മദ്യപാനത്തിന്റെ അളവും ഉപയോഗിക്കുന്ന മദ്യത്തിന്റെ തരവും മരണസാധ്യതയുമായി ബന്ധപ്പെട്ടിരിക്കുന്നതായി പുതിയ പഠനം. ഉയര്‍ന്ന അളവിലുള്ള മദ്യപാനത്തിനൊപ്പം മിതമായ ഉപയോഗത്തിലും ചില അര്‍ബുദങ്ങള്‍ മൂലമുള്ള മരണസാധ്യത വര്‍ധിക്കുന്നതായി ഗവേഷകര്‍ നിരീക്ഷിച്ചു. യുകെ ബയോബാങ്കിലെ വിവരങ്ങള്‍ വിശകലനം ചെയ്ത പഠനം 'ന്യൂട്ട്രീഷ്യന്‍ ജേണലിലാണ്' പ്രസിദ്ധീകരിച്ചത്. മൂന്നുലക്ഷത്തി നാല്‍പതിനായിരത്തിലധികം പേരുടെ വിവരങ്ങളാണ് ഗവേഷണത്തിന് ഉപയോഗിച്ചത്. മുമ്പ് മദ്യപാനം നിര്‍ത്തിയവരെയും ഹൃദ്രോഗമോ അര്‍ബുദമോ ഉണ്ടായിരുന്നവരെയും പഠനത്തില്‍നിന്ന് ഒഴിവാക്കി. പങ്കെടുത്തവരുടെ ശരാശരി പ്രായം 56 വയസ്സായിരുന്നു. പകുതിയിലധികവും സ്ത്രീകളായിരുന്നു. മദ്യപാനശീലം, ഭക്ഷണരീതി, ജീവിതശൈലി എന്നിവ ചോദ്യാവലികളിലൂടെ ശേഖരിച്ചു. ആഴ്ചയില്‍ ഉപയോഗിക്കുന്ന ശുദ്ധമായ ആല്‍ക്കഹോളിന്റെ അളവനുസരിച്ചാണ് പങ്കെടുത്തവരെ തരംതിരിച്ചത്. ആഴ്ചയില്‍ 20 ഗ്രാമില്‍ താഴെ ആല്‍ക്കഹോള്‍ ഉപയോഗിക്കുന്നവരെ കുറഞ്ഞ ഉപയോഗമുള്ള വിഭാഗത്തില്‍ ഉള്‍പ്പെടുത്തി.

ശരാശരി 13.4 വര്‍ഷത്തെ നിരീക്ഷണത്തിനിടെ 22,381 മരണങ്ങള്‍ രേഖപ്പെടുത്തി. കൂടുതല്‍ മദ്യം ഉപയോഗിക്കുന്നവരില്‍ അര്‍ബുദം, ഹൃദ്രോഗം, മറ്റ് രോഗങ്ങള്‍ എന്നിവ മൂലമുള്ള മരണനിരക്ക് ഉയര്‍ന്നതായി കണ്ടെത്തി. ബിയര്‍, സിഡര്‍, സ്പിരിറ്റ്‌സ് എന്നിവയുടെ ഉയര്‍ന്ന ഉപയോഗവും വര്‍ധിച്ച മരണസാധ്യതയുമായി ബന്ധപ്പെട്ടിരുന്നു. കുറഞ്ഞ അളവില്‍ റെഡ് വൈന്‍ ഉപയോഗിക്കുന്നവരില്‍ ഹൃദ്രോഗവുമായി ബന്ധപ്പെട്ട ചില അനുകൂല ബന്ധങ്ങള്‍ നിരീക്ഷിച്ചെങ്കിലും, അതിനെ റെഡ് വൈനിന്റെ സംരക്ഷണഫലമായി ഉറപ്പിക്കാനാവില്ല. ഉയര്‍ന്ന ഉപയോഗം അര്‍ബുദസാധ്യതയുമായി ബന്ധപ്പെട്ടിരുന്നു. വൈറ്റ് വൈന്‍, ഫോര്‍ട്ടിഫൈഡ് വൈന്‍ എന്നിവ കൂടുതലായി ഉപയോഗിക്കുന്നവരിലും മരണനിരക്ക് ഉയര്‍ന്നതായി പഠനം ചൂണ്ടിക്കാട്ടുന്നു.

ഭക്ഷണത്തോടൊപ്പം മദ്യപിക്കുന്നവരും മറ്റ് സമയങ്ങളില്‍ മദ്യപിക്കുന്നവരും തമ്മിലും ആരോഗ്യഫലങ്ങളില്‍ വ്യത്യാസങ്ങള്‍ രേഖപ്പെടുത്തി. പുരുഷന്മാര്‍, താരതമ്യേന പ്രായം കുറഞ്ഞവര്‍, പുകവലിക്കുന്നവര്‍ എന്നീ വിഭാഗങ്ങളില്‍ മദ്യപാനവുമായി ബന്ധപ്പെട്ട മരണസാധ്യത കൂടുതല്‍ പ്രകടമായിരുന്നുവെന്നും വിശകലനം സൂചിപ്പിക്കുന്നു. നിരീക്ഷണവിവരങ്ങളെ അടിസ്ഥാനമാക്കിയുള്ള പഠനമായതിനാല്‍ കണ്ടെത്തിയ ബന്ധങ്ങള്‍ നേരിട്ടുള്ള കാരണഫലബന്ധം തെളിയിക്കുന്നില്ല. ഭക്ഷണരീതിയും പുകവലിയും മറ്റ് ജീവിതശൈലിഘടകങ്ങളും ഫലങ്ങളെ സ്വാധീനിച്ചിരിക്കാം. അതിനാല്‍ ഏതെങ്കിലും മദ്യവിഭാഗം സുരക്ഷിതമാണെന്നോ ഭക്ഷണത്തോടൊപ്പം മദ്യപിക്കുന്നത് അപകടം ഒഴിവാക്കുമെന്നോ ഈ കണ്ടെത്തലുകളില്‍നിന്ന് നിഗമനം ചെയ്യാനാവില്ല.