ലണ്ടന്‍: എന്‍എച്ച്എസ് ആശുപത്രികളിലെ എമര്‍ജന്‍സി വിഭാഗങ്ങളിലെ അമിതമായ തിരക്കും 'കോറിഡോര്‍ കെയറും' ഓരോ ആഴ്ചയും നൂറുകണക്കിന് അധിക മരണങ്ങളുമായി ബന്ധപ്പെടുന്നതായി പുതിയ പഠനം. ഇംഗ്ലണ്ട്, വെയില്‍സ്, നോര്‍ത്തേണ്‍ അയര്‍ലന്‍ഡ് എന്നിവിടങ്ങളില്‍ എ&ഇകളിലെ തിരക്ക് ആഴ്ചയില്‍ ഏകദേശം 550 അധിക മരണങ്ങള്‍ക്ക് കാരണമാകുന്നുണ്ടാകാമെന്നാണ് ഗവേഷകരുടെ കണക്ക്. 134 എമര്‍ജന്‍സി ഡിപ്പാര്‍ട്ട്മെന്റുകളിലായി 19,000ത്തിലധികം മുതിര്‍ന്ന രോഗികളുടെ വിവരങ്ങള്‍ പരിശോധിച്ചാണ് പഠനം നടത്തിയത്. എ&ഇയിലെ ഒക്യുപന്‍സി നിരക്ക് ഓരോ 10 ശതമാനം ഉയരുമ്പോഴും ചികിത്സ തേടിയ രോഗി തുടര്‍ന്നുള്ള 28 ദിവസത്തിനുള്ളില്‍ മരിക്കാനുള്ള സാധ്യത ഒരു ശതമാനം വര്‍ധിക്കുന്നതായാണ് കണ്ടെത്തല്‍. പഠനത്തില്‍ ഉള്‍പ്പെട്ട എമര്‍ജന്‍സി വിഭാഗങ്ങള്‍ ശരാശരി 175 ശതമാനം ഒക്യുപന്‍സിയിലാണ് പ്രവര്‍ത്തിച്ചിരുന്നതെന്നും ഗവേഷകര്‍ കണ്ടെത്തി.

അതായത്, എ&ഇയില്‍ ഔദ്യോഗികമായി ലഭ്യമായ ചികിത്സാ ഇടങ്ങളെക്കാള്‍ വളരെ കൂടുതല്‍ രോഗികളെ ഒരേസമയം പരിചരിക്കേണ്ട സാഹചര്യമാണുള്ളത്. ക്യൂബിക്കിളുകളും ചികിത്സാ ഇടങ്ങളും നിറഞ്ഞുകവിഞ്ഞതോടെ രോഗികളെ ആശുപത്രി ഇടനാഴികള്‍ ഉള്‍പ്പെടെയുള്ള സാധാരണ ചികിത്സയ്ക്കായി രൂപകല്‍പ്പന ചെയ്യാത്ത സ്ഥലങ്ങളില്‍ പരിചരിക്കേണ്ടിവരുന്നത് വ്യാപകമായിരിക്കുകയാണ്. ഇത്തരം 'കോറിഡോര്‍ കെയര്‍' രോഗികളുടെ സ്വകാര്യതയ്ക്കും സുരക്ഷയ്ക്കും മാന്യതയ്ക്കും വെല്ലുവിളിയാണെന്ന് എന്‍എച്ച്എസ് ഇംഗ്ലണ്ടും അംഗീകരിച്ചിട്ടുണ്ട്. ആവശ്യമായ ഓക്‌സിജന്‍, കോള്‍ ബെല്‍, ഭക്ഷണം, വെള്ളം, ടോയ്ലറ്റ് സൗകര്യം, ഉറങ്ങാനുള്ള സാഹചര്യം തുടങ്ങിയ അടിസ്ഥാന സൗകര്യങ്ങള്‍ ഉറപ്പാക്കാന്‍ കഴിയാത്ത ഇടങ്ങളിലെ പരിചരണമാണ് കോറിഡോര്‍ കെയറായി എന്‍എച്ച്എസ് നിര്‍വചിക്കുന്നത്. ഇത് സാധാരണ ചികിത്സാരീതിയായി മാറരുതെന്നും എന്‍എച്ച്എസ് വ്യക്തമാക്കിയിട്ടുണ്ട്.

