ലണ്ടന്‍: ബ്രിട്ടനിലെ ക്ലാക്ടണ്‍ പാര്‍ലമെന്റ് മണ്ഡലത്തില്‍ നടന്ന ഉപതിരഞ്ഞെടുപ്പില്‍ റിഫോം യുകെ നേതാവ് നൈജല്‍ ഫാരേജ് വന്‍ ഭൂരിപക്ഷത്തോടെ വിജയിച്ചു. 22,239 വോട്ടുകള്‍ നേടിയ ഫാരേജിന് ആകെ പോള്‍ ചെയ്ത വോട്ടുകളുടെ 63.34 ശതമാനം ലഭിച്ചു. 12,784 വോട്ടാണ് അദ്ദേഹത്തിന്റെ ഭൂരിപക്ഷം. ഓഗസ്റ്റ് 13ന് നടന്ന ഉപതിരഞ്ഞെടുപ്പിന്റെ ഫലം 14നാണ് പ്രഖ്യാപിച്ചത്. ആക്ഷേപഹാസ്യ സ്ഥാനാര്‍ഥിയായ കൗണ്ട് ബിന്‍ഫേസ് 9,455 വോട്ടുമായി രണ്ടാം സ്ഥാനത്തെത്തി. 26.93 ശതമാനം വോട്ടാണ് ബിന്‍ഫേസിന് ലഭിച്ചത്. ലേബര്‍, കണ്‍സര്‍വേറ്റീവ് ഉള്‍പ്പെടെയുള്ള പ്രധാന വെസ്റ്റ്മിന്‍സ്റ്റര്‍ പാര്‍ട്ടികള്‍ സ്ഥാനാര്‍ഥികളെ നിര്‍ത്താതിരുന്ന തിരഞ്ഞെടുപ്പില്‍ ആകെ 34 സ്ഥാനാര്‍ഥികളാണ് മത്സരിച്ചത്. വോട്ടെടുപ്പ് ശതമാനം 44.37 ആയിരുന്നു.

രാജിവച്ച് അതേ മണ്ഡലത്തില്‍ വീണ്ടും മത്സരം

2024ലെ പൊതുതിരഞ്ഞെടുപ്പില്‍ ക്ലാക്ടണില്‍നിന്ന് ആദ്യമായി ബ്രിട്ടീഷ് പാര്‍ലമെന്റിലേക്ക് തിരഞ്ഞെടുക്കപ്പെട്ട ഫാരേജ് 2026 ജൂലൈ 8ന് എംപി സ്ഥാനം രാജിവച്ചതോടെയാണ് ഉപതിരഞ്ഞെടുപ്പിന് വഴിയൊരുങ്ങിയത്. തുടര്‍ന്ന് അതേ മണ്ഡലത്തില്‍ റിഫോം യുകെ സ്ഥാനാര്‍ഥിയായി വീണ്ടും മത്സരിക്കുമെന്ന് അദ്ദേഹം പ്രഖ്യാപിച്ചു. തന്റെ സാമ്പത്തിക ഇടപാടുകളെച്ചൊല്ലി ഉയര്‍ന്ന ആരോപണങ്ങള്‍ക്ക് ക്ലാക്ടണിലെ വോട്ടര്‍മാര്‍ തന്നെ വിധിയെഴുതട്ടെയെന്ന നിലപാടാണ് ഫാരേജ് സ്വീകരിച്ചത്. പ്രധാന രാഷ്ട്രീയ പാര്‍ട്ടികള്‍ മത്സരത്തില്‍നിന്ന് വിട്ടുനിന്നതോടെ തിരഞ്ഞെടുപ്പിനെ 'ജനങ്ങളും രാഷ്ട്രീയ സ്ഥാപനങ്ങളും തമ്മിലുള്ള പോരാട്ടം' എന്ന നിലയിലാണ് അദ്ദേഹം അവതരിപ്പിച്ചത്. 2024ലെ പൊതുതിരഞ്ഞെടുപ്പില്‍ ക്ലാക്ടണില്‍ ഫാരേജ് 21,225 വോട്ടാണ് നേടിയിരുന്നത്. ഇത്തവണ വോട്ടെടുപ്പ് ശതമാനം കുറഞ്ഞിട്ടും അദ്ദേഹത്തിന്റെ വോട്ട് 22,239 ആയി ഉയര്‍ന്നു. എന്നാല്‍ പ്രധാന പാര്‍ട്ടികള്‍ മത്സരിക്കാതിരുന്ന സാഹചര്യത്തില്‍ ലഭിച്ച വിജയത്തിന്റെ രാഷ്ട്രീയ പ്രാധാന്യത്തെച്ചൊല്ലി വിമര്‍ശനങ്ങളും ഉയര്‍ന്നിട്ടുണ്ട്.

