ലണ്ടന്‍/ബര്‍മിങ്ങാം: യുകെയില്‍ ഈ വര്‍ഷത്തെ ഏറ്റവും ഉയര്‍ന്ന താപനില രേഖപ്പെടുത്തിയ ദിവസങ്ങളിലൊന്നില്‍ വെസ്റ്റ് മിഡ്ലാന്‍ഡ്‌സിന്റെ വിവിധ ഭാഗങ്ങളില്‍ പടര്‍ന്ന കാട്ടുതീ വ്യാപക നാശം വിതച്ചു. ബര്‍മിങ്ങാമിന് സമീപമുള്ള സ്റ്റോര്‍ബ്രിജില്‍ മാത്രം ഏകദേശം 40 ഏക്കര്‍ പ്രദേശത്തേക്ക് തീ പടര്‍ന്നു. നൂറിലേറെ അഗ്‌നിരക്ഷാ സേനാംഗങ്ങള്‍ മണിക്കൂറുകളോളം നടത്തിയ രക്ഷാപ്രവര്‍ത്തനത്തിനൊടുവിലാണ് തീ നിയന്ത്രണവിധേയമാക്കാനായത്. തീ അണയ്ക്കുന്നതിനിടെ മൂന്ന് അഗ്‌നിരക്ഷാ സേനാംഗങ്ങളെയും ഒരു കുട്ടിയെയും ആശുപത്രിയില്‍ പ്രവേശിപ്പിച്ചു. പുക ശ്വസിച്ചതിനെ തുടര്‍ന്ന് ആറ് പേര്‍ക്കും ചികിത്സ നല്‍കി. വ്യാഴാഴ്ച ഉച്ചയ്ക്ക് 1.30ഓടെയാണ് സ്റ്റോര്‍ബ്രിജിലെ റേസ്‌കോഴ്‌സ് ലെയ്‌നിലും സമീപപ്രദേശങ്ങളിലും തീപിടിത്തം ആരംഭിച്ചത്. ശക്തമായ കാറ്റും വരണ്ട കാലാവസ്ഥയും മൂലം പുല്ലുപ്രദേശങ്ങളിലൂടെയും മരങ്ങള്‍ നിറഞ്ഞ മേഖലകളിലൂടെയും തീ അതിവേഗം വ്യാപിച്ചു. റേസ്‌കോഴ്‌സ് ലെയ്‌നില്‍നിന്ന് നോര്‍ട്ടണ്‍ റോഡ്, കൗണ്ടി ലെയ്ന്‍ ഭാഗങ്ങളിലേക്കും മോര്‍ട്ടണ്‍ റോഡില്‍നിന്ന് ഐവര്‍ലി ലെയ്‌നിലേക്കും തീ പടര്‍ന്നതായി വെസ്റ്റ് മിഡ്ലാന്‍ഡ്‌സ് ഫയര്‍ സര്‍വീസ് അറിയിച്ചു.

വൈകുന്നേരത്തോടെ തീ സമീപത്തെ വീടുകളിലേക്കും വ്യാപിച്ചു. നിരവധി വീടുകള്‍ക്ക് ഗുരുതര നാശനഷ്ടമുണ്ടായി. ചില സ്ഥലങ്ങളില്‍ റോഡുകള്‍ കടന്നും തീ പടര്‍ന്നതോടെ പ്രദേശവാസികളെ വീടുകളില്‍നിന്ന് ഒഴിപ്പിച്ചു. സമീപത്തുള്ളവര്‍ ജനലുകളും വാതിലുകളും അടച്ചിടണമെന്നും തീപിടിത്ത മേഖലകളില്‍നിന്ന് വിട്ടുനില്‍ക്കണമെന്നും അധികൃതര്‍ നിര്‍ദേശം നല്‍കി. തീപിടിത്തം നിയന്ത്രിക്കുന്നതിനിടെയാണ് മൂന്ന് അഗ്‌നിരക്ഷാ സേനാംഗങ്ങള്‍ക്ക് പരുക്കേറ്റത്. ഇവരെ ആശുപത്രിയില്‍ പ്രവേശിപ്പിച്ചു. പുക ശ്വസിച്ചതിനെ തുടര്‍ന്ന് ആറ് നാട്ടുകാര്‍ക്ക് ചികിത്സ നല്‍കുകയും ഒരു കുട്ടിയെ ആശുപത്രിയിലേക്ക് മാറ്റുകയും ചെയ്തതായി ഫയര്‍ ആന്‍ഡ് റെസ്‌ക്യൂ സര്‍വീസ് അറിയിച്ചു. അതേസമയം, സ്റ്റോക്ക്-ഓണ്‍-ട്രെന്റിലെ സാന്‍ഡിഫോര്‍ഡിലും തീ വീടുകളിലേക്ക് പടര്‍ന്നു. നാല് വീടുകള്‍ പൂര്‍ണമായും കത്തിനശിച്ചതായി പ്രദേശവാസികള്‍ പറഞ്ഞു. വൈകുന്നേരം 4.40ഓടെ പൊലീസ് എത്തി സമീപവാസികളെ ഒഴിപ്പിച്ചു. ശക്തമായ കാറ്റിന്റെ ദിശയില്‍ പാര്‍ക്കില്‍നിന്ന് തീ വീടുകളിലേക്ക് പടര്‍ന്നതായാണ് നാട്ടുകാര്‍ പറയുന്നത്.

