ലിസ്ബണ്: പലിശ നിരക്കുകള് കുറയ്ക്കാനുള്ള സാധ്യതകള് നിലവില് ചര്ച്ചകളില് നിന്ന് പൂര്ണമായി ഒഴിവാക്കിയതായി ബാങ്ക് ഓഫ് ഇംഗ്ലണ്ട് ഗവര്ണര് ആന്ഡ്രൂ ബെയ്ലി വ്യക്തമാക്കി. പോര്ച്ചുഗലില് നടന്ന യൂറോപ്യന് സെന്ട്രല് ബാങ്കിന്റെ വാര്ഷിക സമ്മേളനത്തില് സംസാരിക്കുകയായിരുന്നു അദ്ദേഹം. യുഎസ്-ഇറാന് സംഘര്ഷം സമാധാനത്തിലേക്ക് നീങ്ങിയതിനെ തുടര്ന്ന് എണ്ണവില താഴ്ന്നിട്ടുണ്ടെങ്കിലും, യുദ്ധത്തിന് മുന്പുണ്ടായിരുന്ന നിലയിലേക്ക് ഇപ്പോഴും എത്തിയിട്ടില്ലെന്ന് ബെയ്ലി പറഞ്ഞു. നേരത്തെ ഈ വര്ഷം പലിശ നിരക്കുകള് കുറയ്ക്കുമെന്ന പ്രതീക്ഷ നിലനിന്നിരുന്നെങ്കിലും മാര്ച്ചോടെ ആ സാധ്യത ഇല്ലാതായതായി അദ്ദേഹം വ്യക്തമാക്കി. ''ഈ വര്ഷം നിരക്കുകള് കുറയ്ക്കുമെന്ന പ്രതീക്ഷ ഉണ്ടായിരുന്നു. എന്നാല് മാര്ച്ചോടെ അത് ഇല്ലാതായി. നിലവില് അത്തരമൊരു ആലോചനയില്ല,'' ബെയ്ലി പറഞ്ഞു.
പലിശ നിരക്കുകള് ഇനിയും മാസങ്ങളോളം ഉയര്ന്ന നിലയില് തുടരുമെന്ന ആശങ്കയാണ് സാമ്പത്തിക വിപണികളില് നിലനില്ക്കുന്നത്. ഇറാന് സംഘര്ഷത്തിന്റെ പശ്ചാത്തലത്തില് നിരക്ക് വര്ധനയുണ്ടാകുമെന്ന പ്രതീക്ഷയും വിപണികളില് നേരത്തെ ഉയര്ന്നിരുന്നു. യുദ്ധസാഹചര്യമാണ് പലിശ കുറയ്ക്കാനുള്ള സാധ്യതകള് ഇല്ലാതാക്കിയതെന്നും ബെയ്ലി ചൂണ്ടിക്കാട്ടി. ഇതോടെ 2026 മുഴുവന് പലിശ നിരക്ക് 3.75 ശതമാനത്തില് തുടരുമെന്നാണ് സാമ്പത്തിക വിപണികളുടെ വിലയിരുത്തല്. ഈ വര്ഷം നടന്ന മോണിറ്ററി പോളിസി യോഗങ്ങളില് പലിശ വര്ധനയ്ക്കെതിരെ താന് വോട്ട് ചെയ്തതായി ബെയ്ലി വ്യക്തമാക്കി. സമ്പദ്വ്യവസ്ഥയും തൊഴില് വിപണിയും ദുര്ബലമാകുന്നതാണ് നിരക്ക് വര്ധനയ്ക്കെതിരെ നിലപാട് സ്വീകരിക്കാന് കാരണമെന്ന് അദ്ദേഹം പറഞ്ഞു. മാര്ച്ചില് നിരക്കുകള് മാറ്റമില്ലാതെ നിലനിര്ത്തിയതിലൂടെ സമ്പദ്വ്യവസ്ഥയിലെ ദുര്ബലത കൂടുതല് രൂക്ഷമാകുന്നത് ഒഴിവാക്കാന് കഴിഞ്ഞതായും ഗവര്ണര് അഭിപ്രായപ്പെട്ടു. അതേസമയം, ഈ ഘട്ടത്തില് മോര്ട്ട്ഗേജ് നിരക്കുകള് ഒരു ശതമാനം വരെ ഉയര്ന്നതായും റിപ്പോര്ട്ടുകളുണ്ട്. ബാങ്ക് ഓഫ് ഇംഗ്ലണ്ടിന്റെ അടുത്ത മോണിറ്ററി പോളിസി കമ്മിറ്റി യോഗം ജൂലൈ 30-ന് ചേരും.
