ലണ്ടന്‍: യുകെയില്‍ ഉഷ്ണതരംഗ ഭീഷണി ശക്തമാകുന്നു. അടുത്ത ആഴ്ചയുടെ തുടക്കത്തോടെ രാജ്യത്തിന്റെ തെക്കും കിഴക്കന്‍ ഭാഗങ്ങളിലും താപനില 34 ഡിഗ്രി സെല്‍ഷ്യസ് വരെ ഉയരുമെന്നാണ് Met Office മുന്നറിയിപ്പ് നല്‍കിയത്. ചില പ്രദേശങ്ങളില്‍ ഇതിലും കൂടുതല്‍ ചൂട് രേഖപ്പെടുത്താനുള്ള സാധ്യതയും നിലനില്‍ക്കുന്നു. തിങ്കളാഴ്ചയും ചൊവ്വാഴ്ചയും ചൂട് പരമാവധിയിലേക്ക് ഉയരാനാണ് സാധ്യത. ഇതിനെ തുടര്‍ന്ന് തെക്കന്‍ ഇംഗ്ലണ്ടിന്റെയും തെക്കുകിഴക്കന്‍ വെയില്‍സിന്റെയും പല ഭാഗങ്ങള്‍ക്കും Met Office ആംബര്‍ എക്‌സ്ട്രീം ഹീറ്റ് മുന്നറിയിപ്പ് പുറപ്പെടുവിച്ചു. ചൂടിനൊപ്പം ഉയര്‍ന്ന ഈര്‍പ്പവും രാത്രിയിലും താപനില കാര്യമായി കുറയാത്ത സാഹചര്യവും ആരോഗ്യ പ്രശ്‌നങ്ങള്‍ വര്‍ധിപ്പിക്കുമെന്നാണ് മുന്നറിയിപ്പ്. യുകെയിലെ ജൂണ്‍ മാസത്തെ നിലവിലെ ഉയര്‍ന്ന താപനില റെക്കോര്‍ഡ് 35.6 ഡിഗ്രി സെല്‍ഷ്യസാണ്. അടുത്ത ആഴ്ച ഈ റെക്കോര്‍ഡ് മറികടക്കപ്പെടാനുള്ള സാധ്യതയുണ്ടെന്നും കാലാവസ്ഥാ വിദഗ്ധര്‍ വിലയിരുത്തുന്നു. തെക്കന്‍, തെക്കുകിഴക്കന്‍ ഇംഗ്ലണ്ടിലെ ചില പ്രദേശങ്ങളില്‍ വാരാന്ത്യത്തോടെ തന്നെ ഉഷ്ണതരംഗ മാനദണ്ഡങ്ങള്‍ നിറവേറാന്‍ സാധ്യതയുണ്ട്.

അതേസമയം, UK Health Security Agency ലണ്ടന്‍, ഈസ്റ്റ് ഓഫ് ഇംഗ്ലണ്ട്, സൗത്ത് ഈസ്റ്റ്, സൗത്ത് വെസ്റ്റ് മേഖലകളില്‍ ആംബര്‍ ഹീറ്റ് ഹെല്‍ത്ത് അലര്‍ട്ട് പുറപ്പെടുവിച്ചു. ഈസ്റ്റ് മിഡ്ലാന്‍ഡ്‌സ്, വെസ്റ്റ് മിഡ്ലാന്‍ഡ്‌സ് മേഖലകള്‍ക്ക് യെല്ലോ അലര്‍ട്ടും നിലവിലുണ്ട്. മുതിര്‍ന്നവര്‍, കുട്ടികള്‍, ഗര്‍ഭിണികള്‍, ദീര്‍ഘകാല രോഗങ്ങളുള്ളവര്‍, ഒറ്റയ്ക്ക് താമസിക്കുന്നവര്‍ എന്നിവര്‍ക്കാണ് ചൂട് കൂടുതല്‍ അപകടകരമാകാന്‍ സാധ്യത. അമിത ചൂട് മൂലം നിര്‍ജലീകരണം, ക്ഷീണം, തലചുറ്റല്‍, ഹീറ്റ് എക്‌സോസ്റ്റ്ഷന്‍, ഹീറ്റ് സ്‌ട്രോക്ക് തുടങ്ങിയ ആരോഗ്യപ്രശ്‌നങ്ങള്‍ വര്‍ധിക്കാമെന്ന് ആരോഗ്യവകുപ്പ് മുന്നറിയിപ്പ് നല്‍കി. ഉച്ചയ്ക്ക് 11 മുതല്‍ വൈകിട്ട് 3 വരെ നേരിട്ട് സൂര്യപ്രകാശത്തില്‍ കഴിയുന്നത് പരമാവധി ഒഴിവാക്കാനും ധാരാളം വെള്ളം കുടിക്കാനും നിര്‍ദേശമുണ്ട്. ചൂട് കൂടുന്ന സാഹചര്യത്തില്‍ കടല്‍ത്തീരങ്ങള്‍, തടാകങ്ങള്‍, നദികള്‍ എന്നിവിടങ്ങളിലേക്ക് ആളുകള്‍ കൂടുതലായി പോകാന്‍ സാധ്യതയുള്ളതിനാല്‍ ജലസുരക്ഷയ്ക്കും പ്രത്യേക മുന്നറിയിപ്പ് നല്‍കിയിട്ടുണ്ട്. വായുവില്‍ ചൂട് കൂടിയാലും ജലാശയങ്ങളിലെ വെള്ളം ഇപ്പോഴും തണുത്തതാകാം. അപ്രതീക്ഷിതമായി തണുത്ത വെള്ളത്തില്‍ ഇറങ്ങുന്നത് 'കോള്‍ഡ് വാട്ടര്‍ ഷോക്ക്' ഉണ്ടാക്കാന്‍ ഇടയാക്കും.

അടുത്ത ആഴ്ച മധ്യത്തോടെ ചൂടിന്റെ തീവ്രത കുറയാന്‍ സാധ്യതയുണ്ടെങ്കിലും തെക്കന്‍, കിഴക്കന്‍ ഇംഗ്ലണ്ടില്‍ ചൂട് കുറച്ച് കൂടി തുടര്‍ന്നേക്കാം. ചില പ്രദേശങ്ങളില്‍ ഒറ്റപ്പെട്ട ഇടിമിന്നലോടുകൂടിയ മഴയ്ക്കും സാധ്യതയുണ്ട്. കാലാവസ്ഥാ വ്യതിയാനത്തിന്റെ പശ്ചാത്തലത്തില്‍ യുകെയില്‍ ഉഷ്ണതരംഗങ്ങളുടെ ആവര്‍ത്തനവും തീവ്രതയും വര്‍ധിക്കുന്നതായി വിദഗ്ധര്‍ ചൂണ്ടിക്കാട്ടുന്നു. നഗരജീവിതത്തെയും ആരോഗ്യസംവിധാനങ്ങളെയും അടിസ്ഥാന സൗകര്യങ്ങളെയും ബാധിക്കുന്ന തരത്തിലുള്ള ചൂട് ഭാവിയില്‍ കൂടുതല്‍ സാധാരണമാകാമെന്നാണ് മുന്നറിയിപ്പ്.