ലണ്ടന്‍: യുകെയിലെ വിവാദമായ ഗ്രൂമിംഗ് ഗ്യാങ് ലൈംഗികപീഡന കേസുകളില്‍ കൂടുതല്‍ കടുത്ത നടപടികള്‍ ആവശ്യപ്പെട്ട് ബ്രിട്ടീഷ് പാര്‍ലമെന്റ് അംഗം റൂപര്‍ട്ട് ലോവ് രംഗത്ത്. ഇരകളുടെയും അതിജീവിതരുടെയും മൊഴികള്‍ ഉദ്ധരിച്ച ലോവ്, ഇത്തരം കേസുകളില്‍ കുറ്റവാളികളെയും അവരെ സംരക്ഷിക്കാന്‍ സഹായിച്ചവരെയും നിയമത്തിന് മുന്നില്‍ കൊണ്ടുവരാന്‍ ശക്തമായ ഇടപെടല്‍ ആവശ്യമാണെന്ന് പറഞ്ഞു. പാര്‍ലമെന്റില്‍ നടത്തിയ പ്രസംഗത്തില്‍, ചില അതിജീവിതര്‍ തങ്ങള്‍ നേരിട്ട പീഡനങ്ങളില്‍ വംശീയവും മതപരവുമായ അധിക്ഷേപങ്ങളും അപമാനങ്ങളും ഉണ്ടായിരുന്നുവെന്ന് വെളിപ്പെടുത്തിയതായി ലോവ് പറഞ്ഞു. ചില സംഘങ്ങളിലെ പ്രതികള്‍ പെണ്‍കുട്ടികളെ ലക്ഷ്യമിട്ട് ദീര്‍ഘകാലം ചൂഷണം ചെയ്തതായും, കേസുകളിലെ യഥാര്‍ത്ഥ കാരണങ്ങള്‍ തുറന്നുപറയുന്നതില്‍ അധികാരികള്‍ പലപ്പോഴും പരാജയപ്പെട്ടുവെന്നും അദ്ദേഹം ആരോപിച്ചു.
കുറ്റകൃത്യങ്ങളില്‍ പങ്കുണ്ടെന്ന് തെളിയുന്നവര്‍ക്കെതിരെ കര്‍ശന നിയമനടപടി സ്വീകരിക്കണമെന്നും, വിദേശ പൗരന്മാരായ കുറ്റവാളികളെ നാടുകടത്തണമെന്നും ലോവ് ആവശ്യപ്പെട്ടു. കേസുകള്‍ വീണ്ടും അന്വേഷിക്കുന്നതിനായി അധികാരികളുമായി സംസാരിക്കുന്നുണ്ടെങ്കിലും, നീതി ഉറപ്പാക്കാന്‍ സ്വകാര്യ പ്രോസിക്യൂഷനും സിവില്‍ നിയമനടപടികളും പരിഗണിക്കുന്നുണ്ടെന്നും അദ്ദേഹം വ്യക്തമാക്കി. ഭാവിയിലെ നിയമനടപടികളെ ബാധിക്കാത്ത രീതിയില്‍, നിയമസംഘത്തിന്റെ ഉപദേശത്തോടെ മാത്രമായിരിക്കും താന്‍ പാര്‍ലമെന്ററി പദവി ഉപയോഗിച്ച് കൂടുതല്‍ പേരുകള്‍ വെളിപ്പെടുത്തുകയെന്ന് ലോവ് പറഞ്ഞു. ''സംസാരം മതിയാക്കി പ്രവര്‍ത്തിക്കേണ്ട സമയമാണിത്. കുറ്റവാളികളെ ജയിലിലടയ്ക്കുകയും ഇരകള്‍ക്ക് നീതി ഉറപ്പാക്കുകയും ചെയ്യുക എന്നതാണ് ലക്ഷ്യം,'' എന്നാണ് അദ്ദേഹത്തിന്റെ നിലപാട്.
അതേസമയം, ഇത്തരം കേസുകളില്‍ കുറ്റക്കാരുടെ വംശം, മതം, സംസ്‌കാരം തുടങ്ങിയ ഘടകങ്ങള്‍ പരിശോധിക്കേണ്ടതുണ്ടെങ്കിലും, ഒരു സമൂഹത്തെയോ മതവിഭാഗത്തെയോ മുഴുവനായി കുറ്റപ്പെടുത്തുന്ന രീതിയിലേക്ക് ചര്‍ച്ച മാറരുതെന്ന മുന്നറിയിപ്പും ശക്തമാണ്. കുറ്റകൃത്യങ്ങള്‍ക്ക് ഉത്തരവാദികളാകേണ്ടത് വ്യക്തികളും സംഘങ്ങളും സ്ഥാപനപരമായ വീഴ്ചകള്‍ക്ക് കാരണക്കാരായ സംവിധാനങ്ങളുമാണെന്നാണ് നിയമവിദഗ്ധരും കുട്ടികളുടെ സംരക്ഷണ രംഗത്തെ പ്രവര്‍ത്തകരും ചൂണ്ടിക്കാട്ടുന്നത്. യുകെ സര്‍ക്കാര്‍ നിയോഗിച്ച സ്വതന്ത്ര അന്വേഷണം ഗ്രൂമിംഗ് ഗ്യാങ് കേസുകളിലെ സ്ഥാപനപരമായ വീഴ്ചകളും പൊലീസ്, കൗണ്‍സില്‍, സാമൂഹിക സേവന വിഭാഗങ്ങള്‍ തുടങ്ങിയവയുടെ പ്രതികരണവും പരിശോധിക്കും. അന്വേഷണത്തില്‍ ഇരകളുടെയും അതിജീവിതരുടെയും അനുഭവങ്ങള്‍ക്ക് മുന്‍ഗണന നല്‍കുമെന്നും, കുറ്റകൃത്യങ്ങള്‍ തടയുന്നതിനും നീതി ഉറപ്പാക്കുന്നതിനുമായി ദേശീയതലത്തില്‍ ശുപാര്‍ശകള്‍ നല്‍കുമെന്നും അധികൃതര്‍ വ്യക്തമാക്കിയിട്ടുണ്ട്.
