ലണ്ടന്: വേനല്ക്കാലത്ത് കുടുംബത്തിനും സുഹൃത്തുക്കള്ക്കുമൊപ്പം ബീച്ചിലെത്തി ഡിസ്പോസബിള് ബാര്ബിക്യൂ ഉപയോഗിക്കുന്നവര്ക്ക് ആരോഗ്യവിദഗ്ധരുടെ മുന്നറിയിപ്പ്. ബാര്ബിക്യൂ മാറ്റുകയോ തീ അണയ്ക്കുകയോ ചെയ്താലും അതിന് താഴെയുള്ള മണല് ഏറെനേരം അതീവ ചൂടോടെ തുടരാമെന്നും അറിയാതെ അതില് ചവിട്ടുന്നത് ഗുരുതരമായ പൊള്ളലിന് കാരണമാകാമെന്നും വിദഗ്ധര് പറയുന്നു. ഡിസ്പോസബിള് ബാര്ബിക്യൂ നേരിട്ട് മണലില് വയ്ക്കുന്നതാണ് അപകടസാധ്യത വര്ധിപ്പിക്കുന്നത്. ബാര്ബിക്യൂവില്നിന്നുള്ള കനത്ത ചൂട് താഴെയുള്ള മണലിലേക്ക് പകരുകയും മണലിനുള്ളില് ഏറെനേരം നിലനില്ക്കുകയും ചെയ്യും. തീ അണച്ചശേഷവും പുറമേ സാധാരണ മണല്പോലെ തോന്നുന്നതിനാല് അപകടം തിരിച്ചറിയാന് കഴിയണമെന്നില്ല.
ചൂടുപിടിച്ച മണലില് ചവിട്ടി യുവാവിന് മൂന്നാം ഡിഗ്രി പൊള്ളല്
വെയില്സിലെ കാര്മാര്ത്തന്ഷയറിലുള്ള സെഫ്ന് സിഡാന് ബീച്ചില് 27കാരനായ സാം നൈറ്റിനുണ്ടായ അപകടം മുന്നറിയിപ്പിന്റെ ഗൗരവം വ്യക്തമാക്കുന്നതാണ്. കുടുംബത്തോടൊപ്പം ബീച്ചിലെത്തിയ സാം ഡിസ്പോസബിള് ബാര്ബിക്യൂ ഉപയോഗിച്ചിരുന്നു. ഉപയോഗശേഷം ടോങ്സ് ഉപയോഗിച്ച് ബാര്ബിക്യൂ മറ്റൊരു ഭാഗത്തേക്ക് മാറ്റുകയും തീ അണയ്ക്കുകയും ചെയ്തു. ഇതോടെ സ്ഥലം സുരക്ഷിതമായെന്നാണ് അദ്ദേഹം കരുതിയത്. എന്നാല് പിന്നീട് അതേ സ്ഥലത്ത് തിരിച്ചെത്തിയപ്പോള് ബാര്ബിക്യൂ വച്ചിരുന്ന ഭാഗത്തെ അതീവ ചൂടുള്ള മണലില് സാം ചവിട്ടുകയായിരുന്നു. കാലുകള്ക്ക് ഗുരുതരമായി പൊള്ളലേറ്റതോടെ നടക്കാന് പോലും കഴിയാത്ത അവസ്ഥയായി. ഒപ്പമുണ്ടായിരുന്നവര് ചേര്ന്നാണ് അദ്ദേഹത്തെ ബീച്ചില്നിന്ന് എടുത്തുകൊണ്ടുപോയത്. ചര്മത്തിന്റെ എല്ലാ പാളികളെയും ഗുരുതരമായി ബാധിക്കുന്ന ആഴത്തിലുള്ള മൂന്നാം ഡിഗ്രി പൊള്ളലാണ് സാമിന് സംഭവിച്ചത്. നീത്ത് പോര്ട്ട് ടാല്ബോട്ട് ആശുപത്രിയില് പ്രവേശിപ്പിച്ച അദ്ദേഹത്തെ പിന്നീട് വിദഗ്ധ പൊള്ളല് ചികിത്സയ്ക്കായി റഫര് ചെയ്തു. ആഴ്ചകളോളം ചികിത്സ ആവശ്യമായി വന്നതായും രണ്ടാഴ്ചയോളം നടക്കാന് കഴിയാത്തതിനാല് ജോലിയില്നിന്ന് അവധിയെടുക്കേണ്ടിവന്നതായും സാം പറഞ്ഞു. മണല് ഇത്രയും വലിയ അപകടമാകുമെന്ന് അറിയില്ലായിരുന്നുവെന്നും ബാര്ബിക്യൂ മാറ്റി തീ അണച്ചതിനാല് സ്ഥലം സുരക്ഷിതമാണെന്നാണ് കരുതിയതെന്നും അദ്ദേഹം വ്യക്തമാക്കി.
