ലണ്ടന്: ഇംഗ്ലണ്ടിലെ പ്രാദേശിക മേയര്മാര്ക്ക് പൊതു സേവനങ്ങളുടെ മേല്നോട്ടത്തില് കൂടുതല് അധികാരം നല്കുന്ന നിര്ദേശങ്ങള് ലേബര് വൃത്തങ്ങളില് ചര്ച്ചയാകുന്നു. സോഷ്യല് കെയര്, ചൈല്ഡ് കെയര്, പൊതുജനാരോഗ്യം, വിദ്യാഭ്യാസം, പൊലീസ് സേവനം തുടങ്ങിയ മേഖലകളില് പ്രാദേശിക തലത്തില് കൂടുതല് ഇടപെടലിനും ഉത്തരവാദിത്വത്തിനും മേയര്മാരെ സജ്ജമാക്കണമെന്നാണ് പുതിയ നിര്ദേശം. ThinkLabour-ന്റെ ഡിവല്യൂഷന് നയവിഭാഗം മേധാവി ജെ.പി. സ്പെന്സറാണ് നിര്ദേശങ്ങള് മുന്നോട്ടുവച്ചത്. വെസ്റ്റ്മിന്സ്റ്ററിലേക്കും വൈറ്റ്ഹോളിലേക്കും അധികാരം കേന്ദ്രീകരിച്ചിരിക്കുന്ന നിലവിലെ സംവിധാനത്തില് മാറ്റം വരുത്തി, ജനങ്ങളോട് അടുത്തുള്ള പ്രാദേശിക ഭരണ സംവിധാനങ്ങളെ ശക്തിപ്പെടുത്തണമെന്നാണ് സ്പെന്സറിന്റെ നിലപാട്. പൊതു സേവനങ്ങള് കൂടുതല് കാര്യക്ഷമമാക്കാനും പ്രാദേശിക ആവശ്യങ്ങള്ക്കനുസരിച്ച് നയങ്ങള് രൂപപ്പെടുത്താനും മേയര്മാര്ക്ക് കൂടുതല് അധികാരം നല്കുന്നത് സഹായകരമാകുമെന്നാണ് നിര്ദേശത്തില് പറയുന്നത്.
ഇതനുസരിച്ച് മേയര്മാര്ക്ക് ആരോഗ്യ, വിദ്യാഭ്യാസ മേഖലകളില് പ്രത്യേക കമ്മീഷണര്മാരെ നിയമിക്കാനുള്ള അധികാരം ലഭിക്കാം. സ്കൂളുകള്, ജിപി സേവനങ്ങള്, ശിശുപരിപാലന കേന്ദ്രങ്ങള്, സാമൂഹിക പരിചരണ സംവിധാനങ്ങള് എന്നിവയുടെ പ്രവര്ത്തനം മെച്ചപ്പെടുത്തുന്നതില് ഇവര്ക്ക് പ്രധാന പങ്കുണ്ടാകും. നിലവില് പൊലീസ് ആന്ഡ് ക്രൈം കമ്മീഷണര്മാര് നിര്വഹിക്കുന്നതുപോലുള്ള ഉത്തരവാദിത്വമാണ് ആരോഗ്യ-വിദ്യാഭ്യാസ കമ്മീഷണര്മാര്ക്കും നല്കാന് കഴിയുകയെന്നാണ് നിര്ദേശം. ഇതിനിടെ, പ്രധാനമന്ത്രി സ്ഥാനത്തേക്ക് മുന്നേറുന്ന ആന്ഡി ബേണ്ഹാം അധികാരത്തിലെത്തിയാല് ഡൗണിങ് സ്ട്രീറ്റിന്റെ ചില പ്രവര്ത്തനങ്ങള് മാഞ്ചസ്റ്ററിലേക്ക് മാറ്റാനുള്ള പദ്ധതി പ്രഖ്യാപിച്ചിട്ടുണ്ട്. 'No 10 North' എന്ന ആശയത്തിന്റെ ഭാഗമായി മാഞ്ചസ്റ്ററില് പ്രധാനമന്ത്രിയുടെ ഓഫീസിന്റെ വടക്കന് കേന്ദ്രം സ്ഥാപിക്കാനാണ് നീക്കം. അധികാരം ലണ്ടനില് മാത്രം കേന്ദ്രീകരിക്കാതെ രാജ്യത്തിന്റെ വിവിധ ഭാഗങ്ങളിലേക്ക് വ്യാപിപ്പിക്കണമെന്നതാണ് ബേണ്ഹാമിന്റെ നിലപാട്.
മാഞ്ചസ്റ്ററിലെ അന്കോറ്റ്സ് പ്രദേശത്ത് ഏകദേശം 8,800 സിവില് സര്വന്റുമാര്ക്ക് പ്രവര്ത്തിക്കാവുന്ന ഡിജിറ്റല് ഗവണ്മെന്റ് ക്യാമ്പസ് രൂപപ്പെടുത്തുന്നതും പദ്ധതിയുടെ ഭാഗമായേക്കും. ബേണ്ഹാം ലണ്ടനിലും മാഞ്ചസ്റ്ററിലും സമയം പങ്കിട്ട് പ്രവര്ത്തിക്കുമെന്ന സൂചനകളും പുറത്തുവരുന്നുണ്ട്. എന്നാല് സുരക്ഷ, യാത്ര, അടിസ്ഥാന സൗകര്യ ചെലവ് എന്നിവയുമായി ബന്ധപ്പെട്ട പ്രായോഗിക വെല്ലുവിളികളും ഉയരുന്നുണ്ട്. ലേബറിന്റെ ജനപ്രീതി വീണ്ടെടുക്കാനും പ്രാദേശിക ഭരണത്തില് ജനങ്ങള്ക്ക് നേരിട്ട് അനുഭവപ്പെടുന്ന മാറ്റങ്ങള് കൊണ്ടുവരാനുമാണ് പുതിയ ഡിവല്യൂഷന് നീക്കങ്ങള് ലക്ഷ്യമിടുന്നത്. മേയര്മാര്ക്ക് കൂടുതല് അധികാരം നല്കുന്നത് പ്രാദേശിക വികസനത്തിനും സേവന വിതരണത്തിനും ഗുണകരമാകുമെന്ന് അനുകൂലികള് വിലയിരുത്തുന്നു. അതേസമയം അധികാര കൈമാറ്റം കൂടുതല് ബ്യൂറോക്രസിയിലേക്ക് നയിക്കാതിരിക്കാനും വൈറ്റ്ഹോളിലെ സംവിധാനങ്ങള് അതിനനുസരിച്ച് പുനഃക്രമീകരിക്കാനും സര്ക്കാര് ശ്രദ്ധിക്കേണ്ടിവരുമെന്നാണ് മുന്നറിയിപ്പ്.
