|
ടെലിഗ്രാം മെസ്സേജിങ് പ്ലാറ്റ്ഫോമിന് ഏര്പ്പെടുത്തിയ താല്ക്കാലിക നിയന്ത്രണങ്ങളില് ഉടനടി ഇളവ് നല്കാന് ഡല്ഹി ഹൈക്കോടതി ബുധനാഴ്ച വിസമ്മതിച്ചു. ജൂണ് 21-ന് നടക്കാനിരിക്കുന്ന നീറ്റ്-യുജി പുനഃപരീക്ഷയ്ക്ക് മുന്നോടിയായാണ് നിയന്ത്രണം.
ജസ്റ്റിസ് തേജസ് കരിയയുടെ അവധിക്കാല ബെഞ്ചിന് മുന്നിലാണ് ഈ വിഷയം അടിയന്തരമായി വാദം കേള്ക്കുന്നതിനായി എത്തിയത്. കേസില് മറുപടി സത്യവാങ്മൂലം സമര്പ്പിക്കാന് കേന്ദ്ര സര്ക്കാര് സമയം ആവശ്യപ്പെട്ടതിനെ തുടര്ന്ന്, കേസ് വ്യാഴാഴ്ച ഉച്ചയ്ക്ക് ശേഷം വീണ്ടും പരിഗണിക്കാന് കോടതി മാറ്റിവെച്ചു.
സര്ക്കാര് നടപടിയിലൂടെ രാജ്യത്തെ 15 കോടിയിലധികം ഉപയോക്താക്കളെയാണ് ബാധിച്ചിരിക്കുന്നതെന്ന് ടെലിഗ്രാമിന് വേണ്ടി ഹാജരായ അഭിഭാഷകന് കോടതിയെ അറിയിച്ചു. പ്ലാറ്റ്ഫോം ബ്ലോക്ക് ചെയ്തുകൊണ്ടുള്ള ഉത്തരവ് ഏകപക്ഷീയമാണെന്നും കൃത്യമായ കാരണങ്ങളില്ലാതെയുള്ളതാണെന്നും ടെലിഗ്രാം വാദിച്ചു. |
