കോഴിക്കോട്: നിലമ്പൂര് എംഎല്എ പി.വി. അന്വറിന്റെ കക്കാടംപൊയിലെ പാര്ക്കിന് ലൈസന്സ് അനുവദിച്ചു. കൂടരഞ്ഞി ഗ്രാമപഞ്ചായത്താണ് ലൈസന്സ് അനുവദിച്ചത്. ഏഴു ലക്ഷം രൂപ ലൈസന്സ് ഫീ ആയി ഈടാക്കി. കൂടാതെ റവന്യൂ റിക്കവറി കുടിശികയായ 2.5 ലക്ഷം രൂപയും വില്ലേജ് ഓഫിസില് അടച്ചു. പാര്ക്കിന് അനുമതി നല്കിയത് ചോദ്യംചെയ്തുള്ള ഹര്ജി ഹൈക്കോടതി ഇന്നു പരിഗണിക്കാനിരിക്കെയാണ് ലൈസന്സ് നല്കിയത്. എംഎല്എയുടെ കക്കാടംപൊയിലിലെ കുട്ടികളുടെ പാര്ക്ക് ലൈസന്സില്ലാതെയാണു പ്രവര്ത്തിക്കുന്നതെന്നു കൂടരഞ്ഞി പഞ്ചായത്ത് കഴിഞ്ഞ ദിവസം ഹൈക്കോടതിയില് അറിയിച്ചിരുന്നു. പാര്ക്ക് ലൈസന്സിന് അപേക്ഷ നല്കിയിരുന്നെന്നും എന്നാല് അനുബന്ധ രേഖകളില് പിഴവുകളുണ്ടായിരുന്നെന്നും പഞ്ചായത്ത് അറിയിച്ചു.
ഇതോടെ ലൈസന്സ് ഇല്ലാത്ത പാര്ക്ക് എങ്ങനെയാണ് പ്രവര്ത്തിക്കുകയെന്ന് കോടതി ചോദിച്ചിരുന്നു. വിശദീകരണം നല്കാനും കോടതി ആവശ്യപ്പെടുകയായിരുന്നു. പാര്ക്ക് പഞ്ചായത്തിന്റെ ലൈസന്സില്ലാതെയാണു പ്രവര്ത്തിക്കുന്നതെന്ന വിവരാവകാശ രേഖയുടെ അടിസ്ഥാനത്തിലാണു ഹൈക്കോടതി കൂടരഞ്ഞി പഞ്ചായത്തിനോടു വിശദീകരണം തേടിയത്. കൂടരഞ്ഞി വില്ലേജിലെ അതീവ അപകട സാധ്യതയുള്ള മേഖലയില് ജിയോളജി ഡിപ്പാര്ട്മെന്റിന്റെ കൃത്യമായ അനുമതിയില്ലാതെ കുന്നിടിച്ചു നിരത്തിയാണ് വാട്ടര് തീം പാര്ക്ക് നിര്മിച്ചതെന്നായിരുന്നു പരാതി. പാര്ക്ക് സുരക്ഷിതമാണെന്ന് ഉറപ്പു വരുത്താനുള്ള പഠനങ്ങളോ പരിശോധനകളോ നടത്താതെയാണ് വീണ്ടും തുറക്കാന് അനുമതി നല്കി സര്ക്കാര് ഓഗസ്റ്റില് ഉത്തരവിറക്കിയതെന്നും പരാതി ഉയര്ന്നിരുന്നു.
