ലണ്ടന്‍: ദുബായില്‍ കാമുകനെ കുത്തിക്കൊലപ്പെടുത്തിയെന്ന കേസില്‍ ബ്രിട്ടിഷ് ടിക്ടോക്ക് ഇന്‍ഫ്‌ലുവന്‍സറായ ബ്രൂക്ക് ജോര്‍ജ് അറസ്റ്റില്‍. ഇംഗ്ലണ്ടിലെ കെന്റ് സ്വദേശിനിയായ 23-കാരിക്കെതിരെ മുന്‍കൂട്ടി ആസൂത്രണം ചെയ്ത കൊലപാതകക്കുറ്റം ചുമത്തിയതായാണ് റിപ്പോര്‍ട്ട്. കുറ്റം തെളിഞ്ഞാല്‍ യുഎഇ നിയമപ്രകാരം വധശിക്ഷ വരെ ലഭിക്കാനിടയുണ്ടെന്ന് വിദേശികളായ തടവുകാര്‍ക്ക് നിയമസഹായം നല്‍കുന്ന സംഘടനയായ 'Detained in Dubai' അറിയിച്ചു. എന്നാല്‍ ജീവന്‍ രക്ഷിക്കാനുള്ള സ്വയംപ്രതിരോധത്തിന്റെ ഭാഗമായാണ് കത്തി ഉപയോഗിച്ചതെന്നാണ് ബ്രൂക്കിന്റെ വാദം.

ഓണ്‍ലൈനിലൂടെ പരിചയപ്പെട്ട യുവാവ്

സമൂഹമാധ്യമത്തിലൂടെ പരിചയപ്പെട്ട 26-കാരനെ സന്ദര്‍ശിക്കുന്നതിനായാണ് ബ്രൂക്ക് ദുബായിലെത്തിയതെന്നാണ് സംഘടന വ്യക്തമാക്കുന്നത്. ആദ്യ സന്ദര്‍ശനം സന്തോഷകരമായിരുന്നെങ്കിലും രണ്ടാംതവണ ദുബായിലെത്തിയപ്പോള്‍ യുവാവിന്റെ പെരുമാറ്റത്തില്‍ മാറ്റമുണ്ടായതായി ബ്രൂക്ക് ആരോപിച്ചു. യുവാവ് നിയന്ത്രണസ്വഭാവവും അക്രമപരമായ പെരുമാറ്റവും പ്രകടിപ്പിച്ചതായും തന്റെ പാസ്പോര്‍ട്ട് പിടിച്ചുവച്ചതായും പലതവണ മര്‍ദിച്ചതായും ബ്രൂക്ക് പറഞ്ഞതായി സംഘടനയുടെ മേധാവി രാധ സ്റ്റര്‍ലിങ് അറിയിച്ചു. സംഭവദിവസം വീണ്ടും ആക്രമിക്കപ്പെട്ടപ്പോള്‍ ജീവന്‍ അപകടത്തിലാണെന്ന് തോന്നിയതിനെത്തുടര്‍ന്ന് സമീപത്തുണ്ടായിരുന്ന അടുക്കളക്കത്തി ഉപയോഗിക്കുകയായിരുന്നുവെന്നാണ് ബ്രൂക്കിന്റെ വിശദീകരണം. യുവാവിനെ കൊലപ്പെടുത്താന്‍ മുന്‍കൂട്ടി പദ്ധതിയിട്ടിരുന്നില്ലെന്നും ജീവന്‍ രക്ഷിക്കുക മാത്രമായിരുന്നു ലക്ഷ്യമെന്നും അവര്‍ വാദിക്കുന്നു.

ജൂണ്‍ 22ന് അറസ്റ്റ്

2026 ജൂണ്‍ 22നാണ് ബ്രൂക്കിനെ അറസ്റ്റ് ചെയ്തത്. നിലവില്‍ ബര്‍ ദുബായ് പൊലീസ് സ്റ്റേഷനില്‍ കസ്റ്റഡിയിലാണെന്നാണ് റിപ്പോര്‍ട്ട്. കേസിന്റെ അന്വേഷണം പുരോഗമിക്കുകയാണ്. ബ്രൂക്കിനെതിരായ കുറ്റം കോടതിയില്‍ ഇതുവരെ തെളിയിക്കപ്പെട്ടിട്ടില്ല. അവരുടെ സ്വയംപ്രതിരോധവാദവും ഗാര്‍ഹികപീഡന ആരോപണങ്ങളും സമഗ്രമായി അന്വേഷിക്കണമെന്ന് 'Detained in Dubai' ആവശ്യപ്പെട്ടു.

