ലണ്ടന്‍: ബ്രിട്ടനില്‍ വ്യാഴാഴ്ച മുതല്‍ ഗാര്‍ഹിക ഊര്‍ജ ബില്ലില്‍ നാലുശതമാനം വര്‍ധന പ്രാബല്യത്തില്‍ വരുന്നതോടെ ദശലക്ഷക്കണക്കിന് കുടുംബങ്ങളുടെ ചെലവുഭാരം ഉയരും. സാധാരണ കുടുംബത്തിന്റെ ശരാശരി വാര്‍ഷിക ഊര്‍ജ ചെലവ് 1,723 പൗണ്ടിലെത്തുമെന്നാണ് കണക്ക്. ഇതോടെ പുതിയ ഊര്‍ജ സഹായപദ്ധതി പ്രഖ്യാപിക്കണമെന്ന ആവശ്യവുമായി ധനമന്ത്രി ജോണ്‍ ഹീലിക്കുമേല്‍ സമ്മര്‍ദം ശക്തമാകുന്നു. ഗ്രേറ്റ് ബ്രിട്ടനിലെ ഊര്‍ജവില പരിധി നിശ്ചയിക്കുന്ന റെഗുലേറ്ററായ ഓഫ്ജെമാണ് വര്‍ധന പ്രഖ്യാപിച്ചത്. മൂന്നുവര്‍ഷത്തിനിടയിലെ ഏറ്റവും ഉയര്‍ന്ന നിലയിലേക്കാണ് വിലപരിധി എത്തുന്നത്.
ഒക്ടോബര്‍ ഒന്നുമുതല്‍ വൈദ്യുതി ബില്ലിലെ വാറ്റ് കുറയ്ക്കാനുള്ള പ്രധാനമന്ത്രി ആന്‍ഡി ബേണ്‍ഹാമിന്റെ തീരുമാനത്തിലൂടെ ശരാശരി കുടുംബത്തിന് വര്‍ഷം 45 പൗണ്ട് ലാഭിക്കാനാകുമെന്നാണ് കണക്കാക്കുന്നത്. എന്നാല്‍ മൊത്തത്തിലുള്ള ബില്‍ വര്‍ധന മറികടക്കാന്‍ ഈ ഇളവ് മതിയാകില്ലെന്നാണ് വിലയിരുത്തല്‍. ഇതിനിടെ ഡീസല്‍ വിലയും റെക്കോര്‍ഡ് ഉയരത്തിലെത്തിയത് ആശങ്ക വര്‍ധിപ്പിക്കുന്നു. ഈ ആഴ്ച ലിറ്ററിന് ഏകദേശം രണ്ടു പൗണ്ടിലെത്തിയതോടെ ഗതാഗതച്ചെലവും അവശ്യസാധനങ്ങളുടെ വിലയും ഉയരാനുള്ള സാധ്യതയുണ്ട്.
ഒക്ടോബര്‍ 28ന് അവതരിപ്പിക്കുന്ന ബജറ്റില്‍ സര്‍ക്കാര്‍ ചെലവുകള്‍ നിയന്ത്രിക്കുന്നതിനായിരിക്കും മുന്‍ഗണനയെന്ന് ട്രഷറി വൃത്തങ്ങള്‍ സൂചിപ്പിക്കുന്നു. ആഗോള സാമ്പത്തിക പ്രതിസന്ധിക്കൊപ്പം ബോണ്ട് വിപണിയിലെ അനിശ്ചിതത്വവും പൊതു ധനകാര്യത്തിനുമേല്‍ സമ്മര്‍ദം വര്‍ധിപ്പിക്കുന്നുണ്ട്. ജീവിതച്ചെലവ് ഉയരുന്ന സാഹചര്യത്തില്‍ കുടുംബങ്ങള്‍ക്ക് അടിയന്തര ഊര്‍ജ സഹായം നല്‍കണമെന്ന് ചില ലേബര്‍ എംപിമാരും ആവശ്യപ്പെട്ടു. ധനമന്ത്രി വൈകാതെ ആശ്വാസനടപടികള്‍ പ്രഖ്യാപിച്ചേക്കുമെന്നാണ് പ്രതീക്ഷ.
