മാഞ്ചസ്റ്റര്‍: കബാബ് ഓര്‍ഡര്‍ ചെയ്യാനായി തെരുവിലെ പഴയ റെഡ് ടെലിഫോണ്‍ ബൂത്തില്‍ കയറിയ യുവാവിന് അസാധാരണമായ അനുഭവം. ഡീന്‍സ്‌ഗേറ്റിലെ ഫോണ്‍ബൂത്തില്‍ കയറിയ ഉടന്‍ വാതില്‍ അടഞ്ഞ് ലോക്കായതോടെ, യുവാവ് ഏകദേശം ഒരു മണിക്കൂറോളം അതിനുള്ളില്‍ കുടുങ്ങിപ്പോയി.
ബൂത്തിനുള്ളിലെ ഫോണ്‍ പ്രവര്‍ത്തനക്ഷമമല്ലെന്ന് തിരിച്ചറിഞ്ഞപ്പോള്‍, പുറത്തുകടക്കാന്‍ ശ്രമിച്ചെങ്കിലും വാതില്‍ തുറക്കാനായില്ല. ബ്രിട്ടീഷ് ടെലികോം (BT) എഞ്ചിനീയര്‍മാര്‍ക്കാണ് ഇത്തരം ബൂത്തുകളുടെ താക്കോല്‍ ഉള്ളത്. അതിനാല്‍ തന്നെ യുവാവിന് പുറത്തുകടക്കാന്‍ വഴിയില്ലാതെയായി.
സുഹൃത്തുക്കള്‍ ആദ്യം സംഭവം തമാശയായി എടുത്തെങ്കിലും, വാതില്‍ തുറക്കാനായില്ലെന്ന് കണ്ടപ്പോള്‍ പരിഭ്രാന്തരായി. ഏകദേശം ഒരു മണിക്കൂറോളം ശ്രമിച്ചെങ്കിലും ഫലം കണ്ടില്ല. ഒടുവില്‍ ഫയര്‍ഫോഴ്‌സിനെ വിളിക്കേണ്ടിവന്നു. അഗ്‌നിശമന സേനാംഗങ്ങള്‍ എത്തി വാതില്‍ ബലമായി തുറന്നാണ് യുവാവിനെ പുറത്തെടുത്തത്.
സംഭവം സമൂഹമാധ്യമങ്ങളില്‍ വലിയ ചര്‍ച്ചകള്‍ക്ക് വഴിവെച്ചു. 'കബാബ് ഓര്‍ഡറിന് പിന്നില്‍ നല്ലൊരു അളവ് മദ്യം ഉണ്ടായിരിക്കാം' എന്നായിരുന്നു ഭൂരിഭാഗം ഉപയോക്താക്കളുടെ അഭിപ്രായം. ചിലര്‍ ഇത് 'നിര്‍ഭാഗ്യകരമായ കബാബ് ഓര്‍ഡര്‍' എന്ന് വിശേഷിപ്പിച്ചു
