ലണ്ടന്‍: അപകടകാരിയായ ഹെപ്പറ്റൈറ്റിസ് സി വൈറസിനെ നിര്‍മാര്‍ജനം ചെയ്യാനുള്ള ലോകാരോഗ്യ സംഘടനയുടെ 2030ലെ ലക്ഷ്യം സമയപരിധിക്ക് മുന്‍പേ കൈവരിക്കാനുള്ള പാതയിലാണ് ഇംഗ്ലണ്ട്. രോഗം സ്ഥിരീകരിച്ചവരില്‍ 80 ശതമാനം പേരെയും ചികിത്സിക്കുകയെന്ന പ്രധാന ലക്ഷ്യം ഇതിനകം കൈവരിച്ചതായി പുതിയ കണക്കുകള്‍ വ്യക്തമാക്കുന്നു. കഴിഞ്ഞ പത്ത് വര്‍ഷത്തിനിടെ ഹെപ്പറ്റൈറ്റിസ് സി മൂലമുള്ള മരണനിരക്കിലും 36 ശതമാനം കുറവുണ്ടായി. കരളിനെ ബാധിക്കുന്ന വൈറസ് രോഗമാണ് ഹെപ്പറ്റൈറ്റിസ് സി. രോഗബാധയുടെ ആദ്യഘട്ടത്തില്‍ പലര്‍ക്കും യാതൊരു ലക്ഷണങ്ങളും പ്രകടമാകാത്തതിനാല്‍ 'നിശ്ശബ്ദ രോഗം' എന്നാണ് ഇത് അറിയപ്പെടുന്നത്. ചികിത്സ ലഭിക്കാതെ പോയാല്‍ ഗുരുതരമായ കരള്‍ രോഗങ്ങള്‍ക്കും ജീവന് ഭീഷണിയാകുന്ന ആരോഗ്യപ്രശ്‌നങ്ങള്‍ക്കും കാരണമാകാം. എന്നാല്‍ എട്ട് മുതല്‍ 12 ആഴ്ച വരെ ആന്റിവൈറല്‍ ഗുളികകള്‍ കഴിക്കുന്നതിലൂടെ 95 ശതമാനത്തിലധികം രോഗികളെയും പൂര്‍ണമായി സുഖപ്പെടുത്താന്‍ കഴിയുന്നതാണ് ചികിത്സയിലെ പ്രധാന നേട്ടം.

2015 മുതല്‍ ഒരു ലക്ഷത്തിലധികം പേര്‍ക്ക് ചികിത്സ

രോഗബാധിതരെ നേരത്തെ കണ്ടെത്തുന്നതിനായി എന്‍എച്ച്എസ് വിവിധ പദ്ധതികളാണ് നടപ്പാക്കുന്നത്. എ ആന്‍ഡ് ഇ വിഭാഗങ്ങളിലെ രക്തപരിശോധന, ജിപിയില്‍ രജിസ്റ്റര്‍ ചെയ്യുമ്പോഴുള്ള പരിശോധന, സൗജന്യ ഹോം ടെസ്റ്റിങ് കിറ്റുകള്‍ എന്നിവ ഇതില്‍ ഉള്‍പ്പെടുന്നു. 2015 മുതല്‍ ഇംഗ്ലണ്ടില്‍ ഒരു ലക്ഷത്തിലധികം പേര്‍ക്ക് ഹെപ്പറ്റൈറ്റിസ് സി കണ്ടെത്തുകയും ചികിത്സ നല്‍കുകയും ചെയ്തിട്ടുണ്ട്. ഇതോടെ രോഗം സ്ഥിരീകരിച്ചവരില്‍ 80 ശതമാനം പേരെയും ചികിത്സിക്കണമെന്ന ലക്ഷ്യം രാജ്യം കൈവരിച്ചു. 2024ലെ കണക്കുകള്‍ പ്രകാരം ഇംഗ്ലണ്ടില്‍ ഏകദേശം 50,200 മുതിര്‍ന്നവര്‍ ഹെപ്പറ്റൈറ്റിസ് സി ബാധിതരായി ജീവിക്കുന്നുണ്ട്. ഇവരില്‍ 84.6 ശതമാനം പേരെയും ഇതിനകം കണ്ടെത്തിയിട്ടുണ്ട്. രോഗബാധിതരില്‍ 90 ശതമാനം പേരെയും തിരിച്ചറിയണമെന്ന അടുത്ത ലക്ഷ്യത്തിലേക്കുള്ള നിര്‍ണായക മുന്നേറ്റമാണിത്.

