ലാറ്റിന്‍ അമേരിക്കന്‍ ഇടതുപക്ഷത്തിന്റെ പ്രമുഖ മുഖവും യുഎസ് പ്രസിഡന്റ് ഡൊണാള്‍ഡ് ട്രംപിന്റെ കടുത്ത വിമര്‍ശകനുമായ ലുല ഡ സില്‍വ നാലാം തവണയും ബ്രസീല്‍ പ്രസിഡന്റായി തിരഞ്ഞെടുക്കപ്പെട്ടു. മുന്‍ തീവ്രവലതുപക്ഷ പ്രസിഡന്റ് ജെയര്‍ ബോള്‍സോനാരോയുടെ മകനും വലതുപക്ഷ സെനറ്ററുമായ ഫ്‌ലാവിയോ ബോള്‍സോനാരോയ്ക്കെതിരെയാണ് ലുലയുടെ വിജയം.
ആദ്യ റൗണ്ടില്‍ തന്നെ പരാജയപ്പെടുത്തിയ എതിരാളിയെയാണ് അദ്ദേഹം രണ്ടാം ഘട്ടത്തില്‍ മറികടന്നത്. സുപ്പീരിയര്‍ ഇലക്ടറല്‍ കോര്‍ട്ട് പുറത്തുവിട്ട കണക്കുകള്‍ പ്രകാരം, സാധുവായ വോട്ടുകളില്‍ 51.8 ശതമാനം നേടിയാണ് ലുല വിജയിച്ചത്. ബോള്‍സോനാരോയ്ക്ക് ലഭിച്ചത് 48.2 ശതമാനം വോട്ടുകളാണ്. അതേസമയം, തോല്‍വി അംഗീകരിക്കാന്‍ ബോള്‍സോനാരോ തയ്യാറായില്ല. വോട്ടിംഗ് സമയം നീട്ടിയത് കീഴ്വഴക്കം ഇല്ലാത്ത നടപടിയാണെന്ന് അദ്ദേഹം വിശേഷിപ്പിച്ചു.ഫലങ്ങള്‍ അംഗീകരിക്കാന്‍ കഴിയാത്തതാണെന്നും തിരഞ്ഞെടുപ്പ് ഫലം റദ്ദാക്കണമെന്നും അദ്ദേഹം ആവശ്യപ്പെട്ടു.
ലാറ്റിന്‍ അമേരിക്കയില്‍ വര്‍ദ്ധിച്ചുവരുന്ന യുഎസ് സ്വാധീനത്തെ എതിര്‍ക്കുന്നവര്‍ക്ക് വലിയ ആശ്വാസമാണ് ഈ തിരഞ്ഞെടുപ്പ് ഫലം നല്‍കിയിരിക്കുന്നത്. ലാറ്റിന്‍ അമേരിക്കയിലെ ഏറ്റവും ജനസംഖ്യയുള്ള രണ്ട് രാജ്യങ്ങളായ മെക്‌സിക്കോയിലും ബ്രസീലിലും ഇപ്പോള്‍ ഇടതുപക്ഷ ചായ്വുള്ള നേതാക്കളാണ് അധികാരത്തിലുള്ളത്. രണ്ടാം ഘട്ട വിജയം ഇലക്ടറല്‍ കോര്‍ട്ട് സ്ഥിരീകരിച്ചതിന് ശേഷം ഫസ്റ്റ് ലേഡി റൊസാഞ്ചല ഡ സില്‍വയ്ക്കും സഹപ്രവര്‍ത്തകര്‍ക്കുമൊപ്പം വിജയം ആഘോഷിക്കുന്ന ലുലയുടെ വീഡിയോ അദ്ദേഹത്തിന്റെ ക്യാമ്പ് പുറത്തുവിട്ടു.