ലണ്ടന്‍: ബ്രിട്ടിഷ് രാഷ്ട്രീയത്തില്‍ വീണ്ടും വന്‍ വിവാദത്തിന് തിരികൊളുത്തി റിഫോം യുകെ നേതാവ് നൈജല്‍ ഫരാജും അദ്ദേഹത്തിന്റെ അടുത്ത വിശ്വസ്തനായ ജോര്‍ജ് കോട്രലുമായുള്ള സാമ്പത്തിക ബന്ധം. 'പോഷ് ജോര്‍ജ്' എന്നറിയപ്പെടുന്ന, അമേരിക്കയില്‍ വയര്‍ ഫ്രോഡ് കേസില്‍ ശിക്ഷിക്കപ്പെട്ട കോട്രല്‍ ഫരാജിന് നല്‍കിയതായി ആരോപിക്കപ്പെടുന്ന വിവിധ ആനുകൂല്യങ്ങള്‍ പാര്‍ലമെന്റില്‍ വെളിപ്പെടുത്തിയില്ലെന്ന റിപ്പോര്‍ട്ടുകളാണ് പുതിയ രാഷ്ട്രീയ കൊടുങ്കാറ്റിന് കാരണമായിരിക്കുന്നത്. ബ്രിട്ടിഷ് മാധ്യമങ്ങളുടെ അന്വേഷണ റിപ്പോര്‍ട്ടുകള്‍ പ്രകാരം, ഫരാജ് എംപിയായി തിരഞ്ഞെടുക്കപ്പെടുന്നതിന് മുന്‍പുള്ള ഒരു വര്‍ഷക്കാലത്ത് സ്വകാര്യ സുരക്ഷാ സംവിധാനം, ഡ്രൈവര്‍മാര്‍, സമൂഹമാധ്യമ പ്രവര്‍ത്തനങ്ങള്‍ കൈകാര്യം ചെയ്ത ജീവനക്കാര്‍, താമസസൗകര്യം എന്നിവ ഉള്‍പ്പെടെ കോട്രല്‍ വിവിധ സഹായങ്ങള്‍ നല്‍കിയെന്നാണ് ആരോപണം. ബക്കിങ്ങാം കൊട്ടാരത്തിന് സമീപം കോട്രല്‍ വാടകയ്ക്ക് എടുത്തിരുന്ന ആഡംബര വസതി ഫരാജ് ഉപയോഗിച്ചിരുന്നതായും റിപ്പോര്‍ട്ടുകളുണ്ട്.

എന്നാല്‍ ഈ ആനുകൂല്യങ്ങള്‍ പാര്‍ലമെന്റിലെ അംഗങ്ങളുടെ സാമ്പത്തിക താല്‍പര്യ രജിസ്റ്ററില്‍ ഉള്‍പ്പെടുത്തിയിട്ടില്ലെന്നതാണ് വിവാദത്തിന്റെ കേന്ദ്രബിന്ദു. എംപിയായി തിരഞ്ഞെടുക്കപ്പെടുന്നതിന് മുന്‍പുള്ള കാലയളവില്‍ ലഭിച്ച ചില ആനുകൂല്യങ്ങളും രാഷ്ട്രീയ പ്രവര്‍ത്തനവുമായി ബന്ധമുള്ളതാണെങ്കില്‍ വെളിപ്പെടുത്തല്‍ ചട്ടങ്ങളുടെ പരിധിയില്‍ വരാമെന്ന വാദമാണ് വിമര്‍ശകര്‍ ഉയര്‍ത്തുന്നത്. ആരോപണങ്ങള്‍ നൈജല്‍ ഫരാജ് ശക്തമായി നിഷേധിച്ചു. താന്‍ ഒരു ചട്ടവും ലംഘിച്ചിട്ടില്ലെന്നും എല്ലാ നിയമങ്ങളും പാലിച്ചിട്ടുണ്ടെന്നും ഫരാജ് വ്യക്തമാക്കി. റിഫോം യുകെയെ ലക്ഷ്യമിട്ടുള്ള സ്ഥാപിത രാഷ്ട്രീയ ശക്തികളുടെ ആക്രമണമാണ് നടക്കുന്നതെന്നും റിപ്പോര്‍ട്ട് പ്രസിദ്ധീകരിച്ച മാധ്യമത്തിനെതിരെ നിയമനടപടി പരിഗണിക്കുമെന്നും അദ്ദേഹം സൂചിപ്പിച്ചു. അതേസമയം, സഹായങ്ങള്‍ ലഭിച്ച സമയത്ത് ഫരാജ് എംപിയായിരുന്നില്ലെന്നും കോട്രല്‍ വ്യക്തിപരമായ സൗഹൃദത്തിന്റെ അടിസ്ഥാനത്തിലാണ് പിന്തുണ നല്‍കിയതെന്നും റിഫോം യുകെ വിശദീകരിക്കുന്നു. അതിനാല്‍ അവ പാര്‍ലമെന്ററി രജിസ്റ്ററില്‍ രേഖപ്പെടുത്തേണ്ട ബാധ്യത ഉണ്ടായിരുന്നില്ലെന്നാണ് പാര്‍ട്ടിയുടെ നിലപാട്.