മരണനിരക്ക് കുറയ്ക്കുന്നതിലും പുരോഗതി

2015നെ അപേക്ഷിച്ച് ഹെപ്പറ്റൈറ്റിസ് സി മൂലമുള്ള മരണനിരക്ക് 65 ശതമാനം കുറയ്ക്കണമെന്ന ലക്ഷ്യം ഇതുവരെ പൂര്‍ണമായി കൈവരിച്ചിട്ടില്ല. എന്നാല്‍ നിലവിലെ പുരോഗതി തുടര്‍ന്നാല്‍ 2030ന് മുമ്പ് ഈ ലക്ഷ്യവും കൈവരിക്കാനാകുമെന്നാണ് ആരോഗ്യവിദഗ്ധരുടെ പ്രതീക്ഷ. ഹെപ്പറ്റൈറ്റിസ് സി മൂലമുള്ള മരണങ്ങളില്‍ കഴിഞ്ഞ പത്ത് വര്‍ഷത്തിനിടെ 36 ശതമാനം കുറവുണ്ടായതും പ്രതീക്ഷ നല്‍കുന്ന നേട്ടമായാണ് വിലയിരുത്തുന്നത്.

ചില രാജ്യങ്ങളില്‍ ജനിച്ചവര്‍ പരിശോധന നടത്തണം

യുക്രെയ്ന്‍, റുമാനിയ, എസ്റ്റോണിയ, ലാത്വിയ, പോളണ്ട്, അല്‍ബേനിയ, ലിത്വാനിയ, ബള്‍ഗേറിയ, ചെക്കിയ, സ്ലോവാക്യ എന്നീ രാജ്യങ്ങളില്‍ ജനിച്ച മുതിര്‍ന്നവര്‍ ഹെപ്പറ്റൈറ്റിസ് സി പരിശോധന നടത്തണമെന്ന് എന്‍എച്ച്എസ് പ്രത്യേകമായി നിര്‍ദേശിച്ചിട്ടുണ്ട്. 1991ന് മുന്‍പ് ചില ചികിത്സകളിലൂടെയോ ദന്തചികിത്സകളിലൂടെയോ വൈറസ് ബാധിച്ചിരിക്കാനുള്ള സാധ്യത കണക്കിലെടുത്താണ് നിര്‍ദേശം. എന്‍എച്ച്എസിന്റെ സൗജന്യവും രഹസ്യാത്മകവുമായ ഹോം സെല്‍ഫ് ടെസ്റ്റിങ് കിറ്റ് ഓണ്‍ലൈനായി ഓര്‍ഡര്‍ ചെയ്യാന്‍ കഴിയും. പരിശോധനയ്ക്കായി ജിപിയെ നേരിട്ട് സമീപിക്കേണ്ടതില്ലെന്നതും ഇതിന്റെ പ്രത്യേകതയാണ്.

ലക്ഷണങ്ങളില്ലാതെ രോഗം കണ്ടെത്തിയ 65കാരന്‍

ബ്ലാക്ക്‌ബേണ്‍ സ്വദേശിയായ 65കാരന്‍ പോള്‍ ഈറ്റ്വെല്ലിന് പതിവ് രക്തപരിശോധനയ്ക്കിടെയാണ് ഹെപ്പറ്റൈറ്റിസ് സി കണ്ടെത്തിയത്. രോഗബാധയുണ്ടായിരുന്നെങ്കിലും യാതൊരു ലക്ഷണങ്ങളും ഉണ്ടായിരുന്നില്ലെന്ന് അദ്ദേഹം പറഞ്ഞു. പതിറ്റാണ്ടുകള്‍ക്ക് മുമ്പ് ദക്ഷിണാഫ്രിക്കയില്‍ നടത്തിയ ശസ്ത്രക്രിയയിലൂടെയാകാം വൈറസ് ബാധിച്ചതെന്നാണ് സംശയിക്കുന്നത്. എന്നാല്‍ രോഗബാധയുടെ കൃത്യമായ കാരണം സ്ഥിരീകരിച്ചിട്ടില്ല.