കൗണ്ട് ബിന്‍ഫേസിന്റെ അപ്രതീക്ഷിത മുന്നേറ്റം

ഫാരേജിന്റെ പ്രധാന എതിരാളിയായി മാറിയത് രാഷ്ട്രീയ ആക്ഷേപഹാസ്യ കഥാപാത്രമായ കൗണ്ട് ബിന്‍ഫേസാണ്. ഏകദേശം 27 ശതമാനം വോട്ടുമായി രണ്ടാം സ്ഥാനത്തെത്തിയ ബിന്‍ഫേസിന്റെ പ്രകടനം ബ്രിട്ടനിലെ ആക്ഷേപഹാസ്യ സ്ഥാനാര്‍ഥികളുടെ തിരഞ്ഞെടുപ്പ് ചരിത്രത്തിലെ ശ്രദ്ധേയ നേട്ടമായി മാറി. പ്രധാന പാര്‍ട്ടികള്‍ വിട്ടുനിന്ന തിരഞ്ഞെടുപ്പില്‍ നിരവധി സ്വതന്ത്രരും ചെറുപാര്‍ട്ടി സ്ഥാനാര്‍ഥികളും രംഗത്തുണ്ടായിരുന്നു. ഇതോടെ 34 സ്ഥാനാര്‍ഥികളുമായി ക്ലാക്ടണ്‍ ഉപതിരഞ്ഞെടുപ്പ് അപൂര്‍വമായ മത്സരമായി മാറി.

ജയിച്ചെങ്കിലും സാമ്പത്തിക അന്വേഷണം തുടരും

ഉപതിരഞ്ഞെടുപ്പിലെ വിജയം ഫാരേജിനെതിരായ സാമ്പത്തിക ഇടപാടുകളുമായി ബന്ധപ്പെട്ട പരിശോധനകള്‍ക്ക് അവസാനമാകില്ല. ക്രിപ്‌റ്റോകറന്‍സി വ്യവസായി ക്രിസ്റ്റഫര്‍ ഹാര്‍ബണില്‍നിന്ന് ലഭിച്ചെന്ന് പറയുന്ന £5 മില്യന്‍ സാമ്പത്തിക സഹായം പാര്‍ലമെന്ററി ചട്ടങ്ങള്‍ക്കനുസരിച്ച് വെളിപ്പെടുത്തിയിരുന്നോ എന്നതുള്‍പ്പെടെയുള്ള കാര്യങ്ങളിലാണ് പാര്‍ലമെന്ററി സ്റ്റാന്‍ഡേര്‍ഡ്‌സ് അന്വേഷണം. ഫാരേജ് വീണ്ടും എംപിയായതോടെ നേരത്തെ സസ്‌പെന്‍ഡ് ചെയ്തിരുന്ന അന്വേഷണം വീണ്ടും 'ആക്ടീവ്' നിലയിലായിട്ടുണ്ട്. ഫാരേജ് ആരോപണങ്ങളില്‍ തെറ്റൊന്നും ചെയ്തിട്ടില്ലെന്നാണ് നിലപാട്.

ഇതിന് പുറമെ റിഫോം യുകെയ്ക്ക് ലഭിച്ച സംഭാവനകളുമായി ബന്ധപ്പെട്ട് മെട്രോപൊളിറ്റന്‍ പൊലീസും അന്വേഷണം നടത്തുന്നുണ്ട്. 2024 പൊതുതിരഞ്ഞെടുപ്പിന് മുന്നോടിയായി പാര്‍ട്ടിക്ക് നല്‍കിയ കുറഞ്ഞത് £500,000 സംഭാവനകളുടെ ഉറവിടവും നിയമാനുസൃതതയുമാണ് അന്വേഷണ പരിധിയിലുള്ളത്. രണ്ട് പേരെ ഇതിനകം പൊലീസ് ചോദ്യം ചെയ്‌തെങ്കിലും അറസ്റ്റ് രേഖപ്പെടുത്തിയിട്ടില്ല. ഇതോടെ ക്ലാക്ടണിലെ വന്‍ വിജയം ഫാരേജിന് ബ്രിട്ടീഷ് പാര്‍ലമെന്റിലേക്കുള്ള തിരിച്ചുവരവ് ഉറപ്പാക്കിയെങ്കിലും അദ്ദേഹത്തിന്റെയും റിഫോം യുകെയുടെയും സാമ്പത്തിക ഇടപാടുകളെ ചുറ്റിപ്പറ്റിയുള്ള വിവാദങ്ങളും അന്വേഷണങ്ങളും തുടരുമെന്നുറപ്പായി.