ലണ്ടന്‍: ബ്രിട്ടനില്‍ 18 വയസ്സ് തികയുന്ന യുവാക്കള്‍ക്കും ട്രെയിന്‍ യാത്രയില്‍ പകുതി നിരക്കിന്റെ ആനുകൂല്യം തുടരാന്‍ അവസരമൊരുക്കി '16-17 സേവര്‍' റെയില്‍കാര്‍ഡ് നിയമത്തില്‍ മാറ്റം. ഓഗസ്റ്റ് 17 മുതല്‍ പുതിയ നിയമം പ്രാബല്യത്തില്‍ വരും. ഇതോടെ 18 വയസ്സ് തികഞ്ഞാലുടന്‍ റെയില്‍കാര്‍ഡ് ആനുകൂല്യം നഷ്ടപ്പെടുന്ന നിലവിലെ രീതി അവസാനിക്കും. നിലവില്‍ 16, 17 വയസ്സുള്ളവര്‍ക്ക് '16-17 സേവര്‍' റെയില്‍കാര്‍ഡ് ഉപയോഗിച്ച് ബ്രിട്ടനിലെ മിക്ക ട്രെയിന്‍ യാത്രകളിലും സാധാരണ ടിക്കറ്റ് നിരക്കില്‍ 50 ശതമാനം ഇളവ് ലഭിക്കുന്നുണ്ട്. എന്നാല്‍ കാര്‍ഡിന്റെ കാലാവധി ബാക്കിയുണ്ടെങ്കിലും ഉടമയ്ക്ക് 18 വയസ്സ് തികയുന്നതോടെ ആനുകൂല്യം അവസാനിക്കുകയായിരുന്നു. പുതിയ നിയമമനുസരിച്ച് ഓഗസ്റ്റ് 17 മുതല്‍ വാങ്ങുന്ന '16-17 സേവര്‍' റെയില്‍കാര്‍ഡിന് വാങ്ങിയ തീയതി മുതല്‍ ഒരു വര്‍ഷത്തെ കാലാവധിയുണ്ടാകും. ഈ കാലയളവിനിടെ കാര്‍ഡ് ഉടമയ്ക്ക് 18 വയസ്സ് തികഞ്ഞാലും ആനുകൂല്യം തുടരും.

ഇതോടെ 18 വയസ്സ് തികയുന്നതിന് തൊട്ടുമുന്‍പ് റെയില്‍കാര്‍ഡ് വാങ്ങുന്നവര്‍ക്ക് 19 വയസ്സിനോട് അടുത്തുവരുന്നതുവരെ പകുതി നിരക്കില്‍ ട്രെയിന്‍ യാത്ര ചെയ്യാന്‍ കഴിയും. കോളജുകളിലേക്കും പരിശീലനകേന്ദ്രങ്ങളിലേക്കും പാര്‍ട്ട്ടൈം ജോലികള്‍ക്കുമായി പതിവായി ട്രെയിന്‍ ഉപയോഗിക്കുന്ന യുവാക്കള്‍ക്കും അവരുടെ കുടുംബങ്ങള്‍ക്കും പുതിയ തീരുമാനം സാമ്പത്തിക ആശ്വാസമാകുമെന്നാണ് വിലയിരുത്തല്‍. '16-17 സേവര്‍' റെയില്‍കാര്‍ഡ് ഉപയോഗിച്ച് സ്റ്റാന്‍ഡേര്‍ഡ് എനിടൈം, ഓഫ് പീക്ക്, അഡ്വാന്‍സ് ടിക്കറ്റുകള്‍ ഉള്‍പ്പെടെ മിക്ക റെയില്‍ യാത്രകളിലും 50 ശതമാനം ഇളവ് ലഭിക്കും. സീസണ്‍ ടിക്കറ്റുകള്‍ക്കും ഇളവ് ബാധകമാണ്. 18 വയസ്സ് കഴിഞ്ഞവര്‍ക്ക് ലഭ്യമായ '16-25 റെയില്‍കാര്‍ഡ്' ഉപയോഗിക്കുമ്പോള്‍ സാധാരണയായി മൂന്നിലൊന്ന് നിരക്കിളവാണ് ലഭിക്കുന്നത്. ഇതുമായി താരതമ്യം ചെയ്യുമ്പോള്‍ '16-17 സേവര്‍' റെയില്‍കാര്‍ഡ് നല്‍കുന്ന 50 ശതമാനം ഇളവ് കൂടുതല്‍ പ്രയോജനകരമാണ്.

പൊതുഗതാഗത യാത്ര കൂടുതല്‍ ചെലവുകുറഞ്ഞതാക്കാനുള്ള സര്‍ക്കാര്‍ നടപടികളുടെ ഭാഗമായാണ് റെയില്‍കാര്‍ഡ് നിയമത്തിലും മാറ്റം വരുത്തുന്നത്. ഇംഗ്ലണ്ടിലെ പദ്ധതിയില്‍ പങ്കെടുക്കുന്ന ലോക്കല്‍ ബസ് സര്‍വീസുകളില്‍ പരമാവധി സിംഗിള്‍ യാത്രാനിരക്ക് മൂന്ന് പൗണ്ടില്‍നിന്ന് രണ്ട് പൗണ്ടായി കുറയ്ക്കാനും സര്‍ക്കാര്‍ തീരുമാനിച്ചിട്ടുണ്ട്. പുതിയ രണ്ട് പൗണ്ട് ബസ് നിരക്ക് പരിധി 2027 ജനുവരി ഒന്നുമുതല്‍ പ്രാബല്യത്തില്‍ വരും. ഇതോടെ പരമാവധി സിംഗിള്‍ യാത്രാനിരക്കില്‍ ഒരു പൗണ്ടിന്റെ, അഥവാ മൂന്നിലൊന്നിന്റെ കുറവുണ്ടാകും. ഇതിനുപുറമേ, വേനലവധിക്കാലത്ത് കുട്ടികളുടെ യാത്രച്ചെലവ് കുറയ്ക്കുന്നതിനായി അഞ്ചുമുതല്‍ 15 വയസ്സുവരെയുള്ള കുട്ടികള്‍ക്ക് ഓഗസ്റ്റ് മാസത്തില്‍ പദ്ധതിയില്‍ പങ്കെടുക്കുന്ന ലോക്കല്‍ ബസ് സര്‍വീസുകളില്‍ സൗജന്യ യാത്രയും പ്രഖ്യാപിച്ചിട്ടുണ്ട്. ജീവിതച്ചെലവ് ഉയര്‍ന്നുനില്‍ക്കുന്ന സാഹചര്യത്തില്‍ കുടുംബങ്ങളുടെ യാത്രാഭാരം കുറയ്ക്കുന്നതിനൊപ്പം കൂടുതല്‍ ആളുകളെ പൊതുഗതാഗതത്തിലേക്ക് ആകര്‍ഷിക്കുകയെന്ന ലക്ഷ്യത്തോടെയാണ് ബസ്, റെയില്‍ യാത്രകളിലെ ഇളവുകള്‍ സര്‍ക്കാര്‍ വ്യാപിപ്പിക്കുന്നത്.