ലണ്ടന്‍: നോര്‍ത്ത് ലണ്ടനിലെ ഇസ്ലിങ്ടണില്‍ 23 വയസ്സുകാരിയെ മരിച്ച നിലയില്‍ കണ്ടെത്തിയ സംഭവത്തില്‍ കൊലപാതക സംശയത്തില്‍ അറസ്റ്റിലായ ആറുപേരെയും ജാമ്യത്തില്‍ വിട്ടു. നാലു സ്ത്രീകളും രണ്ടു പുരുഷന്മാരുമാണ് അറസ്റ്റിലായത്. അന്വേഷണം തുടരുകയാണെന്ന് മെട്രോപൊളിറ്റന്‍ പൊലീസ് അറിയിച്ചു. ഓഗസ്റ്റ് ആറിന് രാവിലെ 9.33ഓടെ ബൊളിന്‍ഡര്‍ പ്ലേസിലെ താമസസ്ഥലത്ത് യുവതിയുടെ സുരക്ഷയെക്കുറിച്ച് ആശങ്കയുണ്ടെന്ന വിവരം ലഭിച്ചതിനെ തുടര്‍ന്നാണ് പൊലീസ് സ്ഥലത്തെത്തിയത്. ലണ്ടന്‍ ആംബുലന്‍സ് സര്‍വീസും ഒപ്പമുണ്ടായിരുന്നു. പ്രതികരണമില്ലാത്ത നിലയില്‍ കണ്ടെത്തിയ യുവതി സംഭവസ്ഥലത്തുവച്ചുതന്നെ മരിച്ചതായി സ്ഥിരീകരിച്ചു. സംഭവസ്ഥലത്തുനിന്ന് 20, 21, 23, 26 വയസ്സുള്ള നാലു സ്ത്രീകളെയും 21, 24 വയസ്സുള്ള രണ്ടു പുരുഷന്മാരെയും കൊലപാതക സംശയത്തില്‍ അറസ്റ്റ് ചെയ്തു. ചോദ്യം ചെയ്യലിനുശേഷം അന്വേഷണ വിധേയമായി ആറുപേരെയും ജാമ്യത്തില്‍ വിട്ടതായി പൊലീസ് അറിയിച്ചു.

മരിച്ച യുവതിയുടെ അടുത്ത ബന്ധുക്കളെ കണ്ടെത്താനുള്ള ശ്രമം തുടരുകയാണ്. ബന്ധുക്കളെ കണ്ടെത്തിയാല്‍ പ്രത്യേക പരിശീലനം ലഭിച്ച പൊലീസ് ഉദ്യോഗസ്ഥരുടെ സഹായവും പിന്തുണയും നല്‍കുമെന്നും അധികൃതര്‍ അറിയിച്ചു. മരണകാരണം ഉള്‍പ്പെടെ കണ്ടെത്തുന്നതിനായി ഫൊറന്‍സിക് പരിശോധനകളും മറ്റു അന്വേഷണ നടപടികളും പുരോഗമിക്കുകയാണ്. നിലവില്‍ ലഭ്യമായ വിവരങ്ങളുടെ അടിസ്ഥാനത്തില്‍ ഇത് ഒറ്റപ്പെട്ട സംഭവമാണെന്നും പൊതുജനങ്ങള്‍ക്ക് വ്യാപകമായ ഭീഷണിയില്ലെന്നും ചീഫ് സൂപ്രണ്ട് ജേസണ്‍ സ്റ്റുവര്‍ട്ട് പറഞ്ഞു. പ്രദേശവാസികള്‍ക്ക് ആശ്വാസം നല്‍കുന്നതിനായി പൊലീസ് സാന്നിധ്യം തുടരുമെന്നും അദ്ദേഹം വ്യക്തമാക്കി. ഡിറ്റക്ടീവ് ചീഫ് ഇന്‍സ്‌പെക്ടര്‍ പോള്‍ വാലറുടെ നേതൃത്വത്തിലാണ് അന്വേഷണം നടക്കുന്നത്. യുവതിയുടെ മരണത്തിന് തൊട്ടുമുമ്പുള്ള സംഭവവികാസങ്ങള്‍ കണ്ടെത്തുന്നതിനായി സാക്ഷിമൊഴികളും മറ്റു തെളിവുകളും ശേഖരിച്ചുവരികയാണ്. സംഭവത്തെക്കുറിച്ച് വിവരമുള്ളവര്‍ 101 എന്ന നമ്പറില്‍ വിളിച്ച് 3700/06AUG എന്ന റഫറന്‍സ് നമ്പര്‍ അറിയിച്ച് പൊലീസുമായി ബന്ധപ്പെടണമെന്ന് മെട്രോപൊളിറ്റന്‍ പൊലീസ് അഭ്യര്‍ഥിച്ചു.