ജീത്തു ജോസഫ് സംവിധാനം ചെയ്യുന്ന 'മിറാഷ്' സസ്പെന്സ് ത്രില്ലര്: ട്രെയിലര് ഇറങ്ങി
Text By: UK Malayalam Pathram
ഒരു ഓണ്ലൈന് ഇന്വെസ്റ്റിഗേറ്റീവ് റിപ്പോര്ട്ടറുടെ ജീവിതം മുന്നിര്ത്തിക്കൊണ്ട് ആസിഫ് അലിക്കും അപര്ണ ബാലമുരളിക്കും ഒപ്പം ഒരു പസില് ഗെയിമുമായി എത്തുകയാണ് ജീത്തു ജോസഫ്. ഇവര് ഒന്നിക്കുന്ന 'മിറാഷ്' എന്ന സിനിമയുടെ ത്രില്ലടിപ്പിക്കുന്നതും സസ്പെന്സ് നിറയ്ക്കുന്നതുമായ ട്രെയിലര് പുറത്തിറങ്ങി. ചിത്രം സെപ്റ്റംബര് 19ന് വേള്ഡ് വൈഡ് റിലീസിനൊരുങ്ങുകയാണ്.
Watch Trailer: -
മികച്ച പ്രേക്ഷക - നിരൂപക പ്രശംസ നേടിയ 'കിഷ്കിന്ധാ കാണ്ഡ'ത്തിന് ശേഷം ആസിഫ് അലിയും അപര്ണ ബാലമുരളിയും വീണ്ടും ഒന്നിക്കുന്ന ചിത്രത്തിന്റെ ടീസര് അടുത്തിടെ ശ്രദ്ധ നേടിയിരുന്നു. ഇമോഷണല് രംഗങ്ങളിലൂടേയും ത്രില്ലടിപ്പിക്കുന്ന നിമിഷങ്ങളിലൂടേയും നീങ്ങുന്ന ചിത്രമെന്ന് അടിവരയിടുന്നതായിരുന്നു ടീസര്. ഇപ്പോഴിതാ ഏറെ ദുരൂഹമായതും ഉദ്വേഗം നിറയ്ക്കുന്നതുമായ രംഗങ്ങളിലൂടെയാണ് ചിത്രം നീങ്ങുന്നതെന്ന സൂചന നല്കിയിരിക്കുകകയാണ് ട്രെയ്ലര്. ഒട്ടേറെ ആക്ഷന് രംഗങ്ങളും ചിത്രത്തിലുണ്ടെന്നും ട്രെയ്ലറില് നിന്ന് മനസ്സിലാക്കാനാകുന്നുണ്ട്.
ദൃശ്യം സീരീസ് ഉള്പ്പെടെയുള്ള സൂപ്പര് ഹിറ്റുകളുടെ സംവിധായകന് ജീത്തു ജോസഫ് സംവിധാനം ചെയ്യുന്ന സിനിമയുടെ ഡിജിറ്റല് ഇല്യൂഷന് വീഡിയോ അടുത്തിടെ ശ്രദ്ധ നേടിയിരുന്നു. ഹക്കിം ഷാജഹാന്, ദീപക് പറമ്പോല്, ഹന്നാ റെജി കോശി, സമ്പത്ത് രാജ്, അര്ജുന് ഗോപന് എന്നിവരാണ് 'മിറാഷി'ലെ മറ്റു പ്രധാന അഭിനേതാക്കള്.
E4 എക്സ്പിരിമെന്റ്സ്, നാഥ് സ്റ്റുഡിയോസ് എന്നീ ബാനറുകളില് സെവന് വണ് സെവന് പ്രൊഡക്ഷന്സ്, ബെഡ് ടൈം സ്റ്റോറീസ് എന്നീ ബാനറുകളുടെ സഹകരണത്തോടെ മുകേഷ് ആര്. മെഹ്ത, ജതിന് എം. സേഥി, സി.വി. സാരഥി എന്നിവര് ചേര്ന്നാണ് ചിത്രം നിര്മിക്കുന്നത്. ആസിഫ് അലിയുടെ 2025ലെ ആദ്യ റിലീസായ 'രേഖാചിത്രം' ബോക്സ്ഓഫീസില് വന് വിജയമായി മാറിയിരുന്നു. ഏറെ ചര്ച്ചയായി മാറിയിരുന്ന 'കൂമന്' എന്ന ചിത്രത്തിന് ശേഷം ആസിഫും ജീത്തു ജോസഫും വീണ്ടും ഒരുമിക്കുന്ന ചിത്രമെത്തുമ്പോള് പ്രേക്ഷകര് ഏറെ പ്രതീക്ഷയിലാണ്.
