ലണ്ടന്‍: പുതുവര്‍ഷത്തില്‍ ബ്രിട്ടനിലെ കുടുംബങ്ങള്‍ക്ക് അധിക സാമ്പത്തികഭാരം സൃഷ്ടിച്ച് ഊര്‍ജബില്ലുകള്‍ കുതിച്ചുയര്‍ന്നേക്കുമെന്ന് മുന്നറിയിപ്പ്. ജനുവരി മുതല്‍ സാധാരണ ഉപഭോഗമുള്ള ഒരു വീടിന്റെ വാര്‍ഷിക ഊര്‍ജബില്‍ നിലവിലെ 1,723 പൗണ്ടില്‍നിന്ന് 2,192 പൗണ്ടിലേക്ക് ഉയരുമെന്നാണ് ഊര്‍ജകമ്പനിയായ ഇഡിഎഫിന്റെ പ്രവചനം. ഏകദേശം 27 ശതമാനത്തിന്റെ വര്‍ധനയാണിത്. മധ്യപൂര്‍വദേശത്തെ യുദ്ധസാഹചര്യത്തെത്തുടര്‍ന്ന് മൊത്തവ്യാപാര വിപണിയിലെ ഗ്യാസ് വില നാലുവര്‍ഷത്തെ ഉയര്‍ന്ന നിലയിലെത്തിയതാണ് ബില്‍ വര്‍ധനയ്ക്കു കാരണമായി ചൂണ്ടിക്കാട്ടുന്നത്. ഏപ്രിലോടെ ശരാശരി വാര്‍ഷിക ബില്‍ 2,389 പൗണ്ടിലേക്ക് ഉയര്‍ന്നേക്കുമെന്നും ജൂലൈയില്‍ കുറയാന്‍ സാധ്യതയുണ്ടെന്നും റിപ്പോര്‍ട്ടില്‍ പറയുന്നു. മൂന്നുമാസത്തിലൊരിക്കലാണ് ഊര്‍ജമേഖലയിലെ നിയന്ത്രണ ഏജന്‍സിയായ ഓഫ്ജെം പ്രൈസ് ക്യാപ്പ് പുതുക്കുന്നത്. ഇഡിഎഫ് പുറത്തുവിട്ട തുകകള്‍ പ്രവചനങ്ങളാണ്; അന്തിമ നിരക്കുകള്‍ ഓഫ്ജെമിന്റെ പ്രഖ്യാപനത്തോടെ വ്യക്തമാകും.

മൊത്തവ്യാപാര ഗ്യാസ് വിലയിലെ വര്‍ധന ഉപഭോക്താക്കളുടെ ബില്ലുകളിലും പ്രതിഫലിക്കുകയാണെന്ന് ഇഡിഎഫ് വക്താവ് പറഞ്ഞു. ശൈത്യകാലത്ത് ബില്ലുകള്‍ അടയ്ക്കാന്‍ ബുദ്ധിമുട്ടുന്ന കുടുംബങ്ങള്‍ക്ക് സഹായം ഉറപ്പാക്കേണ്ടത് അനിവാര്യമാണെന്നും കമ്പനി ആവശ്യപ്പെട്ടു. വര്‍ധിക്കുന്ന ഊര്‍ജച്ചെലവിന്റെ പശ്ചാത്തലത്തില്‍ സാമ്പത്തികമായി ബുദ്ധിമുട്ടുന്ന കുടുംബങ്ങളെ ലക്ഷ്യമിട്ടുള്ള സഹായനടപടികള്‍ സര്‍ക്കാര്‍ പരിഗണിച്ചേക്കും. ഇതിനൊപ്പം ഇന്ധനനികുതി മരവിപ്പിച്ച നടപടി അവസാനിപ്പിക്കാനുള്ള നീക്കത്തില്‍നിന്ന് ചാന്‍സലര്‍ പിന്മാറിയേക്കുമെന്നും സൂചനയുണ്ട്. നിലവിലെ നികുതി മരവിപ്പിക്കലും അഞ്ച് പെന്‍സിന്റെ ഇളവും തുടര്‍ന്നാല്‍ വാഹനയാത്രക്കാര്‍ക്ക് ആശ്വാസമാകും.