അപകടങ്ങള് വര്ധിക്കുന്നതായി ബേണ്സ് സെന്റര്
ബീച്ചുകളില് ബാര്ബിക്യൂ മൂലം ചൂടുപിടിച്ച മണലില്നിന്ന് പൊള്ളലേല്ക്കുന്ന സംഭവങ്ങള് വര്ഷംതോറും വര്ധിക്കുന്നതായി സ്വാന്സി ബേ യൂണിവേഴ്സിറ്റി ഹെല്ത്ത് ബോര്ഡിലെ ബേണ്സ് സെന്റര് വിദഗ്ധര് മുന്നറിയിപ്പ് നല്കി. ബാര്ബിക്യൂ മാറ്റിയശേഷവും മണല് ഏറെനേരം ചൂടോടെ തുടരുമെന്ന കാര്യം പലര്ക്കും അറിയില്ലെന്ന് ബേണ്സ് സെന്ററിലെ ഫിസിയോതെറാപ്പിസ്റ്റ് ഡേവിഡ് ഫ്ലിഗല്സ്റ്റോണ് പറഞ്ഞു. ആവശ്യത്തിന് തണുപ്പിക്കാതെ കിടക്കുന്ന മണലാണ് ഇത്തരം അപകടങ്ങളില് ഗുരുതര പൊള്ളലിന് കാരണമാകുന്നതെന്നും അദ്ദേഹം വ്യക്തമാക്കി. ഇത്തരം പൊള്ളലുകള് അതീവ വേദനാജനകമായിരിക്കുമെന്നും മുറിവുകള് ദീര്ഘകാലം ഡ്രസ്സിങ് ചെയ്ത് പരിചരിക്കേണ്ടിവരുമെന്നും ഫിസിയോതെറാപ്പിസ്റ്റ് മെന്ന ഡേവിസ് പറഞ്ഞു.
ബാര്ബിക്യൂ നേരിട്ട് മണലില് വയ്ക്കരുത്
ഡിസ്പോസബിള് ബാര്ബിക്യൂ നേരിട്ട് മണലില് വയ്ക്കുന്നത് ഒഴിവാക്കണമെന്ന് ആരോഗ്യവിദഗ്ധര് നിര്ദേശിക്കുന്നു. പകരം കല്ലുകള്, ഇഷ്ടികകള് അല്ലെങ്കില് പ്രത്യേകം തയ്യാറാക്കിയ സ്റ്റാന്ഡ് ഉപയോഗിച്ച് മണലില്നിന്ന് ഉയര്ത്തിവയ്ക്കണം. ഇതിലൂടെ ബാര്ബിക്യൂവിലെ ചൂട് നേരിട്ട് മണലിലേക്ക് പകരുന്നത് കുറയ്ക്കാം. ഉപയോഗം കഴിഞ്ഞ ബാര്ബിക്യൂ ചൂടുള്ള ചാരത്തിനായി പ്രത്യേകം ഒരുക്കിയ ബിന്നുകളില് ഉപേക്ഷിക്കുകയോ സുരക്ഷിതമായി വീട്ടിലേക്ക് കൊണ്ടുപോകുകയോ വേണം. ബാര്ബിക്യൂ മാറ്റിയ സ്ഥലം പൂര്ണമായും തണുത്തുവെന്ന് ഉറപ്പാക്കാതെ അവിടെ നഗ്നപാദത്തോടെ നടക്കരുത്. കുട്ടികളെ ബാര്ബിക്യൂ ഉപയോഗിച്ച സ്ഥലത്തിന് സമീപം നടക്കാന് അനുവദിക്കുമ്പോള് കൂടുതല് ജാഗ്രത പാലിക്കണമെന്നും വിദഗ്ധര് നിര്ദേശിക്കുന്നു. കുട്ടികള്ക്ക് ചൂടുള്ള മണലില്നിന്ന് പൊള്ളലേറ്റാല് അടിയന്തര വൈദ്യസഹായം തേടണം.
പൊള്ളലേറ്റാല് ഉടന് ചെയ്യേണ്ടത്
പൊള്ളലേറ്റ ഭാഗം 15 മുതല് 30 മിനിറ്റ് വരെ തണുത്ത ഒഴുകുന്ന വെള്ളത്തിനടിയില് വയ്ക്കണമെന്നാണ് എന്എച്ച്എസിന്റെ നിര്ദേശം. ഒഴുകുന്ന വെള്ളം ലഭ്യമല്ലെങ്കില് തണുത്ത കുപ്പിവെള്ളം ഉപയോഗിക്കാം. പൊള്ളലേറ്റ ഭാഗത്തിന് സമീപമുള്ള വസ്ത്രങ്ങളും ആഭരണങ്ങളും നീക്കം ചെയ്യാം. എന്നാല് ചര്മത്തില് ഒട്ടിപ്പിടിച്ച വസ്തുക്കള് ബലമായി നീക്കരുത്. മുറിവ് തണുപ്പിച്ചശേഷം സാധ്യമെങ്കില് ക്ലിങ് ഫിലിം മുകളില് വിരിച്ചുവയ്ക്കാം. എന്നാല് പൊള്ളലേറ്റ ഭാഗത്തിന് ചുറ്റും മുറുക്കി പൊതിയരുത്. ബാര്ബിക്യൂവിലെ തീ അണഞ്ഞാലും അതിന് താഴെയുള്ള മണലിലെ അപകടം അവസാനിച്ചിട്ടുണ്ടാകണമെന്നില്ലെന്ന മുന്നറിയിപ്പ് ബീച്ചിലെത്തുന്നവര് പ്രത്യേകം ഓര്ക്കണമെന്ന് ആരോഗ്യവിദഗ്ധര് വ്യക്തമാക്കി.