ബര്‍മിങ്ങാമിലെ കാസില്‍ വേലിലും തീ വീടുകളിലേക്ക് വ്യാപിച്ചു. സംഭവത്തില്‍ ഒരു സ്ത്രീക്ക് ഗുരുതരമായി പരുക്കേറ്റതായി വെസ്റ്റ് മിഡ്ലാന്‍ഡ്‌സ് ഫയര്‍ സര്‍വീസ് അറിയിച്ചു. ഡ്രൂയിഡ്‌സ് ഹീത്ത്, കിങ്‌സ് നോര്‍ട്ടണ്‍ എന്നിവിടങ്ങളിലും ഒരേസമയം തീപിടിത്തങ്ങള്‍ റിപ്പോര്‍ട്ട് ചെയ്തു. വാര്‍വിക്ഷയറിലെ ആല്‍കെസ്റ്ററിന് സമീപമുള്ള സാല്‍ഫോര്‍ഡ് പ്രയേഴ്‌സിലെ ടോത്തല്‍ ലെയ്‌നില്‍ വലിയ തീപിടിത്തമുണ്ടായതിനെ തുടര്‍ന്ന് ഫയര്‍ ആന്‍ഡ് റെസ്‌ക്യൂ സര്‍വീസ് 'മേജര്‍ ഇന്‍സിഡന്റ്' പ്രഖ്യാപിച്ചു. വ്യാപകമായ രക്ഷാപ്രവര്‍ത്തനത്തിനു ശേഷം സ്ഥിതി നിയന്ത്രണവിധേയമായതോടെ പ്രഖ്യാപനം പിന്‍വലിച്ചു. തീപിടിത്തത്തെ തുടര്‍ന്ന് അടച്ചിട്ടിരുന്ന എ46 റോഡും പിന്നീട് ഇരുവശത്തേക്കും തുറന്നു. വോര്‍സെസ്റ്റര്‍ഷയറിലെ പെര്‍ഷോറിലും വലിയ തീപിടിത്തം റിപ്പോര്‍ട്ട് ചെയ്തു. വൈകുന്നേരം 4.30ഓടെ ത്രീ സ്പ്രിങ്‌സ് റോഡിലെ ലാന്‍സലോട്ട് കോര്‍ട്ടിലാണ് തീപിടിത്തമുണ്ടായത്. എട്ട് ഫയര്‍ എന്‍ജിനുകള്‍ സ്ഥലത്തെത്തി. തീ പടര്‍ന്നതോടെ 30 വീടുകളില്‍നിന്ന് ആളുകളെ ഒഴിപ്പിച്ചു. പുക ശ്വസിച്ചതിനെ തുടര്‍ന്ന് ഒരാള്‍ക്ക് ചികിത്സ നല്‍കി. പ്രദേശത്തെ ഏകദേശം 200 വീടുകളില്‍ വൈദ്യുതി വിതരണം തടസ്സപ്പെടുകയും ചെയ്തു. പിന്നീട് തീ നിയന്ത്രണവിധേയമായതായി ഹിയര്‍ഫോര്‍ഡ് ആന്‍ഡ് വോര്‍സെസ്റ്റര്‍ ഫയര്‍ ആന്‍ഡ് റെസ്‌ക്യൂ സര്‍വീസ് അറിയിച്ചു.

അതിശുഷ്‌കമായ കാലാവസ്ഥയും ശക്തമായ കാറ്റുമാണ് തീ അതിവേഗം പടരാന്‍ കാരണമായതെന്ന് വെസ്റ്റ് മിഡ്ലാന്‍ഡ്‌സ് ഫയര്‍ സര്‍വീസ് ചീഫ് ഫയര്‍ ഓഫിസര്‍ സൈമണ്‍ ടുഹില്‍ പറഞ്ഞു. നൂറിലേറെ അഗ്‌നിരക്ഷാ സേനാംഗങ്ങള്‍ രംഗത്തുണ്ടായിരുന്നിട്ടും തീ നിയന്ത്രിക്കുന്നത് വലിയ വെല്ലുവിളിയായിരുന്നുവെന്നും അദ്ദേഹം വ്യക്തമാക്കി. തീ അണയ്ക്കുന്നതിനായി ഹൈഡ്രന്റുകളില്‍നിന്ന് വലിയ തോതില്‍ വെള്ളം ഉപയോഗിച്ചതോടെ വെസ്റ്റ് മിഡ്ലാന്‍ഡ്‌സിലെ ചില പ്രദേശങ്ങളില്‍ ജലമര്‍ദം കുറയാനും വെള്ളത്തിന് നിറവ്യത്യാസം ഉണ്ടാകാനും സാധ്യതയുണ്ടെന്ന് സെവേണ്‍ ട്രെന്റ് മുന്നറിയിപ്പ് നല്‍കി. സ്റ്റോര്‍ബ്രിജിലെ തീപിടിത്തത്തെ തുടര്‍ന്ന് പ്രധാന റോഡുകളിലും ഗതാഗത തടസ്സമുണ്ടായി. ചില പാതകള്‍ താല്‍ക്കാലികമായി അടച്ചതോടെ മണിക്കൂറുകളോളം ഗതാഗതക്കുരുക്ക് അനുഭവപ്പെട്ടു. യുകെയില്‍ ഈ വര്‍ഷത്തെ ഏറ്റവും കടുത്ത ചൂട് അനുഭവപ്പെട്ട ദിവസത്തിനിടെയാണ് വെസ്റ്റ് മിഡ്ലാന്‍ഡ്‌സില്‍ ഒരേസമയം വിവിധ സ്ഥലങ്ങളില്‍ തീപിടിത്തങ്ങള്‍ ഉണ്ടായത്. വീടുകള്‍ ഉള്‍പ്പെടെ വന്‍ നാശനഷ്ടം സംഭവിക്കുകയും രക്ഷാപ്രവര്‍ത്തകരും നാട്ടുകാരും ആശുപത്രിയിലാവുകയും ചെയ്തതോടെ മേഖലയിലെ അടിയന്തര സേവനങ്ങള്‍ കനത്ത സമ്മര്‍ദത്തിലായി.