ലണ്ടന്‍: ബ്രിട്ടീഷ് പ്രധാനമന്ത്രി സ്ഥാനത്തേക്ക് ആന്‍ഡി ബേണാം എത്താനുള്ള സാധ്യത ശക്തമായിരിക്കെ, പുതിയ മന്ത്രിസഭയിലും പ്രധാന അധികാര കേന്ദ്രങ്ങളിലും സ്ത്രീ-പുരുഷ തുല്യ പ്രാതിനിധ്യം ഉറപ്പാക്കണമെന്ന് ആവശ്യപ്പെട്ട് ലേബര്‍ പാര്‍ട്ടിയിലെ വനിതാ എംപിമാര്‍ രംഗത്ത്. വിമന്‍സ് പാര്‍ലമെന്ററി ലേബര്‍ പാര്‍ട്ടി നല്‍കിയ കത്തില്‍, സമത്വത്തിന്റെ പാര്‍ട്ടിയെന്ന ലേബറിന്റെ അവകാശവാദം വിശ്വാസ്യത നേടണമെങ്കില്‍ പാര്‍ട്ടിയും സര്‍ക്കാരും സ്വന്തം നേതൃത്വ നിയമനങ്ങളില്‍ മാതൃക കാണിക്കണമെന്നാണ് ആവശ്യപ്പെട്ടിരിക്കുന്നത്. ബേണാം ജൂലൈ 20ഓടെ പ്രധാനമന്ത്രി സ്ഥാനത്ത് എത്താന്‍ സാധ്യതയുണ്ടെന്ന റിപ്പോര്‍ട്ടുകളും പുറത്തുവന്നിട്ടുണ്ട്. ''മാറ്റം ആദ്യ ദിവസം മുതല്‍ തന്നെ തുടങ്ങണം. പാര്‍ട്ടിയിലും സര്‍ക്കാരിലും നിലനില്‍ക്കുന്ന വിഷലിപ്തമായ അന്തരീക്ഷവും സ്ത്രീ വിരുദ്ധ സമീപനവും അവസാനിപ്പിക്കാന്‍ നിങ്ങള്‍ നേതൃത്വം നല്‍കണം'' എന്നാണ് കത്തില്‍ വ്യക്തമാക്കുന്നത്. പുതിയ സര്‍ക്കാരില്‍ കുറഞ്ഞത് പകുതി മന്ത്രിമാരും സ്ത്രീകളായിരിക്കണം, നമ്പര്‍ 10-ലെ പ്രധാന സംഘത്തിലും സ്ത്രീകള്‍ക്ക് തുല്യ പങ്കാളിത്തം വേണം, ഉപപ്രധാനമന്ത്രി സ്ഥാനത്തേക്ക് വനിതയെ പരിഗണിക്കണം തുടങ്ങിയ നിര്‍ദേശങ്ങളാണ് WPLP മുന്നോട്ടുവച്ചത്.

ലേബര്‍ പാര്‍ട്ടിക്ക് ഇതുവരെ ഒരു വനിതാ നേതാവിനെ തിരഞ്ഞെടുക്കാന്‍ കഴിഞ്ഞിട്ടില്ലെന്നതാണ് വനിതാ എംപിമാര്‍ ഉയര്‍ത്തുന്ന പ്രധാന ചൂണ്ടിക്കാട്ടല്‍. അതേസമയം കണ്‍സര്‍വേറ്റീവ് പാര്‍ട്ടിക്ക് മാര്‍ഗരറ്റ് താച്ചര്‍, തെരേസ മേ, ലിസ് ട്രസ് എന്നീ മൂന്ന് വനിതാ പ്രധാനമന്ത്രിമാര്‍ ഉണ്ടായിട്ടുണ്ട്. നിലവില്‍ പാര്‍ട്ടിയെ നയിക്കുന്നതും കെമി ബാഡിനോക്കാണ്. ബേണാം അധികാരത്തിലെത്തിയാല്‍ നിലവിലെ ചാന്‍സലര്‍ റേച്ചല്‍ റീവ്‌സിനെ മാറ്റുമെന്ന അഭ്യൂഹങ്ങളും വനിതാ എംപിമാരുടെ ആശങ്ക വര്‍ധിപ്പിച്ചിട്ടുണ്ട്. ബ്രിട്ടന്റെ ആദ്യ വനിതാ ചാന്‍സലറായ റീവ്‌സിന് പകരം പുരുഷ നേതാക്കളെയാണ് പ്രധാനമായും പരിഗണിക്കുന്നതെന്ന റിപ്പോര്‍ട്ടുകളും പുറത്തുവരുന്നു. എനര്‍ജി സെക്രട്ടറി എഡ് മിലിബാന്‍ഡ് ചാന്‍സലര്‍ സ്ഥാനത്തേക്ക് പരിഗണിക്കപ്പെടുന്നവരില്‍ ഒരാളാണെന്ന് വിലയിരുത്തപ്പെടുന്നു. അതേസമയം അദ്ദേഹത്തിന്റെ സഹോദരന്‍ ഡേവിഡ് മിലിബാന്‍ഡ് ബ്രിട്ടീഷ് രാഷ്ട്രീയത്തിലേക്ക് തിരിച്ചെത്തി വിദേശകാര്യ സെക്രട്ടറി സ്ഥാനം ഏറ്റെടുക്കുമെന്ന അഭ്യൂഹങ്ങളും ചര്‍ച്ചയാകുന്നു. ഇതിനെതിരെ WPLPയിലെ ഒരു അംഗം, ''രാജ്യത്തെ ഏറ്റവും പ്രധാനപ്പെട്ട പദവികളില്‍ സ്ത്രീകളെക്കാള്‍ കൂടുതല്‍ മിലിബാന്‍ഡുമാര്‍ ഉണ്ടാകുന്നത് അംഗീകരിക്കാനാവില്ല'' എന്ന തരത്തില്‍ പ്രതികരിച്ചതായും റിപ്പോര്‍ട്ടുകളുണ്ട്.

