ലണ്ടന്‍: യുകെയില്‍ വീണ്ടും കടുത്ത ചൂടിന് സാധ്യതയെന്ന് മുന്നറിയിപ്പ്. തെക്കന്‍ ഇംഗ്ലണ്ടിലെ പല മേഖലകളിലും യുകെ ഹെല്‍ത്ത് സെക്യൂരിറ്റി ഏജന്‍സി ആംബര്‍ ഹീറ്റ് ഹെല്‍ത്ത് അലര്‍ട്ട് പ്രഖ്യാപിച്ചു. ഈസ്റ്റ് ഓഫ് ഇംഗ്ലണ്ട്, ലണ്ടന്‍, സൗത്ത് ഈസ്റ്റ്, സൗത്ത് വെസ്റ്റ് മേഖലകളിലാണ് ആംബര്‍ അലര്‍ട്ട് ബാധകം. ഈസ്റ്റ് മിഡ്ലാന്‍ഡ്‌സ്, വെസ്റ്റ് മിഡ്ലാന്‍ഡ്‌സ് മേഖലകളില്‍ യെല്ലോ അലര്‍ട്ടും പ്രഖ്യാപിച്ചിട്ടുണ്ട്. അലര്‍ട്ട് ജൂണ്‍ 18 വ്യാഴാഴ്ച ഉച്ചയ്ക്ക് 12 മുതല്‍ ജൂണ്‍ 23 ചൊവ്വാഴ്ച രാത്രി 8 വരെ നിലവിലുണ്ടാകുമെന്ന് UKHSA അറിയിച്ചു. വെള്ളിയാഴ്ച താപനില 30 ഡിഗ്രി സെല്‍ഷ്യസിനടുത്തും ഞായറാഴ്ച 32 ഡിഗ്രി വരെയും തിങ്കളാഴ്ച ചില മേഖലകളില്‍ 34 ഡിഗ്രി വരെയും ഉയരാമെന്നാണ് പ്രവചനം. തെക്കന്‍, കിഴക്കന്‍ ഇംഗ്ലണ്ടിലെ പല പ്രദേശങ്ങളിലും ശനിയാഴ്ചയോടെയോ ഞായറാഴ്ചയോടെയോ ഔദ്യോഗിക ഹീറ്റ്വേവ് മാനദണ്ഡങ്ങള്‍ പൂര്‍ത്തിയാകാന്‍ സാധ്യതയുണ്ടെന്ന് മെറ്റ് ഓഫീസ് അറിയിച്ചു.

ആംബര്‍ ഹീറ്റ് ഹെല്‍ത്ത് അലര്‍ട്ട് എന്നത് പ്രായമായവര്‍, ദീര്‍ഘകാല രോഗങ്ങളുള്ളവര്‍ തുടങ്ങിയവര്‍ക്കു മാത്രമല്ല, പൊതുജനങ്ങള്‍ക്കും ആരോഗ്യപ്രശ്‌നങ്ങള്‍ ഉണ്ടാകാനുള്ള സാധ്യത വര്‍ധിക്കുന്നുവെന്ന സൂചനയാണ്. ആശുപത്രികള്‍, കെയര്‍ ഹോമുകള്‍, ആരോഗ്യ-സാമൂഹിക പരിചരണ സേവനങ്ങള്‍ എന്നിവയിലും സമ്മര്‍ദം കൂടാന്‍ സാധ്യതയുണ്ടെന്ന് UKHSA വ്യക്തമാക്കുന്നു. ലണ്ടന്‍, കെന്റ്, എസെക്‌സ്, സറി, സസെക്‌സ് ഉള്‍പ്പെടെയുള്ള തെക്കന്‍, കിഴക്കന്‍ മേഖലകളിലായിരിക്കും ചൂട് ഏറ്റവും രൂക്ഷമാകാന്‍ സാധ്യത. എന്നാല്‍ മേഘാവരണം, ഈര്‍പ്പം, ഇടിമിന്നലോടുകൂടിയ മഴയുടെ സാധ്യത എന്നിവ കാരണം ചിലയിടങ്ങളില്‍ കാലാവസ്ഥ അസ്വസ്ഥതയേറിയതാകാമെന്നും കാലാവസ്ഥാ നിരീക്ഷകര്‍ മുന്നറിയിപ്പ് നല്‍കുന്നു.

ചൂട് കൂടുന്ന സാഹചര്യത്തില്‍ ജലാശയങ്ങളില്‍ ഇറങ്ങുന്നവര്‍ പ്രത്യേക ജാഗ്രത പാലിക്കണമെന്ന നിര്‍ദേശവും നല്‍കിയിട്ടുണ്ട്. കഴിഞ്ഞ മെയ് മാസത്തെ ഉഷ്ണതരംഗത്തിനിടെ വെള്ളത്തില്‍ മുങ്ങി മരിച്ച സംഭവങ്ങള്‍ റിപ്പോര്‍ട്ട് ചെയ്തതിനെ തുടര്‍ന്നാണ് മുന്നറിയിപ്പ് ശക്തമാക്കിയത്. കടല്‍, നദി, തടാകം, റിസര്‍വോയര്‍ എന്നിവിടങ്ങളില്‍ തണുത്ത വെള്ളത്തിന്റെ ആഘാതം, ശക്തമായ ഒഴുക്ക്, അടിത്തട്ടിലെ മറഞ്ഞിരിക്കുന്ന തടസ്സങ്ങള്‍ എന്നിവ അപകടത്തിന് കാരണമാകാമെന്ന് അധികൃതര്‍ ഓര്‍മ്മിപ്പിക്കുന്നു. മൂന്ന് ആഴ്ചയ്ക്കുള്ളില്‍ ഇംഗ്ലണ്ടിനെയും വെയില്‍സിനെയും ബാധിക്കുന്ന രണ്ടാമത്തെ പ്രധാന ഉഷ്ണതരംഗമാണിത്. മെയ് മാസത്തിലെ ആദ്യ തരംഗത്തില്‍ ഇംഗ്ലണ്ടില്‍ 35 ഡിഗ്രി സെല്‍ഷ്യസിനടുത്തും വെയില്‍സില്‍ 32 ഡിഗ്രിക്കുമുകളിലും താപനില രേഖപ്പെടുത്തിയിരുന്നു. യൂറോപ്പില്‍ നിന്നുള്ള ചൂടന്‍ വായുപ്രവാഹവും ഉയര്‍ന്ന മര്‍ദ്ദാവസ്ഥയും ചേര്‍ന്നാണ് യുകെയിലെ തെക്കന്‍ മേഖലകളില്‍ ചൂട് കൂടാന്‍ കാരണമാകുന്നതെന്നാണ് വിലയിരുത്തല്‍.