. ലണ്ടനെ മാത്രം ആശ്രയിച്ചുള്ള വികസന മാതൃകയ്ക്ക് പകരം ഓരോ നഗരത്തെയും ഗ്രാമത്തെയും വളര്ച്ചയുടെ കേന്ദ്രങ്ങളാക്കി മാറ്റേണ്ട സമയമാണിതെന്നും രാജ്യത്തിന്റെ സാമ്പത്തിക ഭൂപടം പുനര്രൂപകല്പന ചെയ്യണമെന്നും അദ്ദേഹം പറഞ്ഞു.
ബ്രിട്ടന്റെ ആധുനിക ചരിത്രത്തിലെ ഏറ്റവും വലിയ അധികാര പുനര്വിതരണത്തിനാണ് തുടക്കമിടുന്നതെന്ന് ബേണം പ്രഖ്യാപിച്ചു. സാമ്പത്തികവും ഭരണപരവുമായ അധികാരങ്ങള് വെസ്റ്റ്മിന്സ്റ്ററില് കേന്ദ്രീകരിച്ചിരിക്കുന്ന നിലവിലെ മാതൃക രാജ്യത്തിന്റെ സമതുലിത വളര്ച്ചയെ ബാധിച്ചുവെന്നാണ് അദ്ദേഹത്തിന്റെ നിലപാട്. പ്രാദേശിക ഭരണകൂടങ്ങള്ക്ക് കൂടുതല് സാമ്പത്തിക സ്വാതന്ത്ര്യവും വികസന പദ്ധതികള് തീരുമാനിക്കാനുള്ള അധികാരവും നല്കുമെന്നും ദേശീയ നിക്ഷേപങ്ങളില് മേഖലകള്ക്ക് കൂടുതല് പങ്കാളിത്തം ഉറപ്പാക്കുമെന്നും ബേണം വ്യക്തമാക്കി. 'വളര്ച്ച മുകളില് നിന്ന് നിര്ദേശിക്കപ്പെടേണ്ടതല്ല. ഓരോ നഗരത്തിലും ഗ്രാമത്തിലും ജനങ്ങള് സൃഷ്ടിക്കുന്ന അവസരങ്ങളില് നിന്നാണ് ദേശീയ വളര്ച്ച ഉയര്ന്നുവരേണ്ടത്' എന്നായിരുന്നു അദ്ദേഹത്തിന്റെ സന്ദേശം.
മാഞ്ചസ്റ്ററില് സ്ഥാപിക്കുന്ന 'നമ്പര് 10 നോര്ത്ത്' ഒരു പ്രതീകാത്മക ഓഫിസ് മാത്രമാകില്ലെന്നും ബേണം വ്യക്തമാക്കി. ദേശീയ വികസന പദ്ധതികള്, അടിസ്ഥാനസൗകര്യ വികസനം, ഭവനനിര്മാണം, മേഖലാ നിക്ഷേപങ്ങള്, പ്രാദേശിക ഭരണപരിഷ്കാരങ്ങള് എന്നിവയ്ക്ക് നേതൃത്വം നല്കുന്ന പ്രധാന ഭരണകേന്ദ്രമായിരിക്കും അത്. ലണ്ടനിലെ വൈറ്റ്ഹാളില് ഇരുന്ന് രാജ്യത്തിന്റെ എല്ലാ ഭാഗങ്ങള്ക്കും ഒരേ മാതൃകയില് തീരുമാനങ്ങള് എടുക്കുന്ന കാലം അവസാനിപ്പിക്കാനാണ് ലക്ഷ്യമെന്നും അദ്ദേഹം പറഞ്ഞു. വിപുലമായ പദ്ധതികള് പ്രഖ്യാപിച്ചെങ്കിലും പൊതുസാമ്പത്തിക അച്ചടക്കത്തില് വിട്ടുവീഴ്ച ഉണ്ടാകില്ലെന്ന് ബേണം ഉറപ്പുനല്കി. നിലവിലുള്ള ധനകാര്യ ചട്ടങ്ങള് തുടരുമെന്നും ഉത്തരവാദിത്തമുള്ള പൊതുനിക്ഷേപങ്ങളിലൂടെയായിരിക്കും പുതിയ വികസന മാതൃക നടപ്പാക്കുകയെന്നും അദ്ദേഹം വ്യക്തമാക്കി. സാമ്പത്തിക വിശ്വാസ്യത നഷ്ടപ്പെടുത്തുന്ന നടപടികള് സ്വീകരിക്കില്ലെന്നും സ്ഥിരതയുള്ള പൊതുസാമ്പത്തികമാണ് എല്ലാ പരിഷ്കാരങ്ങളുടെയും അടിത്തറയെന്നും ബേണം പറഞ്ഞു.
