ലണ്ടന്: ബ്രിട്ടന് സന്ദര്ശനത്തിനെത്തുന്ന ഹാരി രാജകുമാരന് ബക്കിങ്ങാം കൊട്ടാരത്തില് താമസിക്കില്ലെന്ന് കൊട്ടാരം വ്യക്തമാക്കി. താമസത്തിനുള്ള ക്ഷണം ഹാരി സ്വീകരിച്ചിരുന്നുവെന്ന് അദ്ദേഹത്തിന്റെ സംഘം ആദ്യം അറിയിച്ചെങ്കിലും, നിശ്ചിത സമയപരിധിക്കുള്ളില് ഔദ്യോഗിക സ്ഥിരീകരണം ലഭിക്കാത്തതിനാല് ആവശ്യമായ ഒരുക്കങ്ങള് നടത്താനായില്ലെന്നാണ് ബക്കിങ്ങാം കൊട്ടാരത്തിന്റെ വിശദീകരണം. പിന്നീട് ഹാരിയുടെ സമ്മതം ലഭിച്ചെങ്കിലും അത് വൈകിപ്പോയിരുന്നുവെന്നും കൊട്ടാരം അറിയിച്ചു. എന്നാല് ഈ വിശദീകരണം ഹാരിയുടെ സംഘം തള്ളി. ബക്കിങ്ങാം കൊട്ടാരത്തില് താമസിക്കാനുള്ള ക്ഷണം ഔദ്യോഗികമായി സ്വീകരിച്ച ശേഷമാണ് അവസാന നിമിഷം കൊട്ടാരം തീരുമാനം പിന്വലിച്ചതെന്നാണ് അവരുടെ വാദം. ഇതോടെ രാജകുടുംബവും ഹാരിയുടെ സംഘവും തമ്മിലുള്ള ഭിന്നത വീണ്ടും പരസ്യമായി.
ഹാരിയുടെ സുരക്ഷയുമായി ബന്ധപ്പെട്ട കേസിലെ കോടതി വിധി ചൊവ്വാഴ്ച പുറത്തുവരാനിരിക്കെ, അദ്ദേഹം ബക്കിങ്ങാം കൊട്ടാരത്തില് താമസിക്കുന്നത് ചാള്സ് രാജാവിന്റെ ഭരണഘടനാപരമായ നിഷ്പക്ഷതയെക്കുറിച്ച് ചോദ്യങ്ങള് ഉയര്ത്തുമെന്ന ആശങ്കയും തീരുമാനത്തിന് പിന്നിലുണ്ടായിരുന്നുവെന്ന് രാജകുടുംബ വൃത്തങ്ങള് സൂചിപ്പിക്കുന്നു. എന്നാല് ഈ വാദവും ഹാരിയുടെ സംഘം നിഷേധിച്ചു. അടുത്ത വര്ഷം ബര്മിങ്ങാമില് നടക്കുന്ന ഇന്വിക്ടസ് ഗെയിംസുമായി ബന്ധപ്പെട്ട പ്രചാരണ പരിപാടികളിലും വിവിധ ചാരിറ്റി പരിപാടികളിലും പങ്കെടുക്കാനാണ് ഹാരി ബ്രിട്ടനിലെത്തുന്നത്. സുരക്ഷാ പ്രശ്നങ്ങള് തുടരുന്നതിനാല് ഭാര്യ മേഗന് മാര്ക്കിളും മക്കളായ ആര്ച്ചിയും ലിലിബെറ്റും സന്ദര്ശനത്തില് പങ്കെടുക്കില്ല.
സുരക്ഷയെച്ചൊല്ലി ദീര്ഘകാല നിയമപോരാട്ടം
2020ല് രാജകുടുംബത്തിലെ ഔദ്യോഗിക ചുമതലകള് ഒഴിഞ്ഞ് അമേരിക്കയിലേക്ക് താമസം മാറിയതിനു പിന്നാലെ ഹാരിക്ക് ലഭിച്ചിരുന്ന സര്ക്കാര് സുരക്ഷാ സംവിധാനം പിന്വലിച്ചിരുന്നു. ഇതിനെതിരെ അദ്ദേഹം നിയമപോരാട്ടം തുടരുകയാണ്. ബ്രിട്ടന് സന്ദര്ശിക്കുന്ന സമയങ്ങളില് ആവശ്യമായ സുരക്ഷ ഉറപ്പാക്കണമെന്നാണ് ഹാരിയുടെ ആവശ്യം. മതിയായ സുരക്ഷ ലഭിക്കാത്ത സാഹചര്യത്തില് ഭാര്യയെയും മക്കളെയും ബ്രിട്ടനിലേക്ക് കൊണ്ടുവരില്ലെന്ന് ഹാരി നേരത്തേ വ്യക്തമാക്കിയിരുന്നു. രാജകുടുംബത്തിലെ ഔദ്യോഗിക ചുമതലകളില് നിന്ന് പിന്മാറിയ ശേഷമുള്ള ഹാരിയുടെ ഓരോ ബ്രിട്ടന് സന്ദര്ശനത്തിലും സുരക്ഷാ വിഷയം പ്രധാന തര്ക്കമായി തുടരുകയാണ്.
ചാള്സ് രാജാവുമായുള്ള കൂടിക്കാഴ്ചയും അനിശ്ചിതത്വത്തില്
ബക്കിങ്ങാം കൊട്ടാരത്തിലെ താമസ ക്ഷണത്തെച്ചൊല്ലിയ പുതിയ വിവാദം രാജകുടുംബവും ഹാരിയുടെ സംഘവും തമ്മിലുള്ള ബന്ധത്തിലെ വിള്ളല് വീണ്ടും തുറന്നുകാട്ടുന്നതായാണ് വിലയിരുത്തല്. ഈ ആഴ്ച ചാള്സ് രാജാവും ഹാരിയും തമ്മില് കൂടിക്കാഴ്ച നടക്കുമെന്ന പ്രതീക്ഷകള് നിലനിന്നിരുന്നെങ്കിലും പുതിയ സംഭവവികാസങ്ങളോടെ അതും അനിശ്ചിതത്വത്തിലായിരിക്കുകയാണ്. പിതാവും മകനും തമ്മിലുള്ള ബന്ധം മെച്ചപ്പെടുമെന്ന പ്രതീക്ഷകള്ക്കിടെയാണ് താമസ ക്ഷണത്തെച്ചൊല്ലിയ പുതിയ തര്ക്കം ഉയര്ന്നിരിക്കുന്നത്. ഇതോടെ ഹാരിയുടെ ബ്രിട്ടന് സന്ദര്ശനം വീണ്ടും രാജകുടുംബത്തിനുള്ളിലെ ഭിന്നതകളുടെ പശ്ചാത്തലത്തില് ശ്രദ്ധാകേന്ദ്രമാകുകയാണ്.
