ഡബ്ലിന്: അയര്ലന്ഡില് പൗരത്വം നേടുന്നതിനായി നിര്ദേശിച്ചിരിക്കുന്ന പുതിയ ഭാഷാ പ്രാവീണ്യ പരീക്ഷയില് നിന്ന് ഐറിഷ് സര്വകലാശാലകളില് നിന്ന് ബിരുദം നേടിയവരെയും ജോലി ലഭിക്കുന്നതിനായി ഇതിനകം ഇംഗ്ലീഷ് ഭാഷാ യോഗ്യത തെളിയിച്ച നഴ്സുമാര് ഉള്പ്പെടെയുള്ള പ്രൊഫഷണലുകളെയും ഒഴിവാക്കണമെന്ന് യങ് ഫൈന് ഗേല് വൈസ് പ്രസിഡന്റും നാഷണല് സെക്രട്ടറിയുമായ കുരുവിള ജോര്ജ്ജ് ആവശ്യപ്പെട്ടു. യങ് ഫൈന് ഗേലിന്റെ ഔദ്യോഗിക വെബ്സൈറ്റിലും കുരുവിള ജോര്ജ്ജിനെ വൈസ് പ്രസിഡന്റും നാഷണല് സെക്രട്ടറിയുമായി രേഖപ്പെടുത്തിയിട്ടുണ്ട്. കുടിയേറ്റ ചുമതലയുള്ള സഹമന്ത്രി കോം ബ്രോഫിക്ക് അയച്ച കത്തിലാണ് കുരുവിള ജോര്ജ്ജ് നിര്ദേശം മുന്നോട്ടുവച്ചത്. ഐറിഷ് നാഷണാലിറ്റി ആന്ഡ് സിറ്റിസണ്ഷിപ്പ് (അമെന്ഡ്മെന്റ്) ബില് 2026-ന്റെ ഭാഗമായി സ്വാഭാവികവല്ക്കരണ നടപടികളില് ഭാഷാ പരീക്ഷ ഉള്പ്പെടെയുള്ള മാറ്റങ്ങളാണ് സര്ക്കാര് പരിഗണിക്കുന്നത്. ഇംഗ്ലീഷ്, ഐറിഷ് ഭാഷകളിലൊന്നിലെ പ്രാവീണ്യം തെളിയിക്കണമെന്ന വ്യവസ്ഥയാണ് നിര്ദേശങ്ങളില് ഉള്പ്പെട്ടിരിക്കുന്നത്. പൗരത്വ സംവിധാനത്തില് പരിഷ്കാരങ്ങള് കൊണ്ടുവരാനുള്ള നീക്കത്തെ സ്വാഗതം ചെയ്യുന്നുവെങ്കിലും ഇതിനകം ഔദ്യോഗികമായി ഭാഷാ പ്രാവീണ്യം തെളിയിച്ചവരോട് വീണ്ടും അതേ യോഗ്യത തെളിയിക്കാന് ആവശ്യപ്പെടുന്നത് ഒഴിവാക്കണമെന്ന് കുരുവിള ജോര്ജ്ജ് കത്തില് ആവശ്യപ്പെട്ടു.
ഐറിഷ് സര്വകലാശാലാ ബിരുദധാരികള്ക്ക് ഇളവ് വേണം
ഐറിഷ് സര്വകലാശാലകളില് ഉന്നത വിദ്യാഭ്യാസം പൂര്ത്തിയാക്കിയവരെ പൗരത്വ അപേക്ഷയുടെ ഭാഗമായി വീണ്ടും ഇംഗ്ലീഷ് ഭാഷാ പരീക്ഷയ്ക്ക് വിധേയരാക്കേണ്ടതില്ലെന്നാണ് പ്രധാന നിര്ദേശം. സര്വകലാശാല പ്രവേശനത്തിന് മുമ്പ് IELTS, TOEFL തുടങ്ങിയ അംഗീകൃത ഇംഗ്ലീഷ് ഭാഷാ പരീക്ഷകളിലൂടെ പ്രാവീണ്യം തെളിയിച്ചവരും തുടര്ന്ന് പഠനവും പരീക്ഷകളും ഇംഗ്ലീഷില് പൂര്ത്തിയാക്കിയവരുമായ അപേക്ഷകരോട് വീണ്ടും ഭാഷാ യോഗ്യത തെളിയിക്കാന് ആവശ്യപ്പെടുന്നത് അനാവശ്യമായ ആവര്ത്തനമാണെന്ന് കുരുവിള ജോര്ജ്ജ് ചൂണ്ടിക്കാട്ടി.