ഹെപ്പറ്റൈറ്റിസ് സി പകരുന്നത് രക്തത്തിലൂടെ

ഹെപ്പറ്റൈറ്റിസ് സി പ്രധാനമായും രക്തത്തിലൂടെയാണ് പകരുന്നത്. വൈറസ് ബാധിച്ച വ്യക്തി ഉപയോഗിച്ച സൂചികളും മറ്റ് ഉപകരണങ്ങളും പങ്കിടുന്നത് രോഗവ്യാപനത്തിന് പ്രധാന കാരണങ്ങളിലൊന്നാണ്. രക്തദാനത്തിലൂടെ രോഗം പകരുന്നത് തടയുന്നതിനായി ദാതാക്കളുടെ രക്തം പരിശോധനയ്ക്ക് വിധേയമാക്കുന്നുണ്ട്.

യുകെയിലെ ഇന്‍ഫെക്ടഡ് ബ്ലഡ് ദുരന്തവും പശ്ചാത്തലത്തില്‍

1970 മുതല്‍ 1991 വരെയുള്ള കാലഘട്ടത്തില്‍ മറ്റൊരാളുടെ രക്തമോ രക്തോല്‍പന്നങ്ങളോ സ്വീകരിച്ചതിലൂടെ യുകെയില്‍ 30,000ത്തിലധികം പേര്‍ക്ക് എച്ച്‌ഐവിയും ഹെപ്പറ്റൈറ്റിസ് സിയും ബാധിച്ച സംഭവവും രാജ്യത്തിന്റെ ആരോഗ്യചരിത്രത്തിലെ വലിയ ദുരന്തങ്ങളിലൊന്നായിരുന്നു. ഈ സംഭവവുമായി ബന്ധപ്പെട്ട് ഏകദേശം 3,000 പേര്‍ മരിച്ചതായും ഇനിയും മരണങ്ങള്‍ സംഭവിക്കാനിടയുണ്ടെന്നും റിപ്പോര്‍ട്ടുകള്‍ വ്യക്തമാക്കുന്നു. അധികൃതര്‍ അപകടസാധ്യതകള്‍ മറച്ചുവച്ചതായും രോഗികളെ അംഗീകരിക്കാനാകാത്ത അപകടത്തിലേക്ക് തള്ളിവിട്ടതായും അന്വേഷണ കമ്മിഷന്‍ കണ്ടെത്തിയിരുന്നു.

2030ന് മുന്‍പേ നിര്‍മാര്‍ജനമെന്ന പ്രതീക്ഷ

ഹെപ്പറ്റൈറ്റിസ് സി നിര്‍മാര്‍ജനത്തില്‍ ഇംഗ്ലണ്ട് ലോകത്തിലെ മുന്‍നിര രാജ്യങ്ങളിലൊന്നായി മാറുകയാണെന്നാണ് എന്‍എച്ച്എസിന്റെ വിലയിരുത്തല്‍. പരിശോധനയും ചികിത്സയും ഇതേ വേഗത്തില്‍ തുടര്‍ന്നാല്‍ ലോകാരോഗ്യ സംഘടന നിശ്ചയിച്ച 2030ലെ ലക്ഷ്യത്തിന് മുന്‍പുതന്നെ രോഗനിര്‍മാര്‍ജനത്തില്‍ നിര്‍ണായക നേട്ടം കൈവരിക്കാന്‍ ഇംഗ്ലണ്ടിന് കഴിയുമെന്നാണ് പ്രതീക്ഷ. ഹെപ്പറ്റൈറ്റിസ് സി ബാധിച്ചിരിക്കാനുള്ള സാധ്യതയുള്ളവര്‍ സൗജന്യ ഹോം ടെസ്റ്റിങ് സൗകര്യം ഉപയോഗപ്പെടുത്തി പരിശോധന നടത്തണമെന്നും ആരോഗ്യ അധികൃതര്‍ അഭ്യര്‍ഥിച്ചു.