വനിതാ എംപിമാരുമായി നടന്ന കൂടിക്കാഴ്ചയില്‍ അവരുടെ ആശങ്കകള്‍ ബേണാം കേട്ടതായി റിപ്പോര്‍ട്ടുണ്ട്. തന്റെ സംഘത്തിലെ സ്ത്രീകളെ അപമാനിക്കുകയോ അവഗണിക്കുകയോ ചെയ്യുന്ന ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിക്കുമെന്ന് അദ്ദേഹം ഉറപ്പുനല്‍കിയതായും പറയുന്നു. വെസ്റ്റ്മിന്‍സ്റ്ററില്‍ 'ബോയ്‌സ് ക്ലബ്' സംസ്‌കാരം നിലനില്‍ക്കുന്നതായും, അതാണ് ഘടനാപരമായ സ്ത്രീ വിരുദ്ധതയ്ക്കും പീഡനപരാതികള്‍ അവഗണിക്കപ്പെടുന്നതിനും കാരണമാകുന്നതെന്നും ലേബര്‍ വനിതാ എംപിമാര്‍ ആരോപിക്കുന്നു. തിരഞ്ഞെടുപ്പ് വിജയത്തിനായി തങ്ങള്‍ കഠിനമായി പ്രവര്‍ത്തിച്ചിട്ടും പാര്‍ട്ടിക്കുള്ളില്‍ സ്ത്രീകളെന്ന നിലയില്‍ കേള്‍ക്കപ്പെടാന്‍ ഇപ്പോഴും പോരാടേണ്ടിവരുകയാണെന്ന് WPLP കത്തില്‍ ചൂണ്ടിക്കാട്ടുന്നു. തീരുമാനങ്ങള്‍ എടുക്കുന്ന മുറികളില്‍ സ്ത്രീകള്‍ക്ക് മതിയായ ഇടമില്ലെന്നും അതിന്റെ പ്രതിഫലനം നിയമനങ്ങളിലും നയരൂപീകരണത്തിലും പ്രകടമാണെന്നും കത്തില്‍ പറയുന്നു.

സ്ത്രീ-പുരുഷ സമത്വം ഉറപ്പാക്കുന്നതിന് 13 നിര്‍ദേശങ്ങളും വനിതാ എംപിമാര്‍ മുന്നോട്ടുവച്ചിട്ടുണ്ട്. വനിതാ ഉപപ്രധാനമന്ത്രി, സ്ത്രീകള്‍ക്കായുള്ള പ്രത്യേക മന്ത്രി, പ്രധാനമന്ത്രിയുടെ ഓഫീസിലും പാര്‍ലമെന്റിലും സ്ത്രീ വിരുദ്ധ പെരുമാറ്റത്തിനെതിരായ വ്യക്തമായ നയം, ന്യൂനപക്ഷ വനിതാ എംപിമാര്‍ക്കുള്ള മെച്ചപ്പെട്ട സുരക്ഷ, ഓണ്‍ലൈന്‍ അധിക്ഷേപങ്ങളും ഡീപ്ഫേക്ക് ആക്രമണങ്ങളും തടയാന്‍ ശക്തമായ നിയമനടപടികള്‍ എന്നിവയാണ് പ്രധാന നിര്‍ദേശങ്ങള്‍. ഹൗസ് ഓഫ് കോമണ്‍സില്‍ 650 എംപിമാരാണുള്ളത്. 2024 പൊതുതിരഞ്ഞെടുപ്പിന് ശേഷം വനിതാ എംപിമാരുടെ എണ്ണം 263 ആയി ഉയര്‍ന്നത് ബ്രിട്ടീഷ് പാര്‍ലമെന്റിന്റെ ചരിത്രത്തിലെ ഏറ്റവും ഉയര്‍ന്ന നിലയായിരുന്നു. പിന്നീട് നടന്ന ഉപതിരഞ്ഞെടുപ്പുകള്‍ക്കുശേഷം വനിതാ എംപിമാരുടെ എണ്ണം 265 ആയി ഉയര്‍ന്നതായി ചില കണക്കുകള്‍ വ്യക്തമാക്കുന്നു. ലേബര്‍ പാര്‍ട്ടിയില്‍ വനിതാ എംപിമാരുടെ പ്രാതിനിധ്യം മറ്റു പ്രധാന പാര്‍ട്ടികളേക്കാള്‍ ഉയര്‍ന്നതാണെങ്കിലും, സര്‍ക്കാര്‍ രൂപീകരണ സമയത്ത് നിര്‍ണായക പദവികളിലും അധികാര കേന്ദ്രങ്ങളിലും തുല്യ പങ്കാളിത്തം ഉറപ്പാക്കണമെന്നാണ് വനിതാ ലേബര്‍ എംപിമാരുടെ പ്രധാന ആവശ്യം. കിയര്‍ സ്റ്റാമറിന് പകരക്കാരനാകാന്‍ ഇതുവരെ വ്യക്തമായി മുന്നില്‍ നില്‍ക്കുന്ന നേതാവാണ് ആന്‍ഡി ബേണാം. മറ്റൊരു ലേബര്‍ എംപി മത്സരരംഗത്ത് ശക്തമായി രംഗത്തെത്താത്ത പക്ഷം, ബേണാമിന്റെ അധികാരാരോഹണം വേഗത്തിലാകുമെന്നാണ് ബ്രിട്ടീഷ് രാഷ്ട്രീയവൃത്തങ്ങളില്‍ നിന്നുള്ള വിലയിരുത്തല്‍.