നഴ്സുമാര്ക്കും മിഡ്വൈഫുമാര്ക്കും സമാന ഇളവ്
അയര്ലന്ഡില് ജോലി ചെയ്യുന്നതിനായി ആവശ്യമായ ഇംഗ്ലീഷ് ഭാഷാ നിലവാരം ഇതിനകം തെളിയിച്ച നഴ്സുമാര്ക്കും മിഡ്വൈഫുമാര്ക്കും സമാനമായ ഒഴിവാക്കല് നല്കണമെന്നും അദ്ദേഹം ആവശ്യപ്പെട്ടു. നഴ്സിങ് ആന്ഡ് മിഡ്വൈഫറി ബോര്ഡ് ഓഫ് അയര്ലന്ഡിന്റെ (NMBI) രജിസ്ട്രേഷന് മാനദണ്ഡങ്ങളുടെ ഭാഗമായി ഇവരുടെ ഭാഷാ പ്രാവീണ്യം പരിശോധിക്കപ്പെടുന്ന സാഹചര്യത്തില്, പൗരത്വ അപേക്ഷയ്ക്കായി വീണ്ടും അതേ യോഗ്യത തെളിയിക്കേണ്ട സാഹചര്യം ഒഴിവാക്കണമെന്നാണ് ആവശ്യം. ഒരേ യോഗ്യത രണ്ടുതവണ തെളിയിക്കാന് നിര്ബന്ധിക്കുന്നത് അപേക്ഷകര്ക്ക് അധിക ചെലവും കാലതാമസവും സൃഷ്ടിക്കുമെന്നും ഇതിലൂടെ അധിക മൂല്യമൊന്നും ഉണ്ടാകില്ലെന്നും കുരുവിള ജോര്ജ്ജ് പറഞ്ഞു. ഇതിനകം തെളിയിച്ച ഭാഷാ യോഗ്യത അംഗീകരിക്കുന്നത് വിദഗ്ധ തൊഴിലാളികളെ അയര്ലന്ഡിലേക്ക് ആകര്ഷിക്കാനും രാജ്യത്ത് നിലനിര്ത്താനും സഹായിക്കുമെന്നും അദ്ദേഹം ചൂണ്ടിക്കാട്ടി. യുകെ, ജര്മനി തുടങ്ങിയ രാജ്യങ്ങളില് വിദ്യാഭ്യാസ യോഗ്യത ഉള്പ്പെടെയുള്ള മാനദണ്ഡങ്ങള് ചില സാഹചര്യങ്ങളില് ഭാഷാ പ്രാവീണ്യത്തിന്റെ തെളിവായി പരിഗണിക്കുന്ന രീതികളുണ്ടെന്നും കുരുവിള ജോര്ജ്ജ് കത്തില് ചൂണ്ടിക്കാട്ടി.
പൗരബോധ പരീക്ഷയും ശക്തിപ്പെടുത്തണമെന്ന് ആവശ്യം
പൗരത്വ പരിഷ്കാരങ്ങളുടെ ഭാഗമായി പൗരബോധം പരിശോധിക്കുന്ന ഘടകം ഉള്പ്പെടുത്താനുള്ള നീക്കത്തെയും കുരുവിള ജോര്ജ്ജ് സ്വാഗതം ചെയ്തു. അയര്ലന്ഡിന്റെ ചരിത്രം, സംസ്കാരം, ഭരണഘടന, ഭരണസംവിധാനം, പൗര-രാഷ്ട്രീയ സംവിധാനങ്ങള് തുടങ്ങിയവയെക്കുറിച്ചുള്ള അടിസ്ഥാന അറിവ് പരിശോധിക്കുന്ന സമഗ്രമായ 'ഐറിഷ് സിവിക് നോളജ് ടെസ്റ്റ്' നടപ്പാക്കണമെന്നാണ് അദ്ദേഹത്തിന്റെ നിര്ദേശം. യുകെയിലെ 'Life in the UK' പരീക്ഷയുടെയും ജര്മനിയിലെ സ്വാഭാവികവല്ക്കരണ പരീക്ഷയുടെയും മാതൃകയില്, പൗരത്വം നേടുന്നവര്ക്ക് അയര്ലന്ഡിന്റെ ചരിത്രത്തെയും സമൂഹത്തെയും ഭരണസംവിധാനത്തെയും കുറിച്ച് അടിസ്ഥാന ധാരണയുണ്ടെന്ന് ഉറപ്പാക്കുന്ന രീതിയിലായിരിക്കണം പരീക്ഷയെന്നും കുരുവിള ജോര്ജ്ജ് നിര്ദേശിച്ചു. അയര്ലന്ഡിലെ സ്വാഭാവികവല്ക്കരണ സംവിധാനത്തില് ഭാഷാ പരീക്ഷയും താമസകാലാവധി ഉള്പ്പെടെയുള്ള വ്യവസ്ഥകളില് മാറ്റവും കൊണ്ടുവരുന്ന നിര്ദേശങ്ങള് നിലവില് സര്ക്കാര് പരിഗണനയിലാണ്.
