ലണ്ടന്: രോഗികളുടെ മെഡിക്കല് രേഖകള് അനധികൃതമായി പരിശോധിച്ചതായി സംശയിക്കുന്ന എന്എച്ച്എസ് ജീവനക്കാരെ അന്വേഷണം പൂര്ത്തിയാകുന്നതുവരെ ജോലിയില് തുടരാന് അനുവദിക്കരുതെന്നും ഉടന് സസ്പെന്ഡ് ചെയ്യണമെന്നും എന്എച്ച്എസ് ഇംഗ്ലണ്ട് മേധാവി ജിം മാക്കി. രോഗികളുടെ സ്വകാര്യ ആരോഗ്യവിവരങ്ങളുടെ രഹസ്യസ്വഭാവം സംരക്ഷിക്കുന്നതില് 'സീറോ ടോളറന്സ്' സമീപനം സ്വീകരിക്കണമെന്ന് ഇംഗ്ലണ്ടിലെ 205 ആരോഗ്യ ട്രസ്റ്റുകള്ക്ക് അദ്ദേഹം നിര്ദേശം നല്കി. ക്ലിനിക്കല് ആവശ്യകതയില്ലാതെ രോഗികളുടെ മെഡിക്കല് രേഖകളിലേക്കോ മറ്റ് ആരോഗ്യവിവരങ്ങളിലേക്കോ പ്രവേശിക്കുന്ന ജീവനക്കാര്ക്കെതിരെ കടുത്ത നടപടി വേണമെന്നാണ് നിര്ദേശം. അനധികൃത പ്രവേശനത്തെക്കുറിച്ച് സംശയം ഉയര്ന്നാല് അന്വേഷണം പൂര്ത്തിയാകാന് ദിവസങ്ങളോ ആഴ്ചകളോ കാത്തിരിക്കാതെ ജീവനക്കാരനെ ഉടന് സസ്പെന്ഡ് ചെയ്യുകയും എന്എച്ച്എസ് കമ്പ്യൂട്ടര് സംവിധാനങ്ങളിലേക്കുള്ള പ്രവേശനാവകാശം റദ്ദാക്കുകയും വേണമെന്ന് മാക്കി വ്യക്തമാക്കി.
രോഗികളുടെ മെഡിക്കല് രേഖകളില് അവര് ആരോഗ്യപ്രവര്ത്തകരുമായി പങ്കുവയ്ക്കുന്ന ഏറ്റവും സ്വകാര്യമായ വിവരങ്ങളാണുള്ളതെന്നും ആ വിശ്വാസം ദുരുപയോഗം ചെയ്യുന്ന സംഭവങ്ങള് ആവര്ത്തിക്കുന്നത് ഇനി അനുവദിക്കാനാവില്ലെന്നും അദ്ദേഹം പറഞ്ഞു. 2023ല് നോട്ടിങ്ഹാമില് വാല്ഡോ കലോക്കെയ്ന് നടത്തിയ ആക്രമണങ്ങളിലെ ഇരകളുടെയും 2024ലെ സൗത്ത്പോര്ട്ട് കത്തിക്കുത്ത് കേസിലെ ഇരകളുടെയും മെഡിക്കല് രേഖകള് എന്എച്ച്എസ് ജീവനക്കാര് അനധികൃതമായി പരിശോധിച്ചതായുള്ള റിപ്പോര്ട്ടുകള് പുറത്തുവന്നതിന് പിന്നാലെയാണ് നിയന്ത്രണം ശക്തമാക്കുന്നത്. ജോലിയുടെ ഭാഗമല്ലാത്ത വ്യക്തിപരമായ കൗതുകം തീര്ക്കുന്നതിനായി രോഗികളുടെ രേഖകള് പരിശോധിക്കുന്നവര് പിടിക്കപ്പെടുമെന്നും ജോലി നഷ്ടപ്പെടുന്നതിന് പുറമെ ക്രിമിനല് നടപടികളും നേരിടേണ്ടിവരുമെന്നും ജിം മാക്കി മുന്നറിയിപ്പ് നല്കി.
2020 മുതല് ഇംഗ്ലണ്ടില് രോഗികളുടെ മെഡിക്കല് രേഖകള് അനധികൃതമായി പരിശോധിച്ചതുമായി ബന്ധപ്പെട്ട് 200ലധികം എന്എച്ച്എസ് ജീവനക്കാരെ പിരിച്ചുവിട്ടതായാണ് കണക്കുകള് വ്യക്തമാക്കുന്നത്. ഇതേ കാലയളവില് ഏകദേശം 2,000 ജീവനക്കാര് മറ്റ് അച്ചടക്ക നടപടികള്ക്കും വിധേയരായിട്ടുണ്ട്. രോഗികളുടെ വിവരങ്ങളുടെ സ്വകാര്യതയും വിശ്വാസ്യതയും സംരക്ഷിക്കുന്നത് എന്എച്ച്എസിന്റെ അടിസ്ഥാന ഉത്തരവാദിത്വമാണെന്നും അതില് വീഴ്ച വരുത്തുന്നവര്ക്കെതിരെ ഉടന് നടപടി ഉറപ്പാക്കണമെന്നുമാണ് പുതിയ നിര്ദേശത്തിന്റെ ലക്ഷ്യം.