'മകള്‍ അതീവ ഭയന്നിരുന്നു' രണ്ടാംതവണ ദുബായിലെത്തിയശേഷം മകളുടെ പെരുമാറ്റത്തില്‍ വലിയ മാറ്റമുണ്ടായതായി ബ്രൂക്കിന്റെ അമ്മ തെരേസ ജോര്‍ജ് പറഞ്ഞു. സംഭവത്തിനു തൊട്ടുമുമ്പ് മകള്‍ പതിവുപോലെ സംസാരിച്ചിരുന്നില്ലെന്നും പിന്നീട് ഫോണില്‍ സംസാരിച്ചപ്പോള്‍ നിയന്ത്രണംവിട്ട് കരയുകയായിരുന്നുവെന്നും അവര്‍ വ്യക്തമാക്കി. മകള്‍ അതീവ ഭയപ്പെട്ടിരുന്നുവെന്നും എങ്ങനെയെങ്കിലും ദുബായില്‍നിന്ന് നാട്ടിലേക്കു മടങ്ങണമെന്ന ആഗ്രഹം മാത്രമായിരുന്നു അവള്‍ക്കുണ്ടായിരുന്നതെന്നും തെരേസ പറഞ്ഞു. സംഭവത്തിനുശേഷം ബ്രൂക്കിന്റെ ശരീരത്തില്‍ പരുക്കുകളുടെ അടയാളങ്ങളുണ്ടായിരുന്നുവെന്നും കുടുംബം അവകാശപ്പെട്ടു.

കസ്റ്റഡിയില്‍ അപമാനകരമായ പരിശോധനയെന്ന് ആരോപണം

അറസ്റ്റിനു പിന്നാലെ ബര്‍ ദുബായ് പൊലീസ് സ്റ്റേഷനില്‍ പുരുഷ ഉദ്യോഗസ്ഥരുടെ സാന്നിധ്യത്തില്‍ വസ്ത്രം അഴിക്കാന്‍ നിര്‍ബന്ധിച്ചതായി ബ്രൂക്ക് ആരോപിച്ചുവെന്ന് റിപ്പോര്‍ട്ടുണ്ട്. പരിശോധനയ്ക്കിടെ വനിതാ പൊലീസ് ഉദ്യോഗസ്ഥര്‍ ഉണ്ടായിരുന്നില്ലെന്നും 'Detained in Dubai' ആരോപിച്ചു. അഭിഭാഷകന്റെ സഹായം നിഷേധിച്ചതായും ബ്രിട്ടിഷ് എംബസിയുമായി ബന്ധപ്പെടാന്‍ അനുവദിച്ചില്ലെന്നും നിയമോപദേശകന്റെ സാന്നിധ്യമില്ലാതെ മൊഴിയെടുത്തതായും സംഘടന ആരോപിക്കുന്നു. എന്നാല്‍ ഈ ആരോപണങ്ങളോട് ദുബായ് പൊലീസ് ഔദ്യോഗികമായി പ്രതികരിച്ചതായി വിവരമില്ല.

ജാമ്യവും നിയമസഹായവും ആവശ്യപ്പെട്ടു

ബ്രൂക്കിന് ജാമ്യം അനുവദിക്കണമെന്നും മതിയായ ചികിത്സ, സ്വതന്ത്രമായ നിയമസഹായം, ബ്രിട്ടിഷ് കോണ്‍സുലര്‍ പിന്തുണ എന്നിവ അടിയന്തരമായി ഉറപ്പാക്കണമെന്നും 'Detained in Dubai' ആവശ്യപ്പെട്ടു. മരണപ്പെട്ട യുവാവിനെക്കുറിച്ചും സംഭവത്തിലേക്കു നയിച്ച സാഹചര്യങ്ങളെക്കുറിച്ചും ബ്രൂക്ക് ഉന്നയിച്ച പീഡന ആരോപണങ്ങളെക്കുറിച്ചും നിഷ്പക്ഷവും സമഗ്രവുമായ അന്വേഷണം നടത്തണമെന്നും സംഘടന ആവശ്യപ്പെട്ടു. യുഎഇയില്‍ തടവില്‍ കഴിയുന്ന ബ്രിട്ടിഷ് പൗരയ്ക്കും അവരുടെ കുടുംബത്തിനും ആവശ്യമായ സഹായം നല്‍കിവരികയാണെന്നും യുഎഇ അധികൃതരുമായി ബന്ധപ്പെടുന്നുണ്ടെന്നും ബ്രിട്ടന്റെ വിദേശകാര്യ മന്ത്രാലയം അറിയിച്ചു.