മാഞ്ചസ്റ്റര്: മലപ്പുറം ജില്ലയിലെ പെരിന്തല്മണ്ണ സ്വദേശിയും ബ്രില്ല്യന്റ് ഹോട്ടല്സ് ഗ്രൂപ്പിന്റെ മാനേജിംഗ് ഡയറക്ടറുമായ അനൂബ് സബാന് 2026ലെ 'ബിസിനസ്മാന് ഓഫ് ദി ഇയര്' പുരസ്കാരത്തിന് അര്ഹനായി. മാഞ്ചസ്റ്ററിലെ പ്രശസ്തമായ O2 അപ്പോളോ വേദിയില് നടന്ന അഞ്ചാമത് ആനന്ദ് ടി.വി ഫിലിം അവാര്ഡ്സ് ചടങ്ങിലാണ് അദ്ദേഹത്തിന് പുരസ്കാരം സമ്മാനിച്ചത്. മലയാളത്തിന്റെ മഹാനടന് മമ്മൂട്ടിയുടെ കൈകളില് നിന്നാണ് അനൂബ് സബാന് പുരസ്കാരം ഏറ്റുവാങ്ങിയത്. ഉയര്ന്ന വിദ്യാഭ്യാസത്തിനായി 2001ല് യുകെയിലെത്തിയ അനൂബ് സബാന്, എം.ബി.എ പഠനത്തിനൊപ്പം ഒരു ത്രീ സ്റ്റാര് ഹോട്ടലില് നൈറ്റ് പോര്ട്ടറായി പാര്ട്ട് ടൈം ജോലി ആരംഭിച്ചു. ഹോട്ടല് മേഖലയോടുള്ള താല്പര്യവും കഠിനാധ്വാനവും അദ്ദേഹത്തെ പിന്നീട് ഡ്യൂട്ടി മാനേജര്, റവന്യൂ മാനേജര് തുടങ്ങിയ ചുമതലകളിലേക്ക് ഉയര്ത്തി. യുകെയിലെ നിരവധി പ്രമുഖ ഹോട്ടലുകളില് മാനേജ്മെന്റ് തലത്തില് പ്രവര്ത്തിച്ച അദ്ദേഹം, ആതിഥേയത്വ മേഖലയിലെ സമ്പന്നമായ അനുഭവസമ്പത്താണ് പിന്നീട് തന്റെ സംരംഭക യാത്രയ്ക്ക് അടിത്തറയാക്കിയത്.
2014ല് സ്വന്തം ഹോട്ടല് മാനേജ്മെന്റ് കമ്പനി ആരംഭിച്ച അനൂബ് സബാന്, പിന്നീട് ബ്രില്ല്യന്റ് ഹോട്ടല്സ് ഗ്രൂപ്പിലൂടെ ശ്രദ്ധേയമായ വളര്ച്ച കൈവരിച്ചു. മാഞ്ചസ്റ്റര്, ഷെഫീല്ഡ്, ക്രൂ, ചെല്ട്ടന്ഹാം, റോച്ച്ഡെയില്, പ്രെസ്റ്റണ് തുടങ്ങി യുകെയിലെ വിവിധ പ്രധാന കേന്ദ്രങ്ങളിലായി ഹോട്ടലുകളും ഹോസ്പിറ്റാലിറ്റി സംരംഭങ്ങളും വിജയകരമായി വികസിപ്പിക്കാന് അദ്ദേഹത്തിന് കഴിഞ്ഞു. ഒരു സാധാരണ ഹോട്ടല് ജീവനക്കാരനായി തൊഴില്ജീവിതം ആരംഭിച്ച് യുകെയിലെ ശ്രദ്ധേയനായ മലയാളി സംരംഭകരിലൊരാളായി വളര്ന്ന അനൂബ് സബാന്റെ ജീവിതയാത്ര നിരവധി യുവ സംരംഭകര്ക്ക് പ്രചോദനമാണ്. കഠിനാധ്വാനം, ദീര്ഘദര്ശനം, മികച്ച നേതൃത്വപാടവം, ആതിഥേയത്വ മേഖലയിലെ തുടര്ച്ചയായ മികവ് എന്നിവയ്ക്കുള്ള അംഗീകാരമായാണ് ഈ പുരസ്കാരം വിലയിരുത്തപ്പെടുന്നത്. അനൂബ് സബാന്റെ ഈ നേട്ടം പെരിന്തല്മണ്ണയ്ക്കും മലപ്പുറം ജില്ലയ്ക്കും പ്രവാസി മലയാളി സമൂഹത്തിനും അഭിമാന നിമിഷമായി മാറി. ചടങ്ങില് മമ്മൂട്ടി, ടൊവിനോ തോമസ്, എം.ജി. ശ്രീകുമാര്, ഭാവന, സുരാജ് വെഞ്ഞാറമൂട്, നിഖില വിമല്, മനോജ് കെ. ജയന്, അനശ്വര രാജന്, സിതാര കൃഷ്ണകുമാര്, പാലക്കാട് എംഎല്എ രമേഷ് പിഷാരടി തുടങ്ങി സിനിമാ, സംഗീത, സാംസ്കാരിക രംഗങ്ങളിലെ നിരവധി പ്രമുഖര് പങ്കെടുത്തു. പുരസ്കാര നേട്ടത്തിന് പിന്നാലെ അനൂബ് സബാനെ അഭിനന്ദിച്ച് നിരവധി പ്രമുഖരും പ്രവാസി സംഘടനകളും രംഗത്തെത്തി. യുകെയിലെ ഹോസ്പിറ്റാലിറ്റി മേഖലയിലെ അദ്ദേഹത്തിന്റെ ദീര്ഘകാല സംഭാവനകള്ക്കും സംരംഭക മികവിനുമുള്ള അര്ഹമായ അംഗീകാരമായാണ് ഈ നേട്ടം വിലയിരുത്തപ്പെടുന്നത്.