അന്വേഷണം ആവശ്യപ്പെട്ട് പ്രതിപക്ഷം

വിവാദത്തില്‍ പാര്‍ലമെന്ററി സ്റ്റാന്‍ഡേര്‍ഡ്‌സ് കമ്മിഷണര്‍ അന്വേഷണം നടത്തണമെന്ന് ലിബറല്‍ ഡെമോക്രാറ്റ് എംപി ജോഷ് ബബരിന്‍ഡെ ആവശ്യപ്പെട്ടു. കോട്രലുമായുള്ള സാമ്പത്തികവും വ്യക്തിപരവുമായ ബന്ധത്തിന്റെ യഥാര്‍ഥ ചിത്രം ഫരാജ് ബ്രിട്ടിഷ് ജനതയ്ക്കു മുന്നില്‍ പൂര്‍ണമായി വെളിപ്പെടുത്തണമെന്നും അദ്ദേഹം ആവശ്യപ്പെട്ടു. അന്വേഷണ സംവിധാനങ്ങളെ ആക്രമിക്കുന്നതിനു പകരം പാര്‍ലമെന്ററി ചട്ടങ്ങള്‍ പൂര്‍ണമായി പാലിച്ചുവെന്ന് തെളിയിക്കുകയാണ് ഫരാജ് ചെയ്യേണ്ടതെന്ന് മുതിര്‍ന്ന ലേബര്‍ നേതാവും മുന്‍ പാര്‍ലമെന്ററി സ്റ്റാന്‍ഡേര്‍ഡ്‌സ് കമ്മിറ്റി അധ്യക്ഷയുമായ ബാരോണസ് ഹാരിയറ്റ് ഹാര്‍മനും പ്രതികരിച്ചു.

