ലണ്ടന്‍: ഇംഗ്ലണ്ടിലെ പ്രായപൂര്‍ത്തിയായവര്‍ക്കുള്ള സാമൂഹിക പരിചരണ സംവിധാനത്തിലെ ദീര്‍ഘകാല പ്രതിസന്ധിക്ക് പരിഹാരം കാണാന്‍ സമഗ്ര പരിഷ്‌കാരങ്ങള്‍ നടപ്പാക്കുമെന്ന് യുകെ പ്രധാനമന്ത്രി ആന്‍ഡി ബേണ്‍ഹാം. പദ്ധതിക്കാവശ്യമായ ധനം കണ്ടെത്തുന്നതിന് ഭാവിയില്‍ നികുതി വര്‍ധന ഉള്‍പ്പെടെയുള്ള 'കടുത്ത തീരുമാനങ്ങള്‍' സ്വീകരിക്കേണ്ടിവരുമെന്നും അദ്ദേഹം സൂചന നല്‍കി. പതിറ്റാണ്ടുകളായി തുടര്‍ച്ചയായി അധികാരത്തിലെത്തിയ സര്‍ക്കാരുകള്‍ സാമൂഹിക പരിചരണ മേഖലയിലെ പ്രശ്‌നങ്ങള്‍ പരിഹരിക്കുന്നതില്‍ പരാജയപ്പെട്ടത് പൊതുചുമതലയിലെ ഗുരുതര വീഴ്ചയാണെന്ന് ബേണ്‍ഹാം പറഞ്ഞു. പ്രതിസന്ധിക്ക് ശാശ്വതപരിഹാരം കണ്ടെത്താന്‍ സര്‍ക്കാര്‍ പ്രതിജ്ഞാബദ്ധമാണെന്നും അദ്ദേഹം വ്യക്തമാക്കി.
പരിഷ്‌കാരങ്ങളുടെ ഭാഗമായി പുതിയ ദേശീയ കെയര്‍ സര്‍വീസ് രൂപീകരിക്കും. കെയര്‍ വര്‍ക്കര്‍മാര്‍ക്ക് മെച്ചപ്പെട്ട ശമ്പളവും ഉയര്‍ന്ന നിലവാരത്തിലുള്ള പരിശീലനവും തൊഴില്‍പുരോഗതിക്കുള്ള കൂടുതല്‍ അവസരങ്ങളും ഉറപ്പാക്കുകയാണ് ലക്ഷ്യം. സാമൂഹിക പരിചരണ സംവിധാനത്തെ എന്‍എച്ച്എസുമായി കൂടുതല്‍ കാര്യക്ഷമമായി ഏകോപിപ്പിക്കാനും സര്‍ക്കാര്‍ പദ്ധതിയിടുന്നു. രോഗികള്‍ക്ക് ആശുപത്രിയില്‍നിന്ന് വീട്ടിലേക്കോ കെയര്‍ സംവിധാനങ്ങളിലേക്കോ മാറുമ്പോള്‍ തുടര്‍ച്ചയായ പരിചരണം ഉറപ്പാക്കുന്നതിനും ആരോഗ്യസംവിധാനത്തിനുമേലുള്ള സമ്മര്‍ദം കുറയ്ക്കുന്നതിനും ഈ ഏകോപനം സഹായിക്കുമെന്നാണ് സര്‍ക്കാര്‍ വിലയിരുത്തല്‍.