രാജ്യം ഗുരുതരമായ ഭവന പ്രതിസന്ധിയിലൂടെയാണ് കടന്നുപോകുന്നതെന്ന് ചൂണ്ടിക്കാട്ടിയ ബേണം, രണ്ടാം ലോകമഹായുദ്ധത്തിനു ശേഷമുള്ള ഏറ്റവും വലിയ കൗണ്സില് ഭവനനിര്മാണ പദ്ധതിക്ക് തുടക്കമിടുമെന്നും പ്രഖ്യാപിച്ചു. ഉയര്ന്ന വാടകയും വീടുകളുടെ ലഭ്യതക്കുറവും കുടുംബങ്ങളുടെയും യുവജനങ്ങളുടെയും ജീവിതനിലവാരത്തെയും രാജ്യത്തിന്റെ സാമ്പത്തിക ഉല്പാദനക്ഷമതയെയും ബാധിക്കുന്നുവെന്ന് അദ്ദേഹം പറഞ്ഞു. സുരക്ഷിതവും ചെലവുകുറഞ്ഞതുമായ ഭവനങ്ങള് ഒരുക്കുന്നത് സാമൂഹിക നീതിയുടെ ഭാഗം മാത്രമല്ല, സാമ്പത്തിക വളര്ച്ചയുടെ അടിസ്ഥാനവുമാണെന്നും അദ്ദേഹം വ്യക്തമാക്കി.
ബ്രിട്ടന്റെ ജീവിതനിലവാരം ഉയര്ത്തുന്നതിനായി പത്ത് വര്ഷം നീളുന്ന ദേശീയ വികസന ദൗത്യത്തിനും ബേണം രൂപം നല്കി. പൊതുസേവനങ്ങളുടെ നവീകരണം, പുനര്വ്യവസായവല്ക്കരണം, നഗര-ഗ്രാമ പുനരുജ്ജീവനം, ശുദ്ധ ഊര്ജ നിക്ഷേപം, ഗതാഗത വികസനം എന്നിവയാണ് പദ്ധതിയുടെ പ്രധാന ലക്ഷ്യങ്ങള്. സര്ക്കാര് മാറുമ്പോഴെല്ലാം നയങ്ങള് മാറുന്ന അവസ്ഥയ്ക്ക് വിരാമമിട്ട് ദീര്ഘകാല വികസന കാഴ്ചപ്പാട് നല്കുകയാണ് ലക്ഷ്യമെന്നും അദ്ദേഹം പറഞ്ഞു.
ഗ്രേറ്റര് മാഞ്ചസ്റ്റര് മേയറായിരുന്ന കാലത്തെ അനുഭവങ്ങള് പങ്കുവച്ച ബേണം, സര്ക്കാര് വകുപ്പുകളില് നിന്ന് പദ്ധതികള്ക്ക് അനുമതി നേടാന് വലിയ ബുദ്ധിമുട്ടുകള് നേരിട്ടതായി പറഞ്ഞു. അമിതമായ കേന്ദ്രീകരണവും ഭരണതലത്തിലെ കാലതാമസവുമാണ് പ്രാദേശിക വികസനത്തെ ഏറ്റവും കൂടുതല് ബാധിച്ചതെന്ന് അദ്ദേഹം വിമര്ശിച്ചു. ഇനി സര്ക്കാരിന്റെ ഓരോ വകുപ്പും രാജ്യത്തിന്റെ എല്ലാ മേഖലകളുടെയും വികസനത്തെ അടിസ്ഥാനമാക്കിയാകും വിലയിരുത്തപ്പെടുകയെന്നും അദ്ദേഹം വ്യക്തമാക്കി.
'ലണ്ടനിലെ വിജയമല്ല, രാജ്യത്തിന്റെ ഓരോ ഭാഗത്തും ജനങ്ങളുടെ ജീവിതത്തില് എത്രമാത്രം മാറ്റം കൊണ്ടുവന്നുവെന്നതാണ് ഇനി സര്ക്കാരിന്റെ വിജയത്തിന്റെ മാനദണ്ഡം' എന്നും ബേണം പറഞ്ഞു.
'മാഞ്ചസ്റ്ററിസം' എന്ന ആശയവും ബേണം വിശദീകരിച്ചു. പരമ്പരാഗത 'ട്രിക്കിള് ഡൗണ്' സാമ്പത്തിക മാതൃകയ്ക്ക് വ്യക്തമായ ബദലാണിതെന്ന് അദ്ദേഹം പറഞ്ഞു. ഓരോ നഗരത്തിനും ഗ്രാമത്തിനും സ്വന്തം സാമ്പത്തിക ഭാവി രൂപപ്പെടുത്താനുള്ള അധികാരമാണ് ഈ ആശയത്തിന്റെ അടിസ്ഥാനം. ലണ്ടന്, മാഞ്ചസ്റ്റര്, ലിവര്പൂള്, ബര്മിങ്ഹം, വ്യവസായ മേഖലകള്, തീരദേശ പട്ടണങ്ങള്, ഗ്രാമപ്രദേശങ്ങള് എന്നിവയെല്ലാം ദേശീയ വളര്ച്ചയുടെ സമാന പങ്കാളികളാകുന്ന മാതൃകയാണ് ബേണം മുന്നോട്ടുവച്ചത്.
വിദ്യാഭ്യാസത്തിലും തൊഴില്രംഗത്തും മാറ്റം വേണമെന്നും ബേണം വ്യക്തമാക്കി. സര്വകലാശാല പ്രവേശനം മാത്രമല്ല വിജയത്തിന്റെ മാനദണ്ഡമെന്ന് അദ്ദേഹം പറഞ്ഞു. സാങ്കേതിക വിദ്യാഭ്യാസം, തൊഴില്പരിശീലനം, അപ്രന്റീസ്ഷിപ്പ് പദ്ധതികള് എന്നിവയ്ക്ക് കൂടുതല് പ്രാധാന്യം നല്കുന്ന പുതിയ വിദ്യാഭ്യാസ സമീപനമാണ് ആവശ്യമെന്നും ഓരോ യുവാവിനും വ്യക്തമായ തൊഴില്പാത ഉറപ്പാക്കുകയാണ് ലക്ഷ്യമെന്നും അദ്ദേഹം വ്യക്തമാക്കി.
ബ്രെക്സിറ്റിന് ശേഷമുള്ള രാഷ്ട്രീയ അസ്ഥിരതയും ജീവിതച്ചെലവിലെ വര്ധനയും ചൂണ്ടിക്കാട്ടി വെസ്റ്റ്മിന്സ്റ്റര് രാഷ്ട്രീയം സാധാരണ ജനങ്ങളുടെ പ്രതീക്ഷകള് നിറവേറ്റുന്നതില് പരാജയപ്പെട്ടുവെന്നും ബേണം വിമര്ശിച്ചു. കുറ്റപ്പെടുത്തല് രാഷ്ട്രീയത്തിനല്ല, സഹകരണ രാഷ്ട്രീയത്തിനാണ് ഇനി ബ്രിട്ടന് ആവശ്യമെന്നും രാജ്യത്തിന് പുതിയ തുടക്കം നല്കുകയാണ് തന്റെ ശ്രമമെന്നും അദ്ദേഹം പറഞ്ഞു.
അതേസമയം, കണ്സര്വേറ്റീവ് പാര്ട്ടി നേതാവ് കെമി ബാഡിനോക്ക് ബേണത്തിന്റെ പ്രഖ്യാപനങ്ങളെ വിമര്ശിച്ചു. പൊതുസമ്മേളനങ്ങളില് പ്രസംഗിക്കുന്നതിന് പകരം പാര്ലമെന്റില് എത്തി എംപിമാരുടെ ചോദ്യങ്ങള്ക്ക് മറുപടി നല്കണമെന്ന് അവര് ആവശ്യപ്പെട്ടു. ബേണത്തിന്റെ ആശയങ്ങള് പുതിയതല്ലെന്നും സാമ്പത്തിക വളര്ച്ചയ്ക്ക് ഊര്ജച്ചെലവ് കുറയ്ക്കല്, നികുതി ഇളവുകള്, നിയന്ത്രണങ്ങള് ലഘൂകരിക്കല്, വ്യവസായങ്ങളെ പ്രോത്സാഹിപ്പിക്കല് എന്നിവയ്ക്കാണ് മുന്ഗണന നല്കേണ്ടതെന്നും കെമി ബാഡിനോക്ക് പറഞ്ഞു.
ലേബര് പാര്ട്ടി നേതൃത്വ മത്സരത്തില് മറ്റൊരു ശക്തമായ സ്ഥാനാര്ഥി രംഗത്തെത്തുന്നില്ലെങ്കില് ജൂലൈയില് ആന്ഡി ബേണം പാര്ട്ടി നേതാവായി തിരഞ്ഞെടുക്കപ്പെടുകയും തുടര്ന്ന് ബ്രിട്ടന്റെ അടുത്ത പ്രധാനമന്ത്രിയായി ചുമതലയേല്ക്കുകയും ചെയ്യുമെന്നാണ് വെസ്റ്റ്മിന്സ്റ്റര് രാഷ്ട്രീയവൃത്തങ്ങളുടെ വിലയിരുത്തല്.
മാഞ്ചസ്റ്ററിലെ പീപ്പിള്സ് ഹിസ്റ്ററി മ്യൂസിയത്തില് നിന്ന് പ്രഖ്യാപിച്ച ഈ നയരേഖ, ലേബര് പാര്ട്ടിയുടെ അടുത്ത ഘട്ട രാഷ്ട്രീയ നിലപാടുകളുടെ അടിത്തറയാകുമെന്നാണ് നിരീക്ഷകര് വിലയിരുത്തുന്നത്. അധികാര വികേന്ദ്രീകരണം, പ്രാദേശിക സാമ്പത്തിക വളര്ച്ച, ദീര്ഘകാല ദേശീയ വികസനം എന്നീ മൂന്ന് തൂണുകളെ അടിസ്ഥാനമാക്കിയുള്ള ബേണത്തിന്റെ കാഴ്ചപ്പാട് ബ്രിട്ടന്റെ ഭരണസംവിധാനത്തില് പുതിയ രാഷ്ട്രീയ സംവാദങ്ങള്ക്ക് തുടക്കമിടുമോ എന്നതാണ് ഇനി ശ്രദ്ധേയമാകുന്നത്.
