ലണ്ടന്‍: പ്രായമായവരും രോഗികളും ഭിന്നശേഷിക്കാരുമായ കുടുംബാംഗങ്ങളെ പരിചരിക്കേണ്ട സാഹചര്യം മൂലം ബ്രിട്ടനില്‍ ദിവസവും ശരാശരി 1,500 പേര്‍ തൊഴില്‍ ഉപേക്ഷിച്ച് മുഴുവന്‍ സമയ പരിചരണത്തിലേക്ക് മാറുന്നതായി പുതിയ റിപ്പോര്‍ട്ട്. സര്‍ക്കാര്‍ പിന്തുണയോടെയുള്ള സാമൂഹിക പരിചരണ സേവനങ്ങളുടെ ലഭ്യത പരിമിതമായതാണ് നിരവധി കുടുംബങ്ങളെ ഇത്തരമൊരു തീരുമാനത്തിലേക്ക് നയിക്കുന്നതെന്ന് പഠനം ചൂണ്ടിക്കാട്ടുന്നു. കഴിഞ്ഞ രണ്ട് വര്‍ഷത്തിനിടെ പത്ത് ലക്ഷത്തിലധികം പേര്‍ പ്രായമായവരെയോ രോഗികളെയോ ഭിന്നശേഷിക്കാരായ ബന്ധുക്കളെയോ പരിചരിക്കുന്നതിനായി തൊഴില്‍രംഗം പൂര്‍ണമായും ഉപേക്ഷിച്ചതായാണ് കണക്കുകള്‍ വ്യക്തമാക്കുന്നത്.

അതേസമയം, ബ്രിട്ടനിലെ ജീവനക്കാരില്‍ ഏകദേശം 20 ശതമാനം പേര്‍, അതായത് 67 ലക്ഷത്തോളം പേര്‍, ജോലി തുടരുന്നതിനൊപ്പം കുടുംബാംഗങ്ങളെയോ സുഹൃത്തുക്കളെയോ പരിചരിക്കുന്നവരാണ്. പരിചരണ ഉത്തരവാദിത്തങ്ങള്‍ നിറവേറ്റുന്നതിനായി ഇവരില്‍ പലര്‍ക്കും കരിയറിലും വരുമാനത്തിലും സാമ്പത്തിക സുരക്ഷയിലും വിട്ടുവീഴ്ച ചെയ്യേണ്ടിവരുന്നതായും പഠനം കണ്ടെത്തി. സര്‍വേയില്‍ പങ്കെടുത്തവരില്‍ 22 ശതമാനം പേര്‍ കുടുംബാംഗങ്ങളെ പരിചരിക്കുന്നതിനായി ജോലി സമയം കുറച്ചതായി അറിയിച്ചു. ഇവരില്‍ മൂന്നിലൊന്നിലധികം പേര്‍ ആഴ്ചയില്‍ എട്ട് മണിക്കൂറില്‍ താഴെയാണ് ജോലി ചെയ്യുന്നത്. ഏകദേശം പത്ത് ശതമാനം പരിചാരകര്‍ക്ക് ജോലി തുടരുന്നതിനായി സ്ഥാനക്കയറ്റത്തിനുള്ള അവസരം നിരസിക്കുകയോ കുറഞ്ഞ ശമ്പളമുള്ള ജോലികളിലേക്ക് മാറുകയോ ചെയ്യേണ്ടിവന്നതായും റിപ്പോര്‍ട്ടില്‍ പറയുന്നു. ഇതോടെ നിലവിലെ വരുമാനത്തെ മാത്രമല്ല, ദീര്‍ഘകാല പെന്‍ഷന്‍, സമ്പാദ്യം, സാമ്പത്തിക സുരക്ഷ എന്നിവയെയും പരിചരണ ഉത്തരവാദിത്തങ്ങള്‍ ബാധിക്കുന്ന സാഹചര്യമാണുള്ളത്.

കരിയര്‍, സാമ്പത്തിക സുരക്ഷ, ഭാവി എന്നിവ സംബന്ധിച്ച് ഏറെ ബുദ്ധിമുട്ടേറിയ തീരുമാനങ്ങളാണ് പരിചരണ ചുമതലയുള്ളവര്‍ക്ക് എടുക്കേണ്ടിവരുന്നതെന്ന് റിപ്പോര്‍ട്ട് പ്രസിദ്ധീകരിച്ച Carers UK-യുടെ പോളിസി ഡയറക്ടര്‍ എമിലി ഹോള്‍സന്‍ഹൗസന്‍ പറഞ്ഞു. കുടുംബാംഗങ്ങളെ പരിചരിക്കുന്ന ജീവനക്കാര്‍ക്ക് പ്രതിവര്‍ഷം പത്ത് ദിവസത്തെ ശമ്പളത്തോടെയുള്ള 'കെയറര്‍ ലീവ്' നിയമപരമായി ഉറപ്പാക്കണമെന്നും Carers UK ആവശ്യപ്പെട്ടു. ജോലി പൂര്‍ണമായും ഉപേക്ഷിക്കേണ്ട സാഹചര്യം ഒഴിവാക്കി തൊഴിലും കുടുംബ പരിചരണവും ഒരുമിച്ച് മുന്നോട്ടുകൊണ്ടുപോകാന്‍ സഹായിക്കുന്ന കൂടുതല്‍ സൗകര്യങ്ങളും തൊഴില്‍ നയങ്ങളും നടപ്പാക്കണമെന്നും സംഘടന ആവശ്യപ്പെടുന്നു. സാമൂഹിക പരിചരണ സംവിധാനത്തിലെ പരിമിതികള്‍ മൂലം കുടുംബങ്ങളുടെ മേല്‍ പരിചരണഭാരം വര്‍ധിക്കുന്നത് തൊഴില്‍വിപണിയെയും കുടുംബങ്ങളുടെ സാമ്പത്തിക സുരക്ഷയെയും ഒരുപോലെ ബാധിക്കുന്നുവെന്നാണ് റിപ്പോര്‍ട്ട് മുന്നറിയിപ്പ് നല്‍കുന്നത്.