പ്രഭുവംശ പശ്ചാത്തലത്തില്‍ നിന്ന് വിവാദങ്ങളിലേക്ക്

1993ല്‍ ജനിച്ച ജോര്‍ജ് കോട്രല്‍ ബ്രിട്ടനിലെ സമ്പന്നവും പ്രഭുവംശബന്ധമുള്ളതുമായ കുടുംബ പശ്ചാത്തലത്തില്‍ നിന്നുള്ളയാളാണ്. അമ്മ ഫിയോണ കോട്രലിന് ബ്രിട്ടിഷ് രാജകുടുംബവുമായി പഴയ സാമൂഹിക ബന്ധങ്ങളുണ്ടായിരുന്നുവെന്നാണ് വിവിധ മാധ്യമറിപ്പോര്‍ട്ടുകള്‍. കോട്രലിന്റെ കുടുംബത്തിന് വ്യവസായ-സമ്പന്ന പശ്ചാത്തലവും പ്രഭുപദവികളുമായുള്ള ബന്ധവുമുണ്ട്. മാല്‍വേണ്‍ കോളേജില്‍ പഠിച്ച കോട്രല്‍ പിന്നീട് ലണ്ടനിലെ മേയ്‌ഫെയര്‍ കേന്ദ്രീകരിച്ച സാമ്പത്തിക ഇടപാടുകളിലേക്ക് കടന്നു. അതിസമ്പന്നരുടെ സാമ്പത്തിക കാര്യങ്ങള്‍ കൈകാര്യം ചെയ്തിരുന്ന അദ്ദേഹം പിന്നീട് ക്രിപ്‌റ്റോകറന്‍സി, ഓണ്‍ലൈന്‍ ബെറ്റിങ്, ഡിജിറ്റല്‍ ആസ്തി മേഖലകളില്‍ വലിയ ബിസിനസ് താല്‍പര്യങ്ങള്‍ വികസിപ്പിച്ചതായാണ് റിപ്പോര്‍ട്ടുകള്‍.

ഫരാജിന്റെ അടുത്ത വിശ്വസ്തന്‍

2015ലെ യുകെ ഇന്‍ഡിപെന്‍ഡന്‍സ് പാര്‍ട്ടി തിരഞ്ഞെടുപ്പ് പ്രചാരണത്തില്‍ സന്നദ്ധപ്രവര്‍ത്തകനായാണ് കോട്രല്‍ സജീവ രാഷ്ട്രീയരംഗത്തേക്ക് കടന്നത്. ചെറുപ്പത്തില്‍ തന്നെ പാര്‍ട്ടിയുടെ ഫണ്ട് ശേഖരണ പ്രവര്‍ത്തനങ്ങളില്‍ പ്രധാന പങ്കുവഹിച്ച അദ്ദേഹം പിന്നീട് നൈജല്‍ ഫരാജിന്റെ ഏറ്റവും അടുത്ത സഹയാത്രികരില്‍ ഒരാളായി മാറി. 2016ലെ ബ്രെക്‌സിറ്റ് ജനഹിതപരിശോധന പ്രചാരണകാലത്തും കോട്രല്‍ ഫരാജിനൊപ്പം സജീവമായിരുന്നു. അതേ വര്‍ഷം അമേരിക്കയിലെ റിപ്പബ്ലിക്കന്‍ നാഷണല്‍ കണ്‍വെന്‍ഷനില്‍ പങ്കെടുത്ത ശേഷം യാത്ര ചെയ്യുന്നതിനിടെയാണ് അമേരിക്കന്‍ അധികൃതര്‍ അദ്ദേഹത്തെ അറസ്റ്റ് ചെയ്തത്.

എഫ്ബിഐ സ്റ്റിങ് ഓപ്പറേഷനും ജയില്‍ശിക്ഷയും

അമേരിക്കന്‍ അന്വേഷണ ഏജന്‍സികളുടെ രഹസ്യ ഓപ്പറേഷനിലാണ് കോട്രല്‍ കുടുങ്ങിയത്. ലഹരിമരുന്ന് ഇടപാടുകാരെന്ന വ്യാജേന സമീപിച്ച രഹസ്യ ഉദ്യോഗസ്ഥരുമായി നടത്തിയ ചര്‍ച്ചകളാണ് കേസിന് വഴിവച്ചത്. പണം വെളുപ്പിക്കല്‍ ഗൂഢാലോചന, വയര്‍ ഫ്രോഡ്, ബ്ലാക്ക്‌മെയില്‍, എക്‌സ്റ്റോര്‍ഷന്‍ തുടങ്ങിയവ ഉള്‍പ്പെടെ 21 കുറ്റങ്ങള്‍ ആദ്യം ചുമത്തപ്പെട്ടു. പിന്നീട് പ്രോസിക്യൂഷനുമായുള്ള ധാരണയുടെ ഭാഗമായി കോട്രല്‍ ഒരു വയര്‍ ഫ്രോഡ് കുറ്റം സമ്മതിച്ചു. മറ്റ് കുറ്റങ്ങള്‍ ഒഴിവാക്കപ്പെട്ടു. ഒടുവില്‍ എട്ട് മാസത്തോളം തടവുശിക്ഷ അനുഭവിച്ച ശേഷം അദ്ദേഹം മോചിതനായി.

