മലപ്പുറം: വിവാദങ്ങള്ക്കിടെ ഫെയ്സ്ബുക്കില് നിന്ന് മുഖ്യമന്ത്രി പിണറായി വിജയനൊപ്പമുള്ള കവര്ചിത്രം നീക്കി നിലമ്പൂര് എംഎല്എ പി വി അന്വര്. മുഖ്യമന്ത്രിക്കൊപ്പമുള്ള ചിത്രത്തിന് പകരം ജനങ്ങള്ക്കൊപ്പമുള്ള ചിത്രമാണ് അന്വര് പങ്കുവച്ചത്. നേരത്തെ മുഖ്യമന്ത്രിയെ അനുഗമിച്ച് വേദിയിലേക്ക് കയറുന്ന ഫോട്ടോയാണ് കവര്ചിത്രമായി നല്കിയിരുന്നത്. സിപിഎം സെക്രട്ടേറിയറ്റിന്റെ നിര്ദേശത്തെ തുടര്ന്ന് അന്വര് പരസ്യ പ്രസ്താവന അവസാനിപ്പിക്കുന്നതായി വ്യക്തമാക്കിയിരുന്നു. അതിനു പിന്നാലെയാണ് കവര് ചിത്രം നീക്കിയത്. നിരവധി പേരാണ് ചിത്രത്തിന് താഴെ അന്വറിന് പിന്തുണ അറിയിച്ചുകൊണ്ട് കമന്റ് ചെയ്യുന്നത്.
എഡിജിപി എം ആര് അജിത് കുമാറിനും മുഖ്യമന്ത്രിയുടെ പൊളിറ്റിക്കല് സെക്രട്ടറി പി ശശിക്കുമെതിരെയായിരുന്നു അന്വറിന്റെ ആരോപണം. എന്നാല് പി ശശിയെ പിന്തുണച്ചുകൊണ്ട് മുഖ്യമന്ത്രി പരസ്യമായി രം?ഗത്തെത്തി. കോണ്ഗ്രസ് പശ്ചാത്തലമുള്ള ആളാണ് അന്വര് എന്നു പറഞ്ഞ മുഖ്യമന്ത്രി, അന്വറിനു സ്വര്ണക്കടത്തു സംഘവുമായി ബന്ധമുണ്ടെന്ന പരോക്ഷ സൂചനയും നല്കി. പാര്ട്ടിക്കുള്ളിലോ തന്റെ മുന്നിലോ അവതരിപ്പിക്കാതെ ആരോപണങ്ങളുമായി അന്വര് നേരിട്ടു മാധ്യമങ്ങളെ കണ്ടതിലും കടുത്ത അതൃപ്തി രേഖപ്പെടുത്തി. ഇതിനു മറുപടിയുമായി അന്വര് രം?ഗത്തെത്തി.
പിന്നാലെയാണ് അന്വറിനെതിരെ പാര്ട്ടി സംസ്ഥാന സെക്രട്ടേറിയറ്റ് വാര്ത്താക്കുറിപ്പിറക്കി. അന്വറിന്റെ നിലപാടുകള് സര്ക്കാരിനെയും സിപിഎമ്മിനെയും ആക്രമിക്കാന് പാര്ട്ടി ശത്രുക്കള്ക്ക് ആയുധമായി മാറുകയാണ്. അന്വര് പരസ്യ പ്രസ്താവന അവസാനിപ്പിക്കണം എന്നാണ് സിപിഎം ആവശ്യപ്പെട്ടത്. ഇതോടെയാണ് പാര്ട്ടി നിര്ദേശം ശിരസാ വഹിക്കുന്നുവെന്ന് അന്വര് വ്യക്തമാക്കിയത്. താന് പാര്ട്ടി വിടില്ലെന്നും കൂട്ടിച്ചേര്ത്തു.
മുതിര്ന്ന സിപിഎം നേതാവ് എം.എം.. ലോറന്സിന്റെ മൃതദേഹം മെഡിക്കല് കോളെജിന് വിട്ടുകൊടുക്കരുതെന്ന് മകള്
കൊച്ചി: അന്തരിച്ച മുതിര്ന്ന സിപിഎം നേതാവ് എം എം ലോറന്സിന്റെ മൃതദേഹം മെഡിക്കല് കോളജിന് വിട്ടുകൊടുക്കുന്നതിന് എതിരെ മകള് ആശ ലോറന്സ് ഹൈക്കോടതിയെ സമീപിച്ചു. മൃതദേഹം മെഡിക്കല് കോളജിന് നല്കാന് ലോറന്സ് പറഞ്ഞിരുന്നില്ലെന്നു മകള് ഹര്ജിയില് പറയുന്നു. പള്ളിയില് അടക്കം ചെയ്യണമെന്നാണ് ഹര്ജിയിലെ ആവശ്യം. ഹര്ജി ഉച്ചയ്ക്ക് ശേഷം ഹൈക്കോടതി പരിഗണിക്കും.
എന്നാല് പിതാവിന്റെ ആഗ്രഹം അനുസരിച്ചാണ് മൃതദേഹം മെഡിക്കല് കോളജിന് നല്കുന്നതെന്നാണ് മകന് സജീവ് പറയുന്നത്. ആശയെ ചിലര് കരുവാക്കുകയാണെന്നും സജീവന് മാധ്യമങ്ങളോട് പ്രതികരിച്ചു. എന്നാല് ഇടവകയിലെ അംഗത്വമടക്കം ലോറന്സ് റദ്ദു ചെയ്തിരുന്നില്ലെന്ന് മകള് ആശ മാധ്യമങ്ങളോട് പറഞ്ഞു. അച്ഛന്റെ ആഗ്രഹം അതില് നിന്ന് വ്യക്തമാണെന്നും മകള് പറയുന്നു. ഇന്ന് നാല് മണിക്ക് മൃതദേഹം മെഡിക്കല് കോളജിന് വിട്ട് നല്കാനായിരുന്നു തീരുമാനം. ലോറന്സിന്റെ അവസാന യാത്രയയപ്പ് ചതിയിലൂടെയായിരുന്നുവെന്ന് മകള് ആശാ ലോറന്സ് ഇന്നലെ പറഞ്ഞിരുന്നു. ശനിയാഴ്ച ഉച്ചയോടെയായിരുന്നു ന്യുമോണിയ ബാധയെത്തുടര്ന്ന് ചികിത്സയിലിരിക്കെ ലോറന്സിന്റെ മരണം.
