ലണ്ടന്‍: 19 വയസ്സിന് മുകളില്‍ പ്രായമുള്ള അപ്രന്റീസുകള്‍ക്ക് തൊഴില്‍ പരിശീലനം പൂര്‍ത്തിയാക്കാന്‍ കണക്ക്, ഇംഗ്ലിഷ് യോഗ്യതകള്‍ ഇനി ആവശ്യമില്ലെന്ന് യുകെ വിദ്യാഭ്യാസ വകുപ്പ് (ഡിഎഫ്ഇ). തൊഴില്‍ പരിശീലന കാലം പന്ത്രണ്ടില്‍ നിന്ന് 8 മാസമായും കുറച്ചിട്ടുണ്ട്. 19 വയസ്സിന് മുകളില്‍ പ്രായമുള്ള അപ്രന്റിസുകള്‍ക്ക് കോഴ്‌സ് പാസാകാന്‍ ലെവല്‍ 2 ഇംഗ്ലിഷ്, കണക്ക് യോഗ്യത (ജിസിഎസ്ഇക്ക് തത്തുല്യം) വേണോ വേണ്ടയോ എന്നത് തൊഴിലുടമകള്‍ക്ക് തീരുമാനിക്കാം. ഇതു സംബന്ധിച്ച ചട്ടം ഉടന്‍ പ്രാബല്യത്തിലാകും. അതേസമയം തൊഴില്‍ പരിശീലന കാലത്തിന്റെ കുറഞ്ഞ കാലയളവ് 8 മാസമായി കുറച്ചുകൊണ്ടുള്ള വ്യവസ്ഥ ഈ വര്‍ഷം ഓഗസ്റ്റ് മുതലാണ് പ്രാബല്യത്തിലാകുക.

ദേശീയ അപ്രന്റിസ്ഷിപ്പ് വാരാഘോഷത്തിന്റെ ഭാഗമായി സൗത്ത് ലണ്ടനിലെ ഹൗസിങ് ഡവലപ്‌മെന്റ് സൈറ്റ് സന്ദര്‍ശനത്തോട് അനുബന്ധിച്ചാണ് എജ്യൂക്കേഷന്‍ സെക്രട്ടറി ബ്രിഡ്ജറ്റ് ഫിലിപ്‌സണ്‍ പുതിയ മാറ്റം പ്രഖ്യാപിച്ചത്. തൊഴില്‍ പരിശീലന കാലം കുറയ്ക്കണമെന്ന തൊഴിലുടമകളുടെ ആവശ്യപ്രകാരമാണ് പുതിയ മാറ്റമെന്നും അദ്ദേഹം കൂട്ടിച്ചേര്‍ത്തു. നിലവിലെ ചട്ട പ്രകാരം ലെവല്‍ 2 അപ്രന്റിസ്ഷിപ്പിന് ഇംഗ്ലിഷ്, കണക്ക് യോഗ്യത നിര്‍ബന്ധമാണ്. അപ്രന്റിസ്ഷിപ്പ് യോഗ്യതകള്‍ സംബന്ധിച്ച പുതിയ മാറ്റം പ്രതിവര്‍ഷം തൊഴില്‍ പരിശീലന മേഖലയിലെ പതിനായിരത്തോളം പേര്‍ക്ക് യോഗ്യത നേടാന്‍ ഗുണകരമാകും. ആരോഗ്യം, സാമൂഹിക പരിചരണം, നിര്‍മാണം എന്നീ മേഖലകളിലുള്ളവര്‍ക്കെല്ലാം പ്രയോജനം ചെയ്യും. ഹരിത ഊര്‍ജം, ആരോഗ്യ പരിചരണം, സിനിമ-ടെലിവിഷന്‍ പ്രൊഡക്ഷന്‍ എന്നീ മേഖലകളിലെ തൊഴിലാളി ക്ഷാമം പരിഹരിക്കാന്‍ ലക്ഷ്യമിട്ടാണ് പുതിയ പരിഷ്‌കാരങ്ങള്‍. അതേസമയം പരിശീലനത്തിന്റെ ഭാഗമായി ഇംഗ്ലിഷ്, കണക്ക് പരിശീലനവും ഉണ്ടായിരിക്കും. ഏതിലാണോ പരിശീലനം അതുമായി നേരിട്ട് ബന്ധിപ്പിച്ചിട്ടുള്ളതായിരിക്കുമിത്.

നിലവിലെ അപ്രന്റിസ്ഷിപ്പ് കരത്തിന് (ലെവി) പകരമായി ഫൗണ്ടേഷന്‍ അപ്രന്റിസ്ഷിപ്പ് ഉള്‍പ്പെടുത്തിയുള്ള പുതിയ ലെവി ഏര്‍പ്പെടുത്തും. ഹ്രസ്വകാല അപ്രന്റിസ്ഷിപ്പിനുള്ള ഫണ്ട് അനുവദിക്കുന്നതാണിത്. പഠിതാക്കള്‍ക്കും തൊഴിലുടമകള്‍ക്കും ഇതു പ്രയോജനം ചെയ്യുമെന്നും വിദ്യാഭ്യാസ സെക്രട്ടറി വിശദമാക്കി. യുകെയില്‍ പഠനം പൂര്‍ത്തിയാക്കി തൊഴില്‍ പരിശീലനത്തില്‍ ഏര്‍പ്പെടുന്ന നൂറുകണക്കിന് ഇന്ത്യന്‍ ഉദ്യോഗാര്‍ഥികള്‍ക്കുള്‍പ്പെടെയുള്ളവര്‍ക്ക് പുതിയ ചട്ടം പ്രയോജനം ചെയ്യും.