ജയില്‍മോചനത്തിന് ശേഷം ക്രിപ്‌റ്റോ ലോകത്ത്

ജയില്‍ശിക്ഷയ്ക്ക് ശേഷം യൂറോപ്പിലേക്ക് മടങ്ങിയ കോട്രല്‍ പിന്നീട് മോണ്ടെനെഗ്രോ കേന്ദ്രീകരിച്ച് പ്രവര്‍ത്തിച്ചു. ക്രിപ്‌റ്റോകറന്‍സി, ഓണ്‍ലൈന്‍ ബെറ്റിങ്, ഡിജിറ്റല്‍ ആസ്തി സംരംഭങ്ങള്‍ എന്നിവയുമായി ബന്ധപ്പെട്ട ബിസിനസ് താല്‍പര്യങ്ങളിലൂടെ അദ്ദേഹം വീണ്ടും ശ്രദ്ധ നേടി. പണം വെളുപ്പിക്കല്‍ സംവിധാനങ്ങളെക്കുറിച്ചുള്ള 'ഹൗ ടു ലോണ്ടര്‍ മണി' എന്ന പുസ്തകത്തിന്റെ സഹരചയിതാവെന്ന നിലയിലും കോട്രല്‍ അടുത്തിടെ വാര്‍ത്തകളില്‍ നിറഞ്ഞിരുന്നു. പുസ്തകത്തിന്റെ ഉള്ളടക്കവും കോട്രലിന്റെ പഴയ കുറ്റകൃത്യ പശ്ചാത്തലവും ബ്രിട്ടിഷ് രാഷ്ട്രീയത്തില്‍ പുതിയ വിമര്‍ശനങ്ങള്‍ക്ക് വഴിവച്ചിട്ടുണ്ട്. അമേരിക്കയിലെ ശിക്ഷയില്‍ നിന്ന് പ്രസിഡന്‍ഷ്യല്‍ മാപ്പ് നേടാന്‍ കോട്രല്‍ ശ്രമിക്കുന്നതായും ബ്രിട്ടിഷ് മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്.

2023 മുതല്‍ ഫരാജിന്റെ പ്രവര്‍ത്തനങ്ങളില്‍ നിര്‍ണായക സാന്നിധ്യം

2023 മുതല്‍ നൈജല്‍ ഫരാജിന്റെ ടിക്ടോക്ക് ഉള്‍പ്പെടെയുള്ള സമൂഹമാധ്യമ പ്രവര്‍ത്തനങ്ങള്‍ ശക്തിപ്പെടുത്തുന്നതിലും സ്വകാര്യ സുരക്ഷാ സംവിധാനം ഒരുക്കുന്നതിലും കോട്രല്‍ നിര്‍ണായക പങ്കുവഹിച്ചതായാണ് ആരോപണം. ഫരാജിന്റെ മാധ്യമ-ടെലിവിഷന്‍ പ്രവര്‍ത്തനങ്ങളുമായി ബന്ധപ്പെട്ട ചില ഇടപാടുകളിലും അദ്ദേഹത്തിന് സ്വാധീനമുണ്ടായിരുന്നുവെന്ന റിപ്പോര്‍ട്ടുകളും പുറത്തുവന്നിട്ടുണ്ട്. കോട്രലിന് റിഫോം യുകെയില്‍ ഔദ്യോഗിക പദവിയില്ലെന്നാണ് പാര്‍ട്ടിയുടെ വാദം. എന്നാല്‍ പാര്‍ട്ടി പരിപാടികളിലും വിദേശയാത്രകളിലും രാഷ്ട്രീയ വേദികളിലും അദ്ദേഹത്തിന്റെ സ്ഥിരം സാന്നിധ്യം പുതിയ ചോദ്യങ്ങള്‍ ഉയര്‍ത്തുകയാണ്.

ചില സഹായങ്ങള്‍ രജിസ്റ്റര്‍ ചെയ്തു; മറ്റുള്ളവ എന്തുകൊണ്ട് ഇല്ല?

2024ല്‍ ക്ലാക്ടണ്‍ മണ്ഡലത്തില്‍ നിന്ന് ഫരാജ് എംപിയായി തിരഞ്ഞെടുക്കപ്പെട്ടതിന് ശേഷം കോട്രല്‍ നല്‍കിയ ചില വിദേശയാത്രാ സഹായങ്ങള്‍ പാര്‍ലമെന്ററി രേഖകളില്‍ ഉള്‍പ്പെടുത്തിയിട്ടുണ്ട്. ബെല്‍ജിയം യാത്രയ്ക്കായി ഏകദേശം 9,253 പൗണ്ടിന്റെ സഹായവും അമേരിക്കയിലെ ഒരു ആഭ്യന്തര വിമാനയാത്രയ്ക്കായി 15,276 പൗണ്ടിലധികം മൂല്യമുള്ള സഹായവും രജിസ്റ്റര്‍ ചെയ്തതായി രേഖകളുണ്ട്.

എന്നാല്‍ സ്വകാര്യ സുരക്ഷ, സമൂഹമാധ്യമ ജീവനക്കാര്‍, ഡ്രൈവര്‍മാര്‍, താമസസൗകര്യം തുടങ്ങിയ മറ്റ് സഹായങ്ങള്‍ എന്തുകൊണ്ട് വെളിപ്പെടുത്തിയില്ലെന്ന ചോദ്യമാണ് ഇപ്പോള്‍ ഉയരുന്നത്. ഇവ രാഷ്ട്രീയ പ്രവര്‍ത്തനവുമായി ബന്ധപ്പെട്ട ആനുകൂല്യങ്ങളായിരുന്നോ, അതോ പൂര്‍ണമായും വ്യക്തിപരമായ സൗഹൃദസഹായങ്ങളായിരുന്നോ എന്നതാണ് നിര്‍ണായക വിഷയം.

ഫരാജിനെതിരെ സമ്മര്‍ദം ശക്തം

നൈജല്‍ ഫരാജിനെതിരെ മറ്റൊരു വലിയ സാമ്പത്തിക വെളിപ്പെടുത്തല്‍ വിഷയത്തില്‍ പാര്‍ലമെന്ററി പരിശോധന തുടരുന്നതിനിടെയാണ് കോട്രലുമായുള്ള ബന്ധത്തെച്ചൊല്ലിയ പുതിയ വിവാദം. കോട്രല്‍ നല്‍കിയതായി ആരോപിക്കപ്പെടുന്ന ആനുകൂല്യങ്ങളെക്കുറിച്ചും ഔദ്യോഗിക അന്വേഷണം വേണമെന്ന് പ്രതിപക്ഷ കക്ഷികള്‍ ആവശ്യപ്പെടുന്നു. അതേസമയം, ഈ പുതിയ ആരോപണങ്ങളില്‍ ഫരാജ് പാര്‍ലമെന്ററി ചട്ടങ്ങള്‍ ലംഘിച്ചുവെന്ന് അന്തിമമായ ഔദ്യോഗിക കണ്ടെത്തല്‍ ഇതുവരെ ഉണ്ടായിട്ടില്ല. എന്നിരുന്നാലും, തുടര്‍ച്ചയായ സാമ്പത്തിക വെളിപ്പെടുത്തല്‍ വിവാദങ്ങള്‍ റിഫോം യുകെ നേതാവിനുമേലുള്ള രാഷ്ട്രീയ സമ്മര്‍ദം ഗണ്യമായി ശക്തമാക്കിയിരിക്കുകയാണ്.