എ&ഇയിലെ തിരക്ക് കൂടുന്നതിനനുസരിച്ച് ആശുപത്രിയില്‍ പ്രവേശിപ്പിക്കപ്പെട്ട രോഗികളുടെ മരണസാധ്യതയും ഉയരുന്നതായി കണ്ടെത്തിയെന്ന് പഠനം അവതരിപ്പിച്ച ഗ്ലാസ്‌ഗോ സര്‍വകലാശാലയിലെ ഡോ. റയാന്‍ മക്ഹെന്റി പറഞ്ഞു. നിലവിലെ തിരക്ക് കണക്കിലെടുത്താല്‍ ആഴ്ചയില്‍ ഏകദേശം 550 അധിക മരണങ്ങളുമായി ഇതിന് ബന്ധമുണ്ടാകാമെന്നാണ് ഗവേഷകരുടെ വിലയിരുത്തല്‍. എന്നാല്‍ പഠനത്തിലെ അനിശ്ചിതത്വം കണക്കിലെടുക്കുമ്പോള്‍ അധിക മരണങ്ങളുടെ സാധ്യതാ പരിധി ആഴ്ചയില്‍ 33 മുതല്‍ 1,083 വരെ ആയിരിക്കാമെന്നും ഗവേഷകര്‍ വ്യക്തമാക്കിയിട്ടുണ്ട്. അമിത തിരക്കിനിടെ ആരോഗ്യപ്രവര്‍ത്തകര്‍ കടുത്ത സമ്മര്‍ദത്തിലാകുന്നതും രോഗികളുടെ ആരോഗ്യനില വഷളാകുന്നത് സമയബന്ധിതമായി തിരിച്ചറിയുന്നതില്‍ ബുദ്ധിമുട്ടുണ്ടാക്കാമെന്ന ആശങ്കയും നിലനില്‍ക്കുന്നു. കോറിഡോര്‍ കെയറും മരണസാധ്യത വര്‍ധിക്കുന്നതുമായി ബന്ധമുണ്ടെന്ന് പഠനത്തില്‍ കണ്ടെത്തിയിട്ടുണ്ട്.

എന്‍എച്ച്എസ് ഇംഗ്ലണ്ടിന്റെ ഔദ്യോഗിക കണക്കുകളും ആശുപത്രികളിലെ സമ്മര്‍ദത്തിന്റെ വ്യാപ്തി വ്യക്തമാക്കുന്നു. 2026 ജൂലൈയില്‍ ഇംഗ്ലണ്ടിലെ എ&ഇകളില്‍ പ്രതിദിനം ശരാശരി 2,300 രോഗികള്‍ കോറിഡോര്‍ കെയര്‍ സ്വീകരിച്ചു. ആശുപത്രിയിലെ മറ്റ് അനുയോജ്യമല്ലാത്ത ഇടങ്ങളില്‍ ശരാശരി 728 പേര്‍ കൂടി ചികിത്സിക്കപ്പെട്ടു. ഇതോടെ ഓരോ ദിവസവും 3,000ത്തിലധികം രോഗികള്‍ സാധാരണ ബെഡ് അല്ലെങ്കില്‍ അംഗീകൃത ചികിത്സാ ഇടത്തിന് പുറത്താണ് പരിചരണം ലഭിച്ചതെന്ന് കണക്കുകള്‍ വ്യക്തമാക്കുന്നു. ജൂലൈയില്‍ ഇംഗ്ലണ്ടിലെ എ&ഇകളില്‍ 25 ലക്ഷത്തോളം പേര്‍ ചികിത്സ തേടിയതും റെക്കോര്‍ഡ് തിരക്കിന് കാരണമായി. രോഗികളുടെ എണ്ണം ഉയരുന്നതിനൊപ്പം ദീര്‍ഘനേരത്തെ കാത്തിരിപ്പും കോറിഡോര്‍ കെയറും തുടരുന്നത് രോഗസുരക്ഷയെ ബാധിക്കുന്ന പ്രധാന വെല്ലുവിളിയായി മാറിയിരിക്കുകയാണ്.