തിരുവനന്തപുരം: മികച്ച ശമ്പളം നല്‍കാന്‍ സര്‍ക്കാര്‍ തയാറാകാത്തതുകൊണ്ടാണ് യുവ ഡോക്ടര്‍മാര്‍ സര്‍ക്കാര്‍ സര്‍വീസിലേക്കു വരാന്‍ തയ്യാറാകാത്തതെന്ന് തിരുവനന്തപുരം മെഡിക്കല്‍ കോളജിലെ യൂറോളജി വിഭാഗം മേധാവി ഡോ. ഹാരിസ് ചിറയ്ക്കല്‍. ഗവ. മെഡിക്കല്‍ കോളജ് ടീച്ചേഴ്സ് അസോസിയേഷന്റെ നേതൃത്വത്തില്‍ മെഡിക്കല്‍ വിദ്യാഭ്യാസ ഡയറക്ടറുടെ ഓഫിസിലേക്കു നടത്തിയ പ്രതിഷേധ മാര്‍ച്ചില്‍ സംസാരിക്കുകയായിരുന്നു അദ്ദേഹം.
തട്ടിക്കൂട്ട് സംവിധാനങ്ങളിലേക്ക് മെഡിക്കല്‍ വിദ്യാഭ്യാസം
''ചില കോളജുകളില്‍ പഠിപ്പിക്കാന്‍ ആളില്ലെന്നാണ് വിദ്യാര്‍ഥികള്‍ പറയുന്നത്. യൂട്യൂബ് നോക്കി പഠിക്കുകയാണ് അവര്‍. നിലവാരം കുറഞ്ഞതോടെ ഭാവിയില്‍ തട്ടിക്കൂട്ട് ഡോക്ടര്‍മാരും തട്ടിക്കൂട്ട് ചികിത്സയും മാത്രമേ ജനങ്ങള്‍ക്ക് ലഭിക്കുകയുള്ളൂ,'' ഡോ. ഹാരിസ് പറഞ്ഞു. സ്റ്റിച്ച് ഇടാനും രക്തസാംപിള്‍ എടുക്കാനും അറിയാത്തവരാണ് പലരും. മുന്‍പ് വിദേശ യോഗ്യതാ പരീക്ഷ എഴുതേണ്ടതില്ലായിരുന്ന കേരളത്തിലെ ഡോക്ടര്‍മാര്‍ക്ക് ഇപ്പോള്‍ അതും നിര്‍ബന്ധമായിരിക്കുകയാണ്.
യുവ ഡോക്ടര്‍മാര്‍ സര്‍ക്കാര്‍ സര്‍വീസില്‍ വരില്ല
''യുവ ഡോക്ടര്‍മാര്‍ സര്‍ക്കാര്‍ സര്‍വീസില്‍ വരാത്തതുകൊണ്ട് പല മെഡിക്കല്‍ കോളജുകളിലെ വിഭാഗങ്ങള്‍ അടച്ചിടേണ്ട അവസ്ഥയിലേക്കാണ് നീങ്ങുന്നത്. തൃശൂര്‍ മെഡിക്കല്‍ കോളജിലെ യൂറോളജി വിഭാഗം ഇപ്പോള്‍ ഏക ഡോക്ടറുടെ പാര്‍ട്ട് ടൈം സേവനത്തിലാണുള്ളത്. രണ്ട് നൂറോളം രോഗികള്‍ വരുന്ന സ്ഥലത്ത് അഞ്ചോ ആറോ ഡോക്ടര്‍മാര്‍ വേണ്ടതായിരിക്കെ,'' അദ്ദേഹം പറഞ്ഞു.
പിഎസ്സി ഇന്റര്‍വ്യൂവില്‍ നിന്നും ഒഴിവായ ഡോക്ടര്‍മാര്‍
''കഴിഞ്ഞ വര്‍ഷം പിഎസ്സി ഇന്റര്‍വ്യൂവില്‍ ഒന്‍പത് ഡോക്ടര്‍മാര്‍ എത്തിയെങ്കിലും ഒരാള്‍ മാത്രമാണ് സര്‍വീസില്‍ ചേരാന്‍ തയ്യാറായത്. ബാക്കിയുള്ളവര്‍ സ്വകാര്യ ആശുപത്രികളില്‍ നാലും അഞ്ചും ലക്ഷം ശമ്പളത്തില്‍ ജോലി ചെയ്യുകയാണ്. സര്‍ക്കാര്‍ ശമ്പളം 80,000 രൂപ മാത്രമാണ്,'' ഡോ. ഹാരിസ് ചൂണ്ടിക്കാട്ടി.
പ്രതിഷേധം ഉന്നയിച്ച ആവശ്യങ്ങള്‍
- പുതിയ മെഡിക്കല്‍ കോളജുകളില്‍ സ്ഥിരം തസ്തികകള്‍ സൃഷ്ടിക്കുക
- അടിസ്ഥാന സൗകര്യങ്ങള്‍ ഒരുക്കുക
- താല്‍ക്കാലിക സ്ഥലംമാറ്റങ്ങള്‍ അവസാനിപ്പിക്കുക
- എന്‍ട്രി കേഡര്‍ ശമ്പളത്തിലെ അപാകതകള്‍ പരിഹരിക്കുക
- 2016 ജനുവരി മുതല്‍ 2020 സെപ്റ്റംബര്‍ വരെയുള്ള ശമ്പള കുടിശിക വിതരണം ചെയ്യുക
- രോഗികളുടെ എണ്ണത്തിനനുസൃതമായി കൂടുതല്‍ അധ്യാപക തസ്തികകള്‍ നിലവിലുള്ള കോളജുകളില്‍ സൃഷ്ടിക്കുക
ആരോഗ്യസംവിധാനത്തിന് പ്രാഥമിക കേന്ദ്രങ്ങള്‍ ശക്തമാക്കണം
''മെഡിക്കല്‍ കോളജുകള്‍ തുടങ്ങുന്നത് നല്ലതാണെങ്കിലും ഡോക്ടര്‍മാരെയും ജീവനക്കാരെയും നിയമിച്ചില്ലെങ്കില്‍ ഗുണത്തേക്കാള്‍ ദോഷം ചെയ്യും. ആരോഗ്യസംവിധാനം മെച്ചപ്പെടുത്താന്‍ ജില്ലാ ആശുപത്രികളും താലൂക്ക് ആശുപത്രികളും പ്രാഥമിക ചികിത്സാ കേന്ദ്രങ്ങളും ട്രോമ കെയര്‍ സെന്ററുകളും ശക്തിപ്പെടുത്തണം,'' ഡോ. ഹാരിസ് ഓര്‍മ്മിപ്പിച